1 Hamba Elifasi, Mtemani, nakedichila,

2 "Ndaze, munhu yawele na luhala kangwidichilaga kwa ulonzi wa chipoka?

Kwangulonga ulonzi wa hihi hela.

3 Ndaze, munhu yawele na luhala kangilewelaga kwa ulonzi wihile,

ama kwa ulonzi wohambe utanze chinhu?

4 Ila kwa ulonzi wa hegwe, kwangulajila kota kwangukubeza kumdumba Nguluwi,

kwanguwalemeza wanhu kijesa kuwala Nguluwi.

5 Nongwa za hegwe ndo zilinguulongoza mlomo wa hegwe,

nagwe kwanguhagula kulonga kota wahadi.

6 Siwele heni, ila ulonzi wa gwegwe baho ndo wangukutagusa,

choulingulonga ndo chilingukulonjeleza.

7 Ndaze, hegwe ndo munhu wa mwaluko kupondigwa?

Ndaze, nakupondigwa kung'hali kuwa na vidunda?

8 Ndaze, hegwe nakuhulika mbuli za chitala cha Nguluwi,

ama, hegwe uliyeng'ha ndo uwele na luhala?

9 Kwanguchizela chinhu chachi chiwele hatuchizelele?

10 Hali hetwe wabaho wasekulu wawele na luhala,

wawele na miyaka minji kusinda mhaza wa hegwe.

11 Ndaze, uhembulizo woyalingukupa Nguluwi haulinguhega,

ama, ulonzi wa heye wa uliholile haulingutanza chinhu kwa hegwe?

12 Lekachoni nhumbula ya hegwe yangukwambuza uzudile,

na kukudita unogole meho,

13 mbaka kwangumbelenhuka Nguluwi

na kulonga ulonzi wihile kota awo?

14 "Munhu ndo chinhu chachi mbaka yawe yalihela gehile,

ama yula yapondigwe na mdala mbaka yawe yatanganiche?

15 Wone Nguluwi halinguwakunda mbaka wahilisi wa heye,

na ulanga hawenele kumeho kwa heye,

16 yowa mzidi kwa mwihe na yajilile,

munhu yalingudita wihe kota vila kunwa mazi!

17 "Lelo unyhulichize, nani ndokulonjela,

ndokulajila gala gondigawene,

18 mbuli za wawele na luhala,

ziwele wasekulu wa hewo hawazivisile,

19 wawele hewo waliyeka, Nguluwi nakawapa isi ayo,

haduhu mjenzi yawele nakakola hali hewo.

20 Mwihe kogazika kwa usungu kuli mazuwa gose,

miyaka jeng'ha joyawichilwe yula yalingubunza.

21 Lizi lya kukabusa lyotowa iyowe kuli makutu ga heye,

hoyochijesa kota kangulutilila goya, yalingudumya komvaba.

22 Mwihe kahela kitumbila kulawa kuli jiza,

kuduma kwa heye ndo kubagama kwa ipanga.

23 Ikungule lyanguzunguluta mchanya mwake,

kanguvizela kota zuwa lya jiza lyangumhejelela.

24 Magazo na usungu vyangumkabusa,

vyangumfika kota chilundo cha wamizi wa mndewa walingutowa.

25 Kwa vila nakagolola moko wa heye kwa Nguluwi,

nakajeza kumtowa Nguluwi Yawele na Ludali,

26 kwa ujuvi nakabilima kuluta kumtowa,

kuno yawele na ngawo ng'hulu na iwele nzinzili.

27 Kumeho kwa heye nakuneneha,

na chuno cha heye nachimema mafuta.

28 Nakekala kuli miji jilechigwe ne chinhu,

kuli ng'handa zilihela wanhu,

ng'handa ziwele naziwifigwa.

29 Howeza kuwa na lufufu kahi,

lufufu lwa heye haluweza kulutilila kwa mhela winji,

na ng'hano za heye haziwa nyinji muisi.

30 Howeza kiwika kutali na jiza.

Kowa kota igodi liwele mizuchila jake najilakazwa kwa chiluli,

uluwa wake nauwembeluswa na mbeho.

31 Fola yaleche kitumbila upoka na kihada,

kwa vila upoka wowa ndo chonolo cha heye.

32 Kolipigwa geng'ha hoyowa yang'hali kubagama,

nazo nhagala zake hazilutilila goya.

33 Kowa kota mzabibu ulingulagaza zabibu ndodi,

kota mzeituni ulingulagaza uluwa wake.

34 Weng'ha wohambe wamdumbe Nguluwi hawopata wana,

chiluli chojilakaza mihema ja wala walingupegwa chinhu kwa chiwalo cha kwajiliza hachi.

35 Wangijesa uhadi na kulela wihe.

Nhumbula zawo zangijesa kuwala uhadi."