1 Zuwa liyage wahilisi wa Nguluwi nawaluta hali Mkulu Nguluwi, Limazoga nalyo nalyali hamwe na hewo. 2 Mkulu Nguluwi nakaliuza Limazoga, "Nakulawa kohi?" Limazoga nalimwidichila Mkulu Nguluwi, "Ndangulawa kuzunguluta kuli isi yeng'ha ndijendajenda aku na kula." 3 Mkulu Nguluwi nakalilonjela Limazoga, "Ndaze, nakumona chitumagwa wa heni Ayubu? Kuli isi yeng'ha haduhu yunji yawele kota heye. Heye ndo munhu yalihela nongwa na yawele na hachi na yalingundumba na yalingiwika kutali na gehile. Kangulutilila na kukundigwa kwa heye, hanga nakundedeza ndimuwifye ne chiwalo." 4 Limazoga nalimwidichila Mkulu Nguluwi, "Kangulutilila na kukundigwa kwa vila nakulutambichiza lukuli lwa heye! Munhu kangulavyaga chila chinhu choyawele nacho leka yalohole ukomu wa heye. 5 Lelo ugolole moko wa hegwe leka utowe lukuli lwa heye na mizeje ja heye, ndangukomya kokuliga."

6 Mkulu Nguluwi nakalilonjela Limazoga, "Ena, koweza kumditila choneche choulingugana, ila uleche kumkopola." 7 Ahyo Limazoga nalyuka hali Mkulu Nguluwi, nalyo nalimgaza Ayubu kwa mipu jihile kuli lukuli lweng'ha kulawa kuli uzayo mbaka kumutwi. 8 Ayubu nakekalisa kuli mivu kwa chiwalo cha kulombocheza, hamba nakahola igaye na kizada kwa alyo igaye. 9 Mchewake nakamlonjela, "Ndaze, kwangulutilila kibatilila kukundigwa kwa hegwe? Umlige Nguluwi, ubagame!"

10 Ayubu nakamwidichila mchewake, "Kwangulonga kota vyoyawele mdala mpoka. Ndaze, tubochele ganojile hela kulawa kwa Nguluwi, tuleche kubochela gehile?" Kuli mbuli azo zeng'ha Ayubu haditile gehile kuli kulonga kwa heye.

11 Goloko wadatu wa Ayubu wawele ndo Elifasi, Mtemani na Bilidadi, Mshuhi na Sofali, Mnaama, nawahulika kuwala magazo geng'ha gawele nagamfika Ayubu. Lelo nawamula kulawa kuli ng'handa za hewo na kuluta kwa Ayubu leka kumkangaza nhumbula. 12 Lowamuwene kwa kutali nawalemwela kumzela kota ndo Ayubu. Lelo, nawaluka kulila kwa lizi likulu na kudadula mivalo ja hewo na kuwika nhimbwisi kuli vitwi vya hewo kwa masinzo. 13 Hamba nawekalisa hamwe na Ayubu kuli misanga kwa mazuwa saba. Haduhu yoneche hali hewo yawele nakalongasa na Ayubu, kwa vila nawagona magazo ga heye vyogawele makulu ng'hatu.