1 Ayubu nakedichila,

2 "Kwa vila nanyhulika mbuli nyinji kota azo,

hemwe mwanguhembuliza heni kwa kungaza!

3 Ndaze, winji wa ulonzi wa hemwe wohambe utanze chinhu wahela kuduma?

Mna choni hemwe mbaka mlutilile kitwanza kwa ulonzi?

4 Heni ndahawezile kulonga kota hemwe,

wone mwahawele kota vyombele,

ndahawezile kudamla goya hali hemwe,

na kulonga ulonzi wa kubeza kwa hemwe.

5 Ndahawezile kuwakangaza nhumbula kwa ulonzi wa heni,

ulonzi wa heni wa kuhembuliza wahawaditile hemwe msindamale.

6 "Wone ndonje, usungu wa heni haulingusindamala,

wone nyhamalile, haulinguka.

7 Ndikomya, Nguluwi nakambifya,

nakalidumya ivyazi lya heni lyeng'ha.

8 Nakandita swinhe, awo ndo ulolezi kota nandita gehile,

wanhu wangijesa kota kuganda kwa heni kwangwambuzwa na nongwa ya heni.

9 Nguluwi nakanhowa na kundumiza kwa ng'halazi ya heye,

kangujejeda mizino ja heye kwa chiwalo cha heni,

mng'honyo wa heni kangundola kwa kuzudila ng'hatu.

10 Wanhu wangumbeza heni na kuseka,

vilundo kwa vilundo wangunzunguluta,

wangunzabula mizeze.

11 Nguluwi nakambika mmoko mwa wajuvi,

na kunhoza mmoko mwa wehile.

12 Mbuli zeng'ha nazali goya, ila nakambenanga,

nakandinya singo na kumhonda.

Nakandita ndiwe honhu ha kutowa misale ja heye,

13 watoza misale wa heye wangunzunguluta heni.

Ne isungu, wanguhoma figo za heni,

na kubohola nhungwi ya heni mchanya mwa isi.

14 Kangumbenaga na kunhowa chila mhela,

kangunhowaga kota vyoyalingudita yazidahe kitowa ngondo.

15 "Nandihonela ivalo lya igunila hali lukuli lwa heni kwa masinzo,

ndangikala kuli nhimbwisi kota munhu yawele nakasumigwa ng'hatu.

16 Kumeho kwa heni nakuwa kudung'hu kwa kulila,

meho ga heni gana jiza ng'hatu,

17 ila moko ga heni hagaditile ujuvi,

na kulanda kwa heni kwa goya.

18 "Gwa isi, uleche kuigubika danda ya heni iwele naibohoka,

kulila kwa heni kwenele chila honhu.

19 Ndikomya, ndina mlolezi kilanga,

wa kundewela ka kuchanya.

20 Goloko wa heni wangumbeza,

ndangulavya mahozi kumlanda Nguluwi.

21 Fola munhu yahandewele hali Nguluwi,

kota munhu vyoyalingumlewela goloko wa heye.

22 Ena, miyaka ja heni ndo michefu hela,

nani ndoluta ako kuwele siweza kuhiluka."