1 "Munhu yawele nakapondigwa na mdala

mazuwa ga heye ga kikala ndo mado hela nago nagamema magazo.

2 Kangubahulaga kota uluwa hamba kanguswinaga,

kangwajililaga hima hima kota isisila.

3 Gwa Nguluwi, lekachoni kwangijesa kundola,

na kwaluka kunhagusa?

4 Whaani yalinguweza kulavya chinhu chelile kulawa kuli chinhu chikokomoche?

Haduhu yawele koweza.

5 Mazuwa ga kikala kwa munhu gana kuduma,

gwa, Nguluwi nakujiwaza myezi jake,

halinguweza kikala mzidi wa aho.

6 Ahyo umleche leka yasangalale kuli mazuwa ga heye,

kota yalingupegwa mijito chila zuwa.

7 Kwa baho kitumbila kuli igodi liwele nalitemigwa, kota lyokota,

na mizuchila jake jinyale jolutilila kukula.

8 Hanga mizabi jake jolala kuli misanga,

chibichi chake chokwajilila kuli misanga,

9 ila wone hawe na ulajilo wa mazi lyozuka,

lyolavya mizuchila kota igodi lilingwaluka kukula.

10 Ila munhu kangubagamaga na ako ndo kuduma kwa heye.

Wone muhe ulawe kwa heye, kana choni kahi?

11 Kota vila mazi vyogalingukala kuli ilamba,

na mazi kuleka kuchililika kuli lwanda,

12 ndo vyoyalingubagama munhu, halingulilimka kahi,

mbaka ulanga houwa haduhu,

hokwinuka kahi ne kutinhuka,

haduhu munhu yawele koweza kumwinula.

13 "Fola wahavisile heni kuli isi ya wabagame,

mbaka ng'halazi ya hegwe ihole,

hamba, kuli mhela wa hegwe wahang'humbuchile.

14 Ndaze, wone munhu yabagame koweza kikala kahi?

Wone ndo ahyo, ndahawele na kitumbila kuli kikala kwa heni kweng'ha kwa magazo,

na ndahabeteze kwa maya ng'hatu kuloholigwa kulawa kuli kubagama.

15 Aho wahanyemile, nani ndahakwidichidile,

nagwe wahanojezwe na heni chilumbigwe cha hegwe.

16 Ndikomya, wahaziwinzile nzayo za heni,

ila haiwele kugalola gehile ga heni.

17 Nongwa za heni wahazihindile kuli chihako,

nagwe wahaugubiche wihe wa heni.

18 "Kota vidunda vyovilingugwa

na mitalawe vyojilingulawa kuli honhu hake,

19 kota mazi vyogalingudita maganga gamale,

mazi tendema vyogalinguhola misanga,

ndo nagwe vyoulinguwifya kitumbila kwa wanhu.

20 Kwangumgwisa munhu, naye kangwajililaga mazuwa gose.

Kwangukugalula kumeho kwa heye na kumtajila kutali.

21 Wone wana wa heye wapegwe lutogo, halinguvizela,

wone wobezigwa, halingulola.

22 Kanguwaga na usungu wa lukuli lwa heye yuye,

na kangulombochezaga kwa chiwalo cha heye yuye hela."