1 Ayubu nakalutilila kulonga,

2 "Ndangilaha kwa Nguluwi yawele mkomu,

yayusile hachi ya heni,

Nguluwi Yawele na Ludali yaiditile nhumbula ya heni iwe na usungu!

3 Kwa mhela weng'ha hondiwa mkomu,

nalo lweselo lwa Nguluwi holuwa mgati mwa heni,

4 mlomo wa heni haulavya ulonzi wa udesi,

ne umyango wa heni kulonga uhadi.

5 Siweza kukunda kota hemwe mwangulonga kukomya,

mbaka hondibagama ndolutilila kulonga kota siditile nongwa yoneche.

6 Ndanguvizela kota nandita mbuli zitanganiche ne kuleka,

kuli ukomu wa heni, nhumbula ya heni hailingunhagusa.

7 "Weng'ha walingitwanza na heni wawazigwe kota wehile,

wang'honyo wa heni wagazigwe kota wawele na gehile.

8 Yohambe yamdumbe Nguluwi kangitumbila choni,

mhela Nguluwi hoyomdumya,

hoyokusa ukomu wa heye?

9 Ndaze, hoyofichigwa na magazo,

Nguluwi kohulika chililo cha heye?

10 Ndaze, mwihe koweza kusangalala hali Nguluwi Yawele na Ludali,

na kulutilila kumlanda Nguluwi chila mhela?

11 Ndowalangusa kuwala mong'ho wa Nguluwi,

siwavisa kuwala mbuli za Nguluwi Yawele na Ludali.

12 Ila hemwe mwanguizela goya ng'hatu mbuli ayo!

Lekachoni lelo mwangulutilila kulonga upoka?

13 "Achi ndo chinhu chiwele Nguluwi nakachiwika kwa chiwalo cha mwihe,

uhalizi uwele yalingubunza koubochela kulawa kwa Nguluwi Yawele na Ludali ndo awu,

14 hanga wana wa heye wowa wenji lukami, ila wobagama kwa ipanga,

walelwa wa heye hawowa na chilyo cha kuhega.

15 Walelwa wawele wosigala, wobagama kwa matamwa,

nawo wadala wa hewo hawowalombochezela.

16 Hoyokungajiza sendi kota nhimbwisi,

na mivalo kota vilundo vya ilongo,

17 mleche yewichile, ila yawele na hachi kojivala,

na sendi za heye, walihela nongwa wochigawila.

18 Ng'handa yalinguzenga mwihe ndo kota utandawala wa ibui,

kota chibumuli cha mwamizi kumgunda.

19 Heye kanguwasaga yawele na lufufu,

hoyokwinuka, lufufu lwa heye lwangwajililaga!

20 Ukabuso wangumfikaga kota mazi tendema,

nechilo kangufichigwa na chivuluvumbi.

21 Mbeho ya kolilawilaga isanya yangumholaga, naye kangwajililaga,

yangumnyasulaga kulawa haluga hake.

22 Mbeho ayo yangumvabaga ne isungu,

hoyojeza kubilima.

23 Mbeho yomtunya kwa lizi lyake,

na kumkabusa kulawa honhu hake.