1 Hamba Elifasi, Mtemani, nakamwidichila Ayubu,

2 "Wone munhu kojeza kulongasa na hegwe, komwimilila?

Ila whaani yoweza kilemeza kulonga?

3 Uhulichize! Hegwe nakuwalangusa wenji,

na kugadita moko ga ng'hochele gawe nzinzili.

4 Ulonzi wa hegwe nauwenula wawele nawatweguka nhumbula,

nakugadita mafugamilo ga walihela mong'ho gawe nzinzili.

5 Ila lelo nagakufika, nagwe nakulemwela kwimilila,

nagakudoliza, nagwe nakudeula.

6 Ndaze, kumdumba Nguluwi na kugoloka kwa hegwe,

haviwele ndo kitumbila kwa hegwe?

7 Wijese lelo, whaani yalihela nongwa yawele nakawifigwa?

Ama kohi wagoloche nawawahika kudumigwa?

8 Vyondivizelele, walingulima na kunyala gehile na wihe wangubetaga gago du.

9 Nguluwi kanguwakopolaga awo kwa lweselo lwa heye,

wangulakazwaga kwa chiluli cha ng'halazi ya heye.

10 Wehile wangubumaga kota isimba ling'hang'hale,

ila mizino jawo jangubenigwa.

11 Isimba liwele na mong'ho lyangubagamaga wone liwe lilihela upelembi,

na miyana ja isimba idala jangusambalukaga!"

12 "Zuwa limwe nandonjeligwa ulonzi kwa uviso,

ikutu lya heni nalihulika kupwepwa kwake.

13 Lombele kuli kulota mhela wa nechilo,

mhela uwele usinjinzi wanguwabataga wanhu,

14 nandali ndidumba na kukakama,

mizeje ja heni jeng'ha najali jikakama.

15 Muhe naukola kumeho kwa heni,

mnvili za lukuli lwa heni nazima.

16 Nawima tulu hali heni,

londolile nasivizelele.

Nakwali na ulajilo hali heni,

nakwali tulu, hamba nanyulika lizi,

17 ‘Munhu koweza kuwa yatanganiche kusinda Nguluwi?

Ndaze, munhu koweza kuwa yelile kusinda Yamlumbile?

18 Wone Nguluwi kahela kitumbila kwa vitumagwa wa heye,

mbaka kanguwang'ung'utila wahilisi wa heye kwa kudita vibi,

19 yowa ndaze lelo kwa wanhu wawele nawalumbigwa kwa misanga,

wanhu wawele mwaluko wa hewo ndo nhimbwisi,

wawele woweza kuhondangwa kota fukuzi?

20 Kwa mhela uchefu hela munhu kodumigwa,

kokwajilila mazuwa gose ne kuleka ulajilo wa heye!

21 Wone uzi ulingibatilila ukomu wa hewo udumuligwe,

wangubagama ne kuwa na luhala.’