1 Hamba Bilidadi, Mshuhi, nakamwidichila Ayubu,

2 "Kolonga mbuli azi mbaka nili?

Mbaka nili ulonzi wa hegwe wowa wa hihi hela kota mbeho?

3 Ndaze, Nguluwi kangwajilizaga utaguso?

Ndaze, Nguluwi Yawele na Ludali kangwajilizaga hachi?

4 Wana wa hegwe lowaditile gehile,

nakawapa magazo kwa chiwalo cha gehile ga hewo.

5 Wone kompala Nguluwi,

na kumdedeza Nguluwi Yawele na Ludali,

6 na wone kahi kwahela nongwa na nakugoloka,

ndangukomya, Nguluwi kokuya kwa hegwe kukutanza,

kokudita kikala kwa hegwe kwa hachi kulutilile goya.

7 Hanga mwaluko wa hegwe nawali ng'hochele,

ila kuduma kwa hegwe kowa kunojile ng'hatu.

8 Dedede wilanguse kwa wala watulongole,

leka wone wasekulu wa hewo nawelangusa choni,

9 kwa vila hetwe natupondigwa mhela wuwu hela, hatuvizelele choneche,

nago mazuwa ga hetwe kuli isi ndo kota lubehelo hela.

10 Kwa vila hewo wokulangusa na kukulonjela,

mbuli zilingulawa kuli uwanzi wa hewo.

11 Ndaze minyi joweza kota honhu halihela nzasa?

Midete joweza kukula goya ne mazi?

12 Wone mazi gakale,

hanga jowa jing'hali kukangala,

jangukalaga himahima kusinda misolo jinji.

13 Aku ndo vyokuwa kuduma kwa weng'ha walingumsemwa Nguluwi,

hihyo du, kitumbila kwa wala wohambe wamkunde Nguluwi kodumigwa.

14 Kitumbila kwa hewo kwangubenekanga,

ndo kota utandawala wa ibui.

15 Wanguwegamila utandawala wa hewo, ila hambe wime,

wanguubatililaga ila haulingikala kwa mhela winji.

16 Wohambe wamkunde Nguluwi ndo kota migodi,

jiwele najitowelwa goya na nhonya kuli mhela wa chipalangule,

jokweneza mizuchila jake kuli kagunda keng'ha.

17 Mizabi jake jangipetela ng'hatu kuli maganga

na kuli chila italawe.

18 Ila wone jing'humbuligwe kulawa honhu hake,

janguwa jilihela honhu ha kikala.

19 Lole, ako ndo kuduma kwa migodi ajo,

na honhu hake jozuka migodi jinji.

Yowa kota ahyo kahi kwa wanhu wohambe wamkunde Nguluwi.

20 "Lole! Nguluwi homlema munhu yali hela nongwa,

kahi howatanza wehile.

21 Ila koumemeza mlomo wa hegwe kusechelela,

mlomo wa hegwe lizi lya usangalalo.

22 Wala walingukuzudila wobasigwa soni,

najo mihema ja wehile hajiwa baho kahi."