1 "Zahabu na sendi vyangubawigwa,

hamba vyangwelizwa.

2 Hihyo du kuli shaba na chuma.

3 Walingubawa maganga ga sendi nyinji mbaka wangulemwela kubawa hasi lukami,

wangigalaga vyenje kuli jiza totolo,

kwa chiwalo cha kupala vinhu avyo.

4 Wangubawaga mikulubila kutali na kowalingikala wanhu,

hali honhu hawele wala wawele kuli majendo hawalingufika.

Wangukola mijito kutali ng'hatu na wanhu,

woninila kudulika kuli mikulubila ajo wawele wawopigwe ng'weso.

5 Chilyo changulawa kuli misanga,

ila hasi ha misanga, walingubawa maganga ga sendi nyinji wangubwina chiluli leka kubena mitalawe.

6 Kuli mitalawe ajo hana vinhu vya lanji ya yakuti,

na nhimbwisi ya zahabu.

7 Haduhu ikungule liwele nalinjila kuli mikulubila ajo,

ne chilutema kujona.

8 Haliwele isimba ama igongolo linji ling'hang'hale,

liwele nalikola kuli nzila azo.

9 Munhu kangutula mitalawe jigagadale ng'hatu,

kanguvibawaga vidunda na kuvyusa ng'hatu.

10 Kangubawaga nyhinda kuli mitalawe,

iziho lya heye lyangonaga vinhu vya sendi nyinji.

11 Kangudinyhaga nzasa zileche kuchililika,

na kuvigala kuli lumuli vinhu vivisile.

12 "Ila kulufika luhala ndo mijito jing'ang'ale ng'hatu kusinda kuvifika vinhu avyo.

Ndaze, koweza kulona kohi?

13 Haduhu munhu yalinguuzela utanzi wa luhala,

halulingoneka kuli isi ya wawele wakomu.

14 Mgati ng'hatu mwa mazi hangulonga, ‘Luhala lwa haduhu kwa hetwe,’

nayo bahali yangulonga, ‘Haluwele kwa heni.’

15 Luhala haluweza kuguligwa kwa zahabu,

ne kwa chasi chikulu cha sendi.

16 Halulingupimigwa kwa zahabu ya Ofili,

ne maganga galingupulika ga sendi nyinji ga salidoniki,

ama kwa yakuti ya samawati.

17 Zahabu ama maganga galingupulika havilingiwhana nalo,

luna utanzi kusinda mibuli ja zahabu zinojile.

18 Luhala luna lutogo ng'hatu,

kusinda matumbawe na lulu za mbahali.

19 Maganga ga sendi nyinji galinguchemigwa topazi ga Kushi hagalingiwhanizwa nalo,

ne kuguligwa kwa chasi cha zahabu inojile.

20 "Lelo luhala lwangulawila kohi?

Kohi koulingoneka uwanzi?

21 Naluvisigwa kutali na meho ga vilumbigwe vyeng'ha vikomu,

mbaka videje vya kilanga havilinguweza kulona.

22 Kuwifya na kubagama vyangulongaga,

‘Natuhulika lizi lyake hela.’

23 "Nguluwi kanguizela nzila ya kuluta kuli luhala,

heye yaliyeka ndo yalinguvizela holulingoneka,

24 kwa vila heye kangulolaga mbaka kuli kuduma kwa isi

na kangonaga chila chinhu chiwele hasi ha ulanga.

25 Loyauditile mong'ho wa mbeho,

na kwamula kuwala mbaka ja mazi,

26 loyawichile malajizo kwa chiwalo cha nhonya,

na nzila kwa chiwalo cha lumwemwesa lwa limlungu,

27 nakamula kuluzelesa luhala na kuluwikula,

na kulutawiza kota ndo lunoga.

28 "Hamba Nguluwi nakawalonjela wanhu,

‘Mlole! Kumdumba Mkulu Nguluwi ndo luhala,

na kiwika kutali na gehile ndo kuvizela.’ "