1 "Ago geng'ha nandigona kwa meho ga heni,

nandigahulika kwa makutu ga heni na kugazela.

2 Geng'ha gomgazelele, nani ndangugazela,

siwele na nyhala ndodo kusinda hemwe.

3 Ndina maya ng'hatu ga kulongasa na Nguluwi Yawele na Ludali,

ndangugana kilewela hali Nguluwi.

4 Ila hemwe mwangulonga udesi,

mweng'ha ndo kota wateleka mikwandi wohambe mtanze chinhu.

5 Fola mwahanyamalile,

alyo lyahawele ndo luhala kwa hemwe!

6 Mhulichize lelo ulonzi wa heni,

mnyhulichize hondichilewela.

7 Ndaze, mwangijesa kota mwangumkolela mijito Nguluwi kwa kulonga udesi?

Mwangijesa kota uhadi wangumnojeza heye?

8 Ndaze, mwangujeza kumganilila Nguluwi?

Ndaze, momlewela Nguluwi hoyowa kuli chitala?

9 Ndaze, wone kowapugajiza hemwe, hamfichigwa na nongwa yoneche?

Ama mwangijesa kota moweza kumhada Nguluwi kota vyomlingudita kwa wanhu?

10 Ndangukomya, kowang'hanuchila,

wone molajila uganililo kwa uviso.

11 Ndaze, ukulu wa heye haulinguwakabusa hemwe?

Ndaze, hamlingudumba kwa chiwalo cha heye?

12 Ulonzi wa hemwe haulingutanza chinhu,

kilewela kwa hemwe ndo kota ngome za misanga.

13 "Mnyamalile, leka nani ndonje,

gawele gofika kwa heni, leka gafiche.

14 Nda goya kwimilila chinhu choneche,

mbaka kubagama.

15 Hanga kong'hopola ila nding'hali ndangitumbila kwa heye,

ndikomya, ndochilewela hali heye.

16 Ena, ali lyowa ulohozi wa heni,

kwa vila haduhu munhu yohambe yamdumbe Nguluwi,

yawele koweza kuluta hali heye!

17 Mhulichize goya ulonzi wa heni,

nago makutu ga hemwe gabochele chila chondilingulonga.

18 Lelo nda goya kilewela kuli chitala,

ndangukomya, ndahela nongwa.

19 Ndaze, hana yoneche yalinguweza kigala ulonjelezi kuwala heni?

Wone yowa ahyo, ndonyamalila leka mbagame.

20 "Gwa, Nguluwi wa heni, ndangukulanda mbuli azi mbili,

nani sivisa hali hegwe.

21 Wuse tandi moko wa hegwe ulingunhowa,

na uleche kung'habusa.

22 Waluche kulonga nani ndokwidichila,

ama heni nyaluche nagwe widichile.

23 Nandita gehile galinga na nongwa zilinga?

Nzelese nongwa na gehile ga heni.

24 Lekachoni hulingugana kungalamchila?

Lekachoni kwangunditila kota mng'honyo wa hegwe?

25 Lekachoni kwangung'habusa heni ihamba likalile,

na kumbilimisa heni kota mhumba ilinguwembeluswa na mbeho?

26 Nakulavya ulonjelezi ung'ang'ale kuwala heni,

na kundita ndipiche gehile ga usongolo wa heni.

27 Kwanguwoha magulu ga heni kwa minyololo,

kwangukulolela kujenda kwa heni kweng'ha,

nzayo za heni nakuziwichila kuduma.

28 Nani ndangumala kota igodi lyolile,

kota ivalo lidakuligwe na fukuzi."