1 Hamba Ayubu nakamwidichila Elifasi,

2 "Wone usungu wa heni wahapimigwe,

magazo ga heni geng'ha gahawichigwe kuli mizani,

3 gahawele na itunyo ng'hatu kusinda sangalaza za kuli bahali,

acho ndo chiwalo cha heni kulonga hela ne kijesa!

4 Misale ja Nguluwi Yawele na Ludali najisoma lukuli lwa heni,

nhumbula ya heni nainwa dunga yake,

ukabuso wa Nguluwi wangiwika goya kufika heni.

5 Ndaze, idogowi lya kisolo lyangulilaga wone liwe na misolo,

ama ibuguma lyangulilaga wone liwe na chilyo?

6 Ndaze, chilyo chizabuche choligwa ne mwino,

ama hana unonile kuli ute wa ifinga?

7 Silingugana kuvidoliza,

vilyo viwele kota ahi vyangunzudizaga."

8 "Wone ndahapatile chondandile,

wone Nguluwi yahamhele chila chondilingitumbila,

9 kota Nguluwi yahawele goya kumhondanga,

yahagolole moko wa heye leka yang'hopole!

10 Acho chahawele ndo chihembulizo cha heni,

ndahasangalale kuli usungu wohauwele na isungu,

kwa vila siulemile ulonzi wa heye Yelile.

11 Ndina mong'ho whachi mbaka ndutilile kitumbila?

Kuduma kwa heni kowa ndaze mbaka ndutilile kwimilila?

12 Ndaze, ndoweza kwimilila kota iganga?

Ama lukuli lwa heni ndo kota chuma?

13 Ndikomya, siweza kitanza ndiliyeka,

utanzi weng'ha nawusigwa kwa heni."

14 "Yohambe yamlajile goloko wa heye igano lya kwimilila,

kangulema kumdumba Nguluwi Yawele na Ludali.

15 Goloko wa heni nawambada kota nzanda,

nawandeteleza kota vikolola visowile mazi,

16 viwele vimemile balafu,

na seluji yanguwa ivisile mgati mwake.

17 Ila mhela wa ivuche yangwajililaga,

nzanda zangusigala ng'havu.

18 Wawele kuli majendo wangusochelaga nzila wopala mazi,

wanguluta kuchiwala na wangubagama kuko.

19 Wawele kuli majendo kulawa Tema wangugapalaga mazi,

walingugula na kuguza vinhu wa Sheba walingujenda, wangubeteza kwa kitumbila.

20 Wangitunyaga kwa kitumbila kwa hihi hela,

wangufika kuli nzanda azo na kona haduhu chowawele wochitumbila.

21 Namwe namuwa kota nzanda azo,

mwangugona magazo ga heni na kudumba.

22 Ndaze, nandonga mumhe heni chonolo?

Ama chinhu kwa chiwalo cha kwajiliza hachi kulawa kuli lufufu lwa hemwe?

23 Ama mndohole kulawa kuli ndole za mng'honyo?

Ama mngombole kulawa mmoko mwa mwihe?"

24 "Mndanguse nani ndonyamalila,

mnzelese ndaze vyondajilile.

25 Ulonzi wa kukomya una mong'ho ng'hatu!

Ila kung'hanuchila kwa hemwe kwangundangusa choni?

26 Ndaze, mwangijesa kota mwanguweza kugolola ulonzi?

Ulonzi wa munhu yagozole ndo kota mbeho hela.

27 Mna nhumbula zigagadale mbaka mwanguwatowela simbi walekwa leka wawe wapogozi,

ena, mbaka mwangumguza goloko wa hemwe!

28 Dedede lelo mndole heni,

siweza kulonga udesi hali hemwe.

29 Dedede, haleche kuwa na wihe,

mleche kundonjeleza, kwa vila ulonzi wa heni ndo wa hachi.

30 Ndaze, mwangijesa kota nandonga udesi?

Silingulonga udesi, kwa vila ndanguvizela linojile na lihile.