1 Mkulu Nguluwi nakalutilila kumlonjela Ayubu,

2 "Ndaze, hegwe ulingulola nongwa kochitwanza na Nguluwi Yawele na Ludali?

Ulingung'ung'uta kwa chiwalo cha Nguluwi lelo widichile!"

3 Aho Ayubu nakamwidichila Mkulu Nguluwi, yolonga,

4 "Heni siwele chinhu, silinguweza kwidichila chinhu choneche hali hegwe,

ndanguuwika moko wa heni kuli mlomo wa heni.

5 Nanjeza kulonga ila silonga kahi,

ena nang'hangaza kulonga ila silutilila kulonga kahi."

6 Mkulu Nguluwi nakamwidichila Ayubu kulawa kuli chivuluvumbi, nakalonga,

7 "Wiwiche goya kuhulichiza gwa Ayubu,

ndokuuza nagwe kwanguganigwa unyhidichile.

8 Ndaze, kwangujeza kilajila kota kwahela nongwa,

kwa kung'ung'utila heni kota siditile hachi?

9 Ndaze, kuna mong'ho kota heni?

Ndaze, koweza kulavya lizi lya kubuma kota lya heni?

10 Lelo, wilajile kota kuna kuhulichiza na ukulu,

winolije kwa lutogo na ukulu.

11 Ulajile kuzudila kwa hegwe kukulu,

umpale chila yawele na ujuvi na kumgwisa.

12 Umlole chila yalingidaya na kumdulisa,

uwahondange wehile honhu howawele.

13 Uwatile weng'ha mnhimbwisi,

uwahiliche kuli isi ya wabagame.

14 Aho ndo nene baha ndokutogola,

na kulonga kota mong'ho wa hegwe woweza kukulohola.

15 "Ulilole igongolo likulu lilinguchemigwa Behemoti,

lyondililumbile kota vyondikulumbile hegwe.

Igongolo alyo lyangulyaga misolo kota isenga,

16 ila lukuli lwake luna mong'ho lukami,

na midanha ja lida lyake ja nzinzili.

17 Mchila wake wangiwhana kota igodi lya mwelezi,

midanha ja mahaza gake ja nzinzili.

18 Mizeje jake ja nzinzili kota mibomba ja shaba,

vitomo vyake ndo kota fito za chuma.

19 Alyo ndo liwele na mong'ho lukami kusinda vilumbigwe vya heni vyeng'ha!

Yalilumbile yaliyeka ndo yalinguweza kulisumya.

20 Vidunda vyangulavyaga chilyo chake,

najo migongolo jeng'ha ja kisolo jangudawalaga habehi na alyo.

21 Lyanguwasaga hali visosolo vya miwa,

honhu hake ha kivisa ndo kuli misolo ja ilamba.

22 Avyo visosolo vya miwa na migodi jiwele najota kuli vikolola,

jangumha honhu ha kikala kwa lubehelo lwake.

23 Mhela lwanda loumema lukami, alyo halilingudumba,

halilingutinhuka hanga lwanda lwa Yolodani lomema ng'hatu.

24 Ndaze, whaani yoweza kulibata alyo kuno liwele meho,

ama kuligwiliza kwa idiwa na kutubula mhenyelo yake?