1 Lekachoni kwangivuna kwa wihe wa hegwe, gwa mkulu?

Igano lya kwimilila lya Nguluwi lyangikala mazuwa gose.

2 Gwa mhadi, chila mhela kwanguwika goya kudumya,

umyango wa hegwe ndo kota nzembe.

3 Hegwe kwangugana wihe kusinda kunoga,

kwangugana udesi kusinda kulonga kukomya.

4 Gwa mhadi mkulu,

kwangugana mbuli za kuwadumya wanji.

5 Ahyo Nguluwi kokudumya mazuwa gose,

kokunyasula na kukusa kaye kwa hegwe,

kokung'umbula kuli isi ya wawele wakomu.

6 Watanganiche wogona ago na kudumba,

hamba wokuseka na kulonga,

7 "Mlole gamfichile munhu ayu.

Heye nahaganile Nguluwi yawe honhu ha heye ha kubilimila,

ila nayali yochitumbila winji wa lufufu lwa heye,

yochitumbila vinhu vyoyaholile kulawa kwa wanji."

8 Ila heni ndo kota igodi idodi lya mzeituni,

lilingudedemka kuli ng'handa ya Nguluwi.

Ndangitumbila igano lya heye lya kwimilila mazuwa gose.

9 Gwa Nguluwi ndokulonjela malumbo mazuwa gose,

kwa chiwalo cha mbuli zouditile.

Ndowikula kota hegwe ndo unojile,

hali wanhu wa kukundigwa.