1 "Nandita ilagano na meho ga heni

galeche kumlola mhinza kwa maya.

2 Ndaze, ndangubeteza chinhu chachi kulawa kwa Nguluwi yawele kuchanya?

Nguluwi Yawele na Ludali nakambichila chinhu chachi?

3 Ndaze, kubagama hakulinguwafika wehile

na kudumya kwa wala walingudita gehile?

4 Ndaze, Nguluwi halinguzona nzila za heni,

ne kugazela madito ga heni geng'ha?

5 "Wone nandikala kuli udesi,

ama magulu ga heni nagabilimila kuli uhadi,

6 Nguluwi yamhime kuli mizani ja hachi,

naye kovizela kota ndahela nongwa.

7 Wone magulu ga heni nagasochela nzila,

ama nhumbula ya heni nailongozwa na meho ga heni,

ama moko ga heni nagawifigwa na ukokomoche,

8 lelo wanji walye chondinyalile,

mizuchila ja heni jiwele kumgunda jing'humbuligwe.

9 "Wone nandali na maya kwa mche wa munhu,

wone nandimbeteza hali lwizi lwa yalingikalasa habehi na heni,

10 lelo mchewangu yamtelechele mlume yunji,

na walume wanji wawase naye.

11 Kwa heni kudita ahyo yahawele soni,

ena, gehile ga kutagusigwa.

12 Gehile ga heni gahawele ndo chiluli,

chiwele chahalakaze mbena za heni.

13 Wone nandema kubochela ulonjelezi kulawa kwa chitumagwa wa heni, mlume ama mdala,

loyangalile kung'ung'uta kwa heye kuwala heni,

14 lelo ndodita choni hondiwa hali Nguluwi?

Ndomwidichila ndaze hoyombuza kuwala mbuli ayo?

15 Nguluwi yawele nakangongomanya, ndo yuye yawele nakamlumba chitumagwa wa heni,

ndikomya, heye yaliyeka ndo yatulumbile hetwe tweng'ha mmunda mwa wamamo wa hetwe.

16 "Ndaze, siwapele wazunwa vinhu vyowalinguganigwa kupegwa,

ama kuwadita wadala wafililwe na walume wa hewo wajilize kitumbila kwa hewo?

17 Ndaze nandilya,

ne kihanza na walekwa?

18 Hebu! Kulawa kuli usongolo wa heni nandali ndimlola mlekwa kota vila mhaza yahaditile,

kahi nandiwalongoza wadala wafililwe na walume wa hewo.

19 Ndaze, nandimona munhu yalingugazika kwa chipute,

ama mzunwa yalihela mivalo,

20 yawele halonjile malumbo kwa heni,

kwa kumha ivuche kwa mivalo ja milaika ja ming'holo ja heni?

21 Wone nangolola moko wa heni leka kumkabusa mlekwa,

kuno ndivizela kota wakulu wa chitala wonganilila,

22 lelo moko wa heni ulawe kuli iyega lyake,

nawo ubeneche kulawa honhu hake.

23 Kwa vila nandali ndigadumba magazo kulawa kwa Nguluwi,

kwa kuudumba ukulu wa heye, siwezile kudita mbuli kota azo.

24 "Wone nandiidita zahabu kuwa ndo kitumbila kwa heni,

ama, nandiilonjela zahabu inojile, ‘Hegwe ndo kikala goya kwa heni,’

25 wone nasangalala kwa winji wa lufufu lwa heni,

ama kidayila chondilingupata kwa moko ga heni,

26 wone nandililola isanya holikwaka,

na nyelezi hoilingukola kwa kunoga kwake,

27 wone kahi nhumbula ya heni naihadigwa kuvifugamila avyo,

ama kuvitogola,

28 ago kahi gahawele gehile ga kutagusigwa

kwa vila kudita mbuli azo ndo kota kumlema Nguluwi Yawele Kuchanya.

29 "Ndaze, nasangalala kwa kudumigwa kwa mng'honyo wa heni,

ama kumseka hala loyafichigwe na magazo?

30 Siukundize mlomo wa heni ulonje gehile,

kwa kulanda upanjilo ufiche kuli kikala kwa heye.

31 Vitumagwa wa heni weng'ha wanguvizela hazelu,

kota mhela weng'ha nandali ndiwabochela wajenzi.

32 Haduhu mjenzi yawele nakawasa hanze,

kwa vila lwizi lwa heni nalwali mwanzi kwa yalingukola mnzila.

33 Ndaze, navisa gehile ga heni kota wanhu wanji vyowalingudita,

ama nandema kulonga gehile ga heni?

34 Sidumbile kwima na kulonga hali ikugusi lya wanhu,

sinyamalile ama kihindila mgati,

kwa kudumba kukabuswa kwa kubeza kwa hewo.

35 Lekachoni Nguluwi Yawele na Ludali,

halingunyhulichiza na kunyhidichila?

Wone Nguluwi yahawele na ulonjelezi kuwala heni,

mleche yalonje ama kwandika kuwala nongwa ya heni!

36 Ndikomya, ndahaipichile mmayega,

ama ndahaivalile kumutwi kota itaji leka chila munhu yayone.

37 Ndahamlonjele Nguluwi chila chinhu chonditile,

kwa kudita ahyo, ndahalutile kwa heye kota mwana wa mndewa.

38 Wone nanyhola mgunda kwa lupichi,

kulawa kwa yawele na mgunda awo,

39 na wone nandilya mbena za mgunda awo ne kulipa,

na kwambuza kubagama kwa yawele na mgunda awo kwa nzala,

40 lelo miwa jote amo honhu ha ngano,

na migugu honhu ha shayili."

Kuduma kwa ulonzi wa Ayubu.