1 Hamba Elifasi, Mtemani, nakedichila,

2 "Ndaze, munhu kangutanza chinhu kwa Nguluwi?

Ndaze, mbaka munhu yawele na luhala koweza kuwa na utanzi kwa heye?

3 Ndaze, kwangijesa kota kwangumdita Nguluwi Yawele na Ludali yasangalale kwa vila nakugoloka,

ama kangupata mzidi whachi wone hegwe kowa kwahela nongwa?

4 Kwangijesa kota kangukung'hanhuchila na kukugaza,

kwa vila hegwe kwangumhulichiza heye?

5 Hebu! Wihe wa hegwe ndo ukulu ng'hatu!

Gehile ga hegwe gahela kuduma.

6 Nakuhola nguwo ya mng'holozo ya lehani,

nakumvula ivalo lya heye na kumleka yawele mwanzi.

7 Huwapele mazi wala wawele watochile,

ne chilyo wala wawele na nzala.

8 Hanga nawali na mong'ho, nakuihola isi,

munhu uwele nawali uhulichizwa, nawikala amo,

9 nakuwaleka wafililwe na walume wa hewo walute moko yeka,

nakuwabunza walekwa.

10 Ahyo midiwa najikuzunguluta banzi zeng'ha,

ukabuso naukuvaba baho du.

11 Acho ndo chiwalo cha jiza kukufika leka uleche kona chinhu choneche,

na mazi tendema kukugubika.

12 Nguluwi kangikala kilanga,

kusinda nhondwe ziwele kuchanya ng'hatu,

kuwele kangona chila chinhu.

13 Ila hegwe kwangulonga, ‘Nguluwi kanguvizela choni?

Ndaze, koweza kufyela hali ng'hungugu kulavya utaguso?

14 Ng'hungugu ng'hulu nazimzunguluta halinguchona chondilingudita,

heye kangujendaga kuuzunguluta ulanga wa isi!’

15 "Ndaze, nakwamula kuwinza nzila za katali

ziwele wanhu wehile nawali woziwinza?

16 Hewo nawosigwa kuno mhela wa hewo ung'hali kufika,

misisi jawo najiholigwa na mazi tendema.

17 Hewo ndo wawele nawamlonjela Nguluwi, ‘Utuleche!

Hegwe Nguluwi Uwele na Ludali koweza kudita choni hali hetwe?’

18 Ila Nguluwi ndo yamemeze vinhu vinojile kuli ng'handa za hewo,

ahyo ndangiwika kutali na kiwika goya kwa wehile.

19 Wawele na hachi wangona kudumigwa kwa wehile, wangusangalala,

walihela nongwa wanguwasekaga na kuwabeza,

20 wangulongaga ‘Kukomya, wang'honyo wa hetwe nawadumigwa,

chila chowalechile nachilakazwa kwa chiluli.’

21 "Ayubu, wihanyise na Nguluwi leka uwe na kikala goya,

na mbuli za hegwe zolutilila goya.

22 Ubochele malanguso kulawa kwa heye,

na uwiche ulonzi wa heye mnhumbula mwa hegwe.

23 Wone komhiluchila Nguluwi Yawele na Ludali, koditigwa uwe unyale kahi,

wone kowusa wihe leka uwe kutali na haluga ha hegwe,

24 wone kotoza kutali lufufu lwa hegwe,

zahabu ya Ofili hafungo ha lwanda,

25 hamba Nguluwi Yawele na Ludali kowa ndo zahabu ya hegwe,

na sendi ya hegwe inojile,

26 ndikomya, nagwe kosangalala kwa chiwalo cha Nguluwi Yawele na Ludali,

na kumhejelela Nguluwi ne soni,

27 komlanda naye kokuhulichiza,

nagwe kokweneza kulagana kwa hegwe.

28 Choneche choukwamula cholutilila goya,

lumuli lolangazila nzila za hegwe.

29 Kwa vila Nguluwi kanguwadulisaga walingidaya,

ila kanguwaloholaga walingunyenyetela.

30 Heye kangumloholaga munhu yalihela nongwa,

ena, hegwe koloholigwa wone kowa na madito ganojile."