1 "Lelo Ayubu uhulichize ulonzi wa heni,

uwiche goya makutu ga hegwe kuli chila chinhu chondilonga.

2 Ulole, ndangugubula mlomo wa heni,

ena, umyango wa heni wolonga.

3 Kulawa kuli nhumbula ya heni igoloche, ndanguvizela kota ndangulonga kukomya,

na ulonzi wa heni ndo wa kukundigwa.

4 Muhe wa Nguluwi naungongomanya,

lweselo lwa Nguluwi Yawele na Ludali lwangumha heni ukomu.

5 Wone kwanguweza, unyhidichile,

wiwiche goya kulongasa na heni.

6 Heni na hegwe ndo chinhu chimwe hali Mkulu Nguluwi,

nani kahi nangongomanywa kwa ilongo.

7 Ahyo haulinguganigwa kundumba,

ulonzi wa heni hauweza kuwa itunyo kwa hegwe.

8 "Nandikuhulika louwele ulonga,

awu ndo ulonzi wouulonjile,

9 ‘Ndahela nongwa, siditile wihe,

nandiwika kutali na gehile.

10 Ila Nguluwi kangupala nongwa kwa heni,

na kangunditila kota nda mng'honyo wa heye.

11 Kangugawoha magulu ga heni kwa minyololo,

na kuzilola ng'hatu nzila za heni zeng'ha.’

12 "Ila heni ndangukulonjela, kuli mbuli ayi hegwe kuna nongwa,

kwa vila Nguluwi ndo mkulu kusinda munhu.

13 Lekachoni kwangumng'ung'utila heye,

kwa kulonga kota homwidichila munhu?

14 Nguluwi kangulongaga na hetwe kwa nzila zilivinji,

ila haduhu munhu yalingijesa kuwala mbuli ayo.

15 Nguluwi kangulongaga na wanhu kuli mhela wa nechilo,

kuli usinjizi, howowa wolota,

16 kanguwadita wahulichize choyalingulonga,

na kuwadita wadumbe kwa makanyo ga heye,

17 leka waleche madito ga hewo gehile,

na kuwadita wewiche kutali na kidaya.

18 Kwa kudita ahyo, kangumwamilaga munhu yaleche kudumigwa,

na kumlohola kulawa kuli kubagama yang'hali msongolo.

19 "Mhela wunji Nguluwi kangumkanyaga munhu kwa kumigalila utamwa,

na usungu lukami kuli vitomo vya lukuli lwa heye,

20 naye kangwajilizaga maya ga kulya,

mbaka chilyo chinojile changumzudizaga.

21 Lukuli lwa heye lwangugandaga lukami mbaka howeza kukumbuchilwa,

na mizeje ja lukuli lwa heye jochilajila.

22 Ka habehi ng'hatu kwinjila mchilaga,

kuluta kuli isi ya wabagame.

23 Hanji mhilisi yumwe hali maelufu ga wahilisi wa Nguluwi,

koluta kumtanza munhu ayo,

kumlajila mbuli igoloche ya kudita,

24 leka yamonele isungu na kumlonjela Nguluwi,

‘Mgombole leka yaleche kwinjila kuli ikulubila,

namhata chinhu cha kulipa kwa chiwalo cha kumgombola.’

25 Ahyo lukuli lwa heye loditigwa kuwa lunyale,

kohilusilwa mong'ho wa heye wa usongolo.

26 Hamba komlanda Nguluwi na kokundigwa,

kokuya hali heye kwa kusangalala,

na Nguluwi komhilusila hachi ya heye.

27 Kosechelela hali wanhu na kolonga,

‘Nandita gehile na kwajiliza hachi,

ila Nguluwi hangazile kwa kiwhana na ago.

28 Nguluwi nakangombola leka ndeche kwinjila kuli ikulubila,

nani ndangusangalala kwa chiwalo cha lumuli.’

29 "Nguluwi kangumditilaga munhu aga geng'ha chila mhela.

30 Kangumloholaga munhu yaleche kudumigwa kuli ikulubila,

leka yalone lumuli lwa kikala.

31 "Uhulichize Ayubu, unyhulichize goya,

winyamalile, nani ndolonga.

32 Wone kuna ulonzi, unyhidichile,

ulonje, kwa vila ndangugana wavizele kwahela nongwa.

33 Ama winyamalile unyhulichize,

usindamale, nani ndikulanguse luhala."