1 Ayubu nakedichila,

2 "Lehano ndangung'ung'uta kwa usungu,

kwa vila Nguluwi kangulutilila kungaza.

3 Wone ndahahazelele honhu hondimpata Nguluwi,

ndahawezile kumhejelela.

4 Ndahamhilichile ulonjelezi wa heni,

na kilewela hali heye.

5 Ndahawezile kuvizela choyonyhidichila,

na choni choyondonjela.

6 Ndaze, yahatwanzile na heni kwa mong'ho ng'hatu?

Hebu! Ndikomya, yahanyhulichize.

7 Heye koweza kulongasa na munhu yagoloche,

Nguluwi, mtagusa wa heni, yahawezile kwamula kota ndahela nongwa mazuwa gose.

8 "Ulole, ndanguluta kumwando, silingumpata,

ndanguhiluka kumbele, silingumona.

9 Hoyohinduchila ubanzi wa kumoso, silingumona,

hoyohinduchila ubanzi wa kudilo, silingumona ne hado.

10 Ila heye kanguizela nzila yondilinguiwinza,

hoyosinda kunjeza, ndolawa amo mbele kota zahabu inojile.

11 Ndanguzipala nzayo za heye kwa kukundigwa,

ndanguiwinza nzila ya heye ne kugaluchila kumoso ama kudilo.

12 Silechile kibatilila mizilo ja heye,

ulonzi wa heye nandiuwika mnhumbula mwa heni mazuwa gose.

13 Ila heye halingugaluka, whaani yoweza kumdita yagalamche?

Choyalingugana ndo choyalingudita!

14 Kokweneza malajizo ga heye kwa heni,

menji kota ago ga kuli nyhala za heye.

15 Ahyo, ndangukakama kwa ukabuso hali heye,

hondijesa kuwala heye, ndangufichigwa na kudumba.

16 Nguluwi nakaidita nhumbula ya heni itweguche,

Nguluwi Yawele na Ludali nakang'habusa.

17 Ila silinguditigwa nyamalile kwa chiwalo cha jiza,

jiza totolo liwele naligubika kumeho kwa heni."