1 "Ayubu, ndaze kwanguuzela mhela wa mhelele,

ama wa ibala kulela?

2 Ndaze, kwanguvizela kota wanguwa na himila kwa mhela whachi,

ama zuwa lya kulela kwangulizela?"

3 Mhela wa kulela houfika wangusunzumalaga na kulela,

na usungu wa kulela wanguleka.

4 Wana wawo wangulutililaga goya na konjezeka mong'ho kuko kisolo,

hamba wangukaga ne kuhiluka.

5 "Whaani yajilechile midogowi ja kisolo jilejehe?

Whaani yajidohole ng'weso?

6 Heni ndo mbele nandijiwika kugunuche,

honhu hawele misolo hajilingukula.

7 Janguwa kutali na iyowe lya kuli miji,

na kwanguwahela munhu yawele kojidita jizowele kukola mijito ja lupichi.

8 Kuli vidunda ndo honhu hawo ha kudila,

jangupalaga chila chiwele chidodi.

9 "Ayubu, ndaze ibogo lyokunda kukukolela mijito,

ama kikala kuli ibani lyako?

10 Ndaze, kwanguweza kuliwoha ibogo ng'weso na kulidita lilime,

ama likweje ihuka lya kulimila kuli mgunda wa hegwe?

11 Ndaze, kochitumbila kwa vila lina mong'ho winji

na kulilechela likukolele mijito jing'hang'hale ja hegwe?

12 Ndaze, kochitumbila likugalile mbena za hegwe haluga kulawa kumgunda

na kuzikungajiza kuli honhu hako ha kupululila nyhule?

13 "Mbuni kangutowaga mabawa gake kwa kusangalala,

ila halinguweza kuguluka kota isakulang'hola.

14 Mbuni kangulekaga mafinga gake mchanya mwa misanga

leka jipate ivuche kulawa kuli sangalaza,

15 ne kijesa kota joweza kubigangwa

ama kuwifigwa na migongolo ja kisolo.

16 Kangujiditila mafinga gake kota mafinga ga yunji,

na kudita mong'ho wake kuwa wa hihi hela,

17 kwa vila heni Nguluwi nandimdita mbuni yawe mpoka,

simpele honhu honeche ha luhala.

18 Ila hoyokwaluka kubilima,

kangumsekaga falasi na yakwinile kuli falasi

kwa vila falasi halingubilima himahima kusinda mbuni.

19 "Ayubu wijese kuwala falasi,

ndaze, hegwe ndo nakuwapa falasi mong'ho,

ama hegwe ndo nakuwadita wawe na milaika ng'wemang'wema msingo?

20 Ndaze, hegwe ndo nakuwadita falasi waguluche kota nzije?

Mhela lowolila kwa lizi likulu wanguwadita wanhu wadumbe.

21 Wangupanangapananga kuli misanga, wosangalala kwa chiwalo cha mong'ho wa hewo ukulu,

wochiwika goya kubilimila kuli ngondo.

22 Falasi wangulusekaga lunhwinhwi, hawalingudumba choneche,

ne kulibilima ipanga.

23 Vinhu vya kitowela ngondo vyowalinguvihola walingwendesa falasi,

vyangulavya lizi lya kutigasika na kupulika kuli isanya.

24 Falasi wangulutaga kumwando kuno isi yokakama kwa ng'halazi,

mhalamhanda hoilila, wangubilimila.

25 Howohulika lizi lya mhalamanda wangulila, ‘Aha!’

Wangupataga unhunyhililo wa ngondo kulawa kutali,

lizi lya chilongozi na iyowe lya ngondo.

26 "Ayubu, ndaze ibondwa nalilangusa kwa hegwe kuguluka,

na kugolosa mabawa gake kuluta kusini?

27 Ndaze, ikungule lyangugulukaga kilanga kwa malajizo ga hegwe,

na kuzenga chimvulila chake honhu ha kuchanya?

28 Lyangikalaga mchanya mwa mitalawe jiling'wemang'wema,

mitalawe jiwele na chihomo ndo ngome yake.

29 Kulawa ako lyangupalaga upelembi wake,

meho gake ganguwonaga kulawa kutali.

30 Hawele na itufi ndo lyanguzungulutaga baho,

mibofu jake jangufyomaga danda."