1 Aho Ayubu nakamwidichila Mkulu Nguluwi.

2 "Ndanguvizela kota kwanguweza kudita mbuli zeng'ha,

haduhu yoneche yawele koweza kulemeza kiwika goya kwa hegwe.

3 Nakuuza, ‘Whaani yalingulonga ulonzi wa chipoka ne uwanzi?’

Ndikomya nandonga kuwala mbuli zohambe ndizizele,

mbuli za kububuwaza ng'hatu kwa heni.

4 Nakundonjela, ‘Uhulichize nani ndolonga,

ndokuuza nagwe kwanguganigwa unyidichile.’

5 Aho hamwande nanyulika hela mbuli za hegwe kulawa kwa wanji,

ila lelo ndangukona kwa meho ga heni.

6 Lelo ndangona soni kwa chiwalo cha gala geng'ha gawele nandonga,

ndangibakaliza nhimbwisi na mivu kulajila kulonga gehile ga heni."

7 Mkulu Nguluwi loyasindile kulongasa na Ayubu, nakamlonjela Elifasi, Mtemani, "Ndina ng'halazi na hegwe na goloko wa hegwe weli, kwa vila hamlonjile ga kukomya kuwala heni, ila chitumagwa wa heni Ayubu nakalonga ga kukomya. 8 Lelo mhole milogota milume saba na ming'holo milume saba mlute kwa chitumagwa wa heni Ayubu leka mlavye nhambiko za kulakazwa kwa chiwalo cha mwemwe baho. Chitumagwa wa heni Ayubu kolanda kwa chiwalo cha hemwe nani ndokubochela kulanda kwa heye leka ndeche kuwaditila kwa kiwhana na upoka wa hemwe, kwa vila hamlonjile kukomya kuwala heni, ila chitumagwa wa heni Ayubu nakalonga ga kukomya."

9 Lelo Elifasi, Mtemani na Bilidadi, Mshuhi na Sofali, Mnaama, nawadita kota Mkulu Nguluwi vyoyawalonjele, naye Mkulu Nguluwi nakakunda kulanda kwa Ayubu.

10 Ayubu loyasindile kulanda kwa chiwalo cha goloko wa heye, Mkulu Nguluwi nakamlohola kulawa kuli kugazika, nakamtambichiza kahi. Mkulu Nguluwi nakamha vinhu mala mbili ya hamwande. 11 Hamba wang'holoze weng'ha walume na wadala na chila munhu yawele nakamzela aho hamwande, nawaluta kuli ng'handa ya heye na kulya hamwe. Nawamhembuliza kwa chiwalo cha magazo geng'ha gawele nagamfika kwa kwambuzwa na Mkulu Nguluwi. Chila yumwe nakamha sendi na pete ya zahabu.

12 Mkulu Nguluwi nakajitambichiza miyaka ja kuduma ja kikala kwa Ayubu kusinda jila ja hamwande. Nayali na ming'holo elufu kumi na zine (14,000) na ngamiya elufu sita (6,000) na mibuguma elufu mbili (2,000) na midogowi midala elufu imwe (1,000). 13 Kahi nayali na wasongolo saba na wahinza wadatu. 14 Mhinza wake wa mwaluko nayali yochemigwa Yemima na wa keli nayali yochemigwa Kesiya na wa kadatu nayali yochemigwa Keleni-hapuki. 15 Kuli isi ayo yeng'ha hakuwele na wadala wawele na kumeho kunojile ng'hatu kota wahinza wa Ayubu, naye mhaza wawo nakawapa uhalizi hamwe na kalumbu wa hewo.

16 Logakolile ago geng'ha Ayubu nakekala miyaka miya imwe na makumi gane (140), nakawona wazukulu wa heye mbaka ivyazi lya kane. 17 Lelo Ayubu nakabagama yawele sekulu ng'hatu.