1 Aho Ayubu nakedichila,

2 "Ndaze, molutilila kungaza mbaka nili,

na kumbenanga heni kwa ulonzi wa hemwe?

3 Mala ya kumi ayi mwangundonga,

ne soni mwangunhowa.

4 Hanga ndahawele nyhajilile,

nongwa ya heni yosigala kwa heni.

5 Mwangijesa kota mwa wanojile kusinda heni,

mwangugona magazo ga heni kota gangutawiza nongwa za heni.

6 Mvizele kota Nguluwi nakanditila vibi,

nakangwiliza kuli utandawala wa heye.

7 Ulole ndangutowa iyowe, ‘Kubunza!’

Ila haduhu wa kwidichila.

Ndanguchema kwa lizi likulu,

ila silingupata hachi ya heni.

8 Nakaidinya nzila ya heni kwa lukanzi, leka ndeche kukola,

nakawika jiza kuli nzila ya heni.

9 Nakawusa ukulu wa heni,

na kusa lutogo lwa heni.

10 Nakawifya chila honhu ha lukuli lwa heni, mbaka nda habehi kumala,

nakang'humbula kitumbila kwa heni kota igodi.

11 Ng'halazi ya heye nayaka kwa heni,

nakambona kota nda yumwe hali wang'honyo wa heye.

12 Wamizi wa heye wanguya kwa mong'ho,

nawagongomanya nzila ya kuya kwa heni,

nawawika kambi kuizunguluta ng'handa ya heni.

13 Nguluwi nakawawika kalumbu wa heni kutali na heni,

na kwambuza goloko wa heni kunditila kota mjenzi.

14 Wang'holozangu nawaluta kutali,

goloko wa heni nawasemwa heni.

15 Wajenzi wa kuli ng'handa ya heni nawasemwa heni,

vitumagwa wa heni wadala wangumbona kota nda mjenzi.

Kwa hewo, nandiwa munhu yohambe wamzele.

16 Ndangumchema chitumagwa wa heni ila halingwidichila,

hanga ndangumdedeza ng'hatu.

17 Nandiwa wavu kwa mche wa heni,

na izudizo kwa wang'holozangu.

18 Mbaka wana wadodo wangumbezaga,

hondichilajila wangunzomelaga.

19 Goloko wakulu wa heni wangunzudila,

wala wondiwaganile nawandajila chigosi.

20 Lukuli lwa heni nalumala, mizeje na ngozi hela ndo visigale,

namhonela hado hela hala honyajilize geng'ha.

21 Mmbonele isungu hemwe goloko wa heni,

kwa vila moko wa Nguluwi naunhowa.

22 Lekachoni mwangumbinza kota Nguluwi vyoyalingudita?

Lekachoni mwangulutilila kungaza?

23 "Wone ulonzi wa heni wahandichigwe kuli kukumbuchila,

wahandichigwe kuli chitabu,

24 hanji wahacholigwe kwa chuma

mchanya mwa italawe wahasigale mazuwa gose!

25 Ndanguvizela kota mgombozi wa heni kangikala,

naye komha heni hachi baha muisi.

26 Nding'hali mbele na lukuli lulu luwifigwe,

ndomona Nguluwi.

27 Nene baha ndoting'hana naye,

nene baha, hawele yunji, ndomona.

Lole ndaze nhumbula ya heni vyoiwele na maya ng'hatu kwa heye!

28 "Moweza kilonjela, ‘Lole vyotulingumpelemba,

kwa vila izabi lya nongwa lya mgati mwa heye,’

29 mwemwe baho mlidumbe ipanga,

kwa vila ng'halazi yochigala kutowigwa kwa ipanga,

lelo movizela kota hana utaguso."