1 "Kwa chiwalo cha ago geng'ha, nhumbula ya heni yangukakama,

nayo yanguzuma kulawa honhu hake.

2 Mhulichize lizi lya Nguluwi,

kubuma kulingulawa kuli mlomo wa heye.

3 Kangululechelaga lumwemwesa lwa limlungu hasi ha ulanga weng'ha

na kulweneza mbaka kuli banzi zeng'ha za isi.

4 Hamba lizi lyangubumaga,

lizi lya Nguluwi lyangubumaga kwa ukulu wa heye,

na mhela awo weng'ha lumwemwesa lwangupulikaga.

5 Nguluwi hoyolonga, mbuli za kububuwaza zangulawila kota vila limlungu,

kanguditaga mbuli ng'hulu zohambe tuzizele.

6 Kanguilajizaga seluji kugwa kuli misanga,

na nhonya ng'hulu itowe.

7 Hoyodita ahyo kangujilemezaga mijito ja wanhu kukoleka,

leka wanhu weng'ha wavizele kota heye nakadita ahyo.

8 Nhonya hoitowa, migongolo ja kisolo jangulutaga kuli honhu ha kivisa,

jangikalaga kuko mbaka nhonya hoimala.

9 Chivuluvumbi changulawaga kuli honhu hake,

chipute changulawaga kuli mbeho ilinguluta hima.

10 Lweselo lwa Nguluwi lwangulavyaga balafu,

honhu hakulu ha mazi hangugagadala kota maganga.

11 Nguluwi kangumemezaga midovu minji kuli ng'hungugu,

ng'hungugu yangusambalulaga lumwemwesa lwake.

12 Nayo ng'hungugu yanguzungulutaga kwa malajizo ga heye,

mchanya mwa isi yeng'ha,

yangudita choneche choyolajiza.

13 Nguluwi kangugalaga nhonya kuli isi,

leka kutugaza ama kulajila igano lya heye lya kwimilila.

14 "Ayubu, kwanguganigwa kuhulichiza,

unyamalile na wijese kuwala vinduzanduza vya Nguluwi.

15 Ndaze, kwanguvizela ndaze Nguluwi vyoyalinguilajiza ng'hungugu,

na kuludita lumwemwesa lwa heye lwa limlungu lulavye lumuli?

16 Ndaze, kwanguvizela ndaze ng'hungugu vyoilingwelela kuli ulanga?

Ajo ndo mijito ja kububuwaza ja yula yawele muwanzi ng'hatu!

17 Hegwe ulingiwona kota nakuvala nguwo ziwele na ivuche ng'hatu,

mhela mbeho ya ivuche lya kusini yanguivaba isi,

18 ndaze, koweza kuutandazula ulanga,

na kuudita uwe lugagadala kota chilolelo cha shaba?

19 "Ayubu, mlangusa mkulu,

utulanguse choni chotulinguganigwa kumlonjela Nguluwi,

hatuuzelele ulonzi wa kulonga.

20 Ndaze, ndimlonjele Nguluwi kota ndangugana kulongasa na heye?

Hebu, kwa vila wone ndite ahyo, koweza kundumya.

21 Lelo haduhu yawele koweza kulilola isanya,

vyolilingupulika goya kuli ulanga,

mbeho hoiwa yusile ng'hungugu yeng'ha.

22 Kulawa kasikazini, Nguluwi kanguyaga na lumuli lulingupulika kota zahabu,

kanguyaga kuli welile wa kudumbiza.

23 Nguluwi Yawele na Ludali halingoneka,

ila mong'ho wake ndo ukulu,

na mazuwa gose kangwamulaga kwa hachi.

24 Ahyo, wanhu wangumdumba,

heye halingijesa kuwala yoneche yalingidaya,

na kijesa kota kana luhala ng'hatu."