1 Ndangumlilila Mkulu Nguluwi kwa lizi,

ndangumdedeza Mkulu Nguluwi kwa lizi, leka yambonele isungu.

2 Ndangumuwichila kung'ung'uta kwa heni,

ndangumlonjela magazo ga heni.

3 Hondiwa habehi kugozola,

hegwe kwa baho, kwangunzela vyombele.

Wang'honyo wa heni nawambichila midiwa kuli nzila ya heni.

4 Hondilola ubanzi wa kudilo na kubeteza,

ndangona haduhu munhu wa kunhanza,

ndahela kahi honhu ha kubilimila,

haduhu munhu yalingijesa kwa chiwalo cha heni.

5 Gwa Mkulu Nguluwi, ndangukulilila.

Hegwe ndo honhu ha heni ha kubilimila,

hegwe ndo chila chinhu kwa heni kuli isi ya wawele wakomu.

6 Uhulichize chililo cha heni, kwa vila nhoka lukami.

Undohole kulawa kwa walingungaza, kwa vila wana mong'ho kusinda heni.

7 Undavye amu mchinweng'ho

leka ndonje malumbo kwa hegwe.

Wanhu watanganiche wochilumba na heni

kwa vila nakunditila ganojile menji.