1 Hamba Ayubu nakedichila,

2 "Ndangukomya, ndanguvizela ahi ndo vyoiwele,

ila munhu koweza ndaze kutawiza kota kana hachi hali Nguluwi?

3 Wone munhu yahajezile kitwanza na Nguluwi,

yahalemwele kumwidichila hanga mala imwe hela hali kuuza elufu imwe.

4 Heye ndo yawele na luhala lwinji na mong'ho ng'hatu.

Whaani yawele naketwanza na heye na kusumya?

5 Heye kanguvyusaga vidunda ne vidunda avyo kuvizela,

kanguvigalamlaga kwa ng'halazi ya heye.

6 Kangulilajizaga limachinyhina kuitigasa isi,

na kwambuza mizengo ja isi kutigasika.

7 Kangulajizaga na isanya lyanguleka kupulika,

na nhondwe zileche kulangaza.

8 Heye yaliyeka nakautandazula ulanga

na kuzidita nhigu za bahali zisindamale.

9 Ndo yaviditile vilundo vya nhondwe,

vilinguchemigwa Idubu na Olioni na Kilimia na nhondwe za kusini.

10 Kanguditaga vinduzanduza vikulu ng'hatu,

na mbuli zilingububuwaza zohambe ziwazigwe.

11 Kangukolaga habehi na heni, silingumonaga,

kangujendaga hali heni, silingumzela.

12 Lole! Kanguholaga choyalingugana,

whaani yoweza kumlemeza?

Whaani yoweza kumuuza, ‘Kwangudita choni?’ "

13 "Ng'halazi ya Nguluwi loiwele ing'ang'ale,

vitumagwa wa Lahabu, chilumbigwe chikulu cha kuli bahali, nawagwa hali magulu ga heye.

14 Ndoweza ndaze kitwanza na Nguluwi?

Ndaze, ndoweza kuhagula ulonzi wa kumlonjela?

15 Hanga ndahela nongwa, siweza kumwidichila.

Ndanguganigwa kumdedeza ayo yalingundonjeleza,

leka yambonele isungu.

16 Hanga ndahamchemile kuli chitala na yahakundile kuya,

silingukunda kota yahanyhulichize.

17 Kangundumyaga kwa chivuluvumbi,

na konjeza vilonda kwa heni ne chiwalo.

18 Halingundeka nyesele,

ila kangumemeza heni usungu.

19 Wone ndo kuwala kitwanza, heye kana mong'ho ng'hatu!

Wone ndo kuwala kupala hachi,

whaani yawele komhilika kuli chitala?

20 Hanga ndahawele ndilihela nongwa, ulonzi wa heni wahanyambuze kuwa na nongwa,

hanga ndahawele siditile gehile, wahatawize kota nandajilila.

21 Hanga ndahela nongwa, silingijesa kuwala chilingulawila kwa heni,

ndangukuzudila kikala kwa heni.

22 Nguluwi kanguwakopolaga walihela nongwa na wehile,

ahyo, haduhu chilingunhanza.

23 Mhela uwele kubagama hokuya baho du,

kangusechelelaga kubagama kwa yalihela nongwa.

24 Isi hoiwa kuli ulongozi wa wehile,

Nguluwi kangugadinyaga meho ga watagusa wa heye!"

Wone hawele heye yalingudita ahyo, kowa whaani?

25 "Mazuwa ga heni ganguluta himahima kusinda yalingubilima lukami,

gangubilima ne heni kona ganojile kuli mazuwa ago.

26 Gangukola himahima kusinda itumbwi lya midete,

kota ikungule lilingudulichila upelembi wake.

27 Wone ndonje, ‘Ndokusemwa kung'ung'uta kwa heni,

ndogalula kumeho kwa heni,

na kukudita kuwe na usangalalo,’

28 ila nding'hali ndangukudumba kugazika kweng'ha kwa heni,

kwa vila ndanguvizela kota Nguluwi hombona kota ndahela nongwa.

29 Kwa vila namboneka kota ndina nongwa,

lekachoni lelo nditunye hihi hela?

30 Hanga nandihovuje kwa sabuni,

na kugeliza moko ga heni,

31 heye yahanhozile kuli ikulubila liwele na nhope,

mbaka mivalo ja heni jahanzudile ng'hatu.

32 "Nguluwi hawele munhu kota heni,

ahyo siweza kumwidichila,

siweza kitwanza naye kuli chitala.

33 Haduhu mhanyisi hali hetwe,

yawele yahatwamule.

34 Yose ng'hobwa ayo kwa heni,

leka kukabusa kwa heye kuleche kingalila lunhwinhwi!

35 Aho ndahalonjile ne kumdumba,

ila vyoiwele sambi kwa heni, siweza."