1 Hamba Sofali, Mnaama, nakedichila,

2 "Majesa ga heni gangundita ndikwidichile,

siweza kilemeza kahi.

3 Nanyhulika ulonzi wa hegwe ulingundiga,

ila muhe wa heni wangundongoza kukwidichila.

4 "Ndikomya nakuisemwa mbuli ayi,

kota kulawa katali Nguluwi loyamlumbile munhu muisi,

5 mwihe kosechelela kusumya kwa heye kwa mhela uchefu hela,

na kusangalala kwa yula yohambe yamdumbe Nguluwi, hakulingikala mazuwa menji!

6 Hanga kidaya kwa heye kwangufikaga kilanga

na mutwi wa heye wangudolizaga ng'hungugu,

7 lukuli lwa heye logaluka kuwa misanga kota midohe ja heye yuye,

wala wawele nawali womzela wouza, ‘Ka kohi?’

8 Kokwajilila kota kulota, yaleche koneka kahi,

yaleche koneka kahi kota kulota kwa nechilo.

9 Yawele nakamona, homona kahi,

haluga ha heye hakuweza kumkumbuchila kahi.

10 Wana wa heye woganigwa kuhilusa

vinhu viwele mhaza wa hewo nayali yaholile kulawa kwa wazunwa.

11 Hanga nayali yochiwona kota nakamema mong'ho wa usongolo,

kowasa na mong'ho awo kuli nhimbwisi.

12 "Kuli mlomo wa mwihe, wihe unoga kota sukali,

kanguuvisa hasi ha umyango wa heye,

13 halingukunda kuulechela,

ila kanguuwikaga kuli mlomo wa heye.

14 Houfika mmunda mwa heye,

wanguwa dunga ing'ang'ale ya izoka mgati mwa heye.

15 Mwihe kangumelaga lufufu lwa kubunza na kuludeka,

Nguluwi kangululavyaga kulawa mmunda mwa heye.

16 Kofyoma dunga ya izoka,

kobagama kwa kulumwa na izoka.

17 Howeza kusangalala kwa chiwalo cha utambichizo kulawa kwa Nguluwi,

kota vikolola vya mafuta ga mzeituni,

ama nzanda zilingulavya hanombwa na itombo.

18 Mafuza ga chituguti cha heye kogalechelela,

howeza kugajeza,

19 kwa vila nakawadumya wazunwa na kuwaleka ne chinhu,

nakasukula ng'handa zohazenjile.

20 "Kwa vila maya ga heye gahela kuduma,

howeza kulohola choneche choyalinguchigana.

21 Nakalya chila chinhu ne kuleka choneche,

ahyo kulutilila goya kwa heye hakuweza kikala kwa mhela winji.

22 Hagati ha kulutilila goya kwa heye, nongwa yomfika,

magazo gomfika kwa mong'ho weng'ha.

23 Hoyowa yamemeze lida lya heye,

Nguluwi kolajila kuzudila kwa heye kung'hang'hale

na kumhilichila magazo.

24 Hanga kochibilima chinhu cha kitowela ngondo cha chuma,

ila msale wa shaba womhoma.

25 Msale womhoma kuli lukuli lwake na kulawila ubanzi wa keli,

kunoleche kwake kolavigwa kumgongo kwake kuno kupulika,

ukabuso wa kubagama womvaba.

26 Ng'hano za heye zowifigwa,

chiluli cha kububuwaza chomlakaza,

chinhu choneche chiwele chosigala mgati mwa ng'handa ya heye chodumigwa.

27 Ulanga wowika hazelu nongwa ya heye,

isi yomlonjeleza.

28 Lufufu lwake loholigwa

kuli zuwa lya kuzudila kwa Nguluwi.

29 Acho ndo choyalingupegwa mwihe,

chinhu chiwele Nguluwi nakamuwichila."