1 Ayubu nakedichila,

2 "Goya! Hemwe mwa wanhu muwele na nyhala lukami,

hemwe lombagama na luhala lweng'ha lobagama.

3 Nani ndina kuvizela kota hemwe.

Siwele na nyhala ndodo kusinda hemwe,

geng'ha gomlonjile chila munhu kangugazela.

4 Goloko wa heni wanguseka heni,

hanga nandimchema Nguluwi naye nakanyidichila.

Nandiwa munhu wa kusechigwa hela,

hanga nda nhanganiche na ndilihela nongwa!

5 Munhu yohambe yafichigwe na magazo,

kanguwasekaga wala wawele nawafichigwa na magazo,

kangijesaga kota magazo ganguwafikaga wala walingutelela.

6 Mihema ja wabokaji jina kikala goya,

walingumzudiza Nguluwi wangikala kwa kikala goya,

mong'ho wa hewo ndo mlungu wawo.

7 "Jiuze migongolo najo jokulangusa,

ama videje navyo vyokulonjela.

8 Jiuze kahi misolo najo jokulangusa,

ama somba nazo zokulonjela.

9 Chilumbigwe chachi hali avyo,

chiwele hachizelele kota Mkulu Nguluwi nakavilumba avyo?

10 Ukomu wa chila chilumbigwe chilingikala wa kuli moko ga heye,

hihyo du na muhe wa ukomu wa munhu.

11 Ndaze, ikutu hambe lipime ulonzi,

kota umyango vyoulingujeza chilyo?

12 Ndaze, luhala haluwele kwa wasekulu,

na uwanzi kwa hewo wekale mhela winji?

13 Ila luhala na ludali ndo vya heye Nguluwi,

kana uwanzi na kuvizela.

14 Hoyobomola, haduhu yoweza kuzenga kahi,

hoyomhindila munhu mchinweng'ho, haduhu yoweza kumtanza kusulupuka.

15 Hoyolemeza nhonya isi yanguwa kugunuche,

hoyoilechela, isi yangufichigwa na mazi tendema.

16 Heye kana ludali na luhala,

walinguhadigwa na walinguhada ndo wa heye.

17 Kanguholaga luhala lwa vilongozi,

na kuwadita wawe kota wapoka.

18 Kanguwosaga wandewa kofia za hewo za chiundewa,

na kuwawoha mchuno ng'weso za mchinweng'ho.

19 Kanguholaga mivalo ja chiutambika kulawa kwa watambika,

na ludali lwa wala walinguwalongoza wanhu wanji.

20 Kanguwadita walingukundigwa wanyamalile,

na kuwasukula wasekulu luhala lwa hewo.

21 Kanguwabasaga soni wakulu,

kanguwoselaga mong'ho wawele na ludali.

22 Kangugubulaga mbuli ziwele kuli jiza totolo

na kigala kuli lumuli gala gawele kuli uviso.

23 Kanguwenulaga wanhu wa isi, hamba kanguwadumyaga,

kanguwaditaga wawe wenji hamba kanguwasambalulaga.

24 Kanguwoselaga vilongozi wa wanhu uwanzi wa hewo,

kanguwaditaga walubelube kuchiwala kulihela nzila.

25 Nawo wangukwabasaga kuli jiza,

na kuwadita wazebeduche kota nawagala.