1 "Ila sambi wanhu wangumbeza heni,

wanhu wawele wadodo kusinda heni,

wawele wahaza wa hewo nandiwalema ng'hatu,

mbaka siwakundize kujitanza mibwa ja heni jilingwamila ming'holo ja heni.

2 Ndahawele na utanzi whachi kulawa kuli moko ga hewo,

wanhu wawele mong'ho wa hewo naumala,

3 wawele nawalubaluba nechilo kuli isi ilihela mazi na ilechigwe uchiwa,

kuno wagandile kwa nzala?

4 Kuli visosolo nawakungajiza mizuchila ja kugunuche,

chilyo cha hewo nachali mizabi ja migodi ja isuyo.

5 Nawawinjigwa leka wawe kutali na wanhu wa hewo,

kuno wowatowela iyowe kota wahizi.

6 Naiwagana kikala kuli nzanda zikalile,

kuli mitalawe na mikulubila.

7 Kuli visosolo nawalila kota midogowi,

nawekungajiza hamwe hali chipete.

8 Hewo ndo wapoka kota wahaza na wamamo wa hewo, wawele ndo mwaluko wa wihe,

wawele nawawinjigwa kuli isi.

9 "Wana wa hewo wangumbeza heni kwa nzimbo,

nandiwa chinhu cha kusecheza kwa hewo.

10 Wangunzudila ng'hatu na wangikala kutali na heni,

ila howombona hawalinguleka kunhemela mite kumeho.

11 Nguluwi nakandita ndiwe ng'hochele na kumbasa soni heni,

lelo wangunditila kota vyowalingugana.

12 Kudilo kwa heni chilundo changunhowa,

wangumbichila idiwa kuli magulu ga heni,

wangiwika goya kundumya.

13 Wangulemezaga nzila ya heni,

wangunyhilikaga kuli kubagama,

ndahela yoneche wa kunhanza.

14 Nawatula lukanzi na kufyela,

nawenjila na kunhowa.

15 Ukabuso naungubika,

kuhulichiza kwa heni nakusigwa kota mbeho vyoilinguwembelusa chinhu,

kikala goya kwa heni nakwajilila kota ng'hungugu.

16 "Lelo ndahela mong'ho woneche mnhumbula mwa heni,

mazuwa ga magazo nagafika heni.

17 Mizeje ja heni jangutama kuli mhela wa nechilo,

usungu wangundakula, haulingusindamala.

18 Nguluwi nakaidinga singo ya heni kwa ivalo lya heni,

nakaidinya singo ya heni kota kola ya ikanzu lya heni.

19 Nakanhoza kuli nhope,

nandiwa kota mivu na nhimbwisi.

20 Gwa Nguluwi, ndangukulilila ila haulingunyhidichila,

ndangwima, ila kwangundola hela.

21 Nakugaluka na kuwa ulihela isungu kwa heni,

kwangunhowa kwa moko wa hegwe uwele na mong'ho.

22 Kwangunyhasula na kunyhembelusa kwa mbeho,

nakunhoza aku na kula kuli chivuluvumbi.

23 Ndanguvizela kota konyhilika mbaka kuli kubagama,

honhu hawele nawawichilwa weng'ha wawele wakomu, howobagama.

24 "Ndaze, wone munhu yafichigwe na kudumigwa halingwinula moko?

Ndaze, wone munhu yawe kuli magazo halingulanda utanzi?

25 Ndaze, siwalilile wala wawele kuli magazo?

Ndaze, nhumbula ya heni haiwele na isungu kwa chiwalo cha wazunwa?

26 Ila vyombele nditumbila ganojile, gehile nagafika kwa heni,

vyombele ndipala lumuli, jiza nalyuya kwa heni.

27 Mazuwa gose nhumbula ya heni yangusanzalima,

mazuwa ga magazo nagafika kwa heni.

28 Ndangukola ndilombocheza, kikala kwa heni kwahela lumuli,

ndangwima hazelu kulanda utanzi.

29 Ndangulila kota mikanhu,

lizi lya kulila kwa heni lyangiwhana na lizi lya mituwe.

30 Ngozi ya heni naiwa nhitu na yangukubuka,

mizeje ja heni jangulakala kwa ivuche lya kutamika.

31 Ching'weleng'wele cha heni nachiwa cha kulombochezela,

mluli wa heni nauwa lizi lya chililo.