1 Gwa Mkulu Nguluwi, Mkulu wa hetwe,

ndikomya itagwa lyako lyangutogoligwa kuli isi yeng'ha.

Nakuuwika ukulu wa hegwe ako mchanya mwa ulanga.

2 Kwa kutogoligwa na wana wadodo na walingong'a,

nakiwichila ngome ya kiyamila kwa chiwalo cha wang'honyo wa hegwe,

uwadumye walingukubelenhuka na yalinguhilusa chibida.

3 Hondilola ulanga, mijito ja vidole vya hegwe,

nyelezi na nhondwe, vyouviwichile ako,

4 munhu ka whaani, mbaka umjese,

munhu ndo choni mbaka umlolele?

5 Nakumdita yawe mdodo kusinda Nguluwi,

nakumha itaji lya ukulu na kuhulichizwa.

6 Nakumdita heye yawe chilongozi kuli mijito ja hegwe jeng'ha,

nakuviwika vilumbigwe vyeng'ha hali ludali lwa heye.

7 Ming'holo na misenga na migongolo ja kisolo,

8 videje na somba,

ena chila chilingojelela kuli nzila za bahali,

vyeng'ha nakuviwika kuli ludali lwa heye.

9 Gwa Mkulu Nguluwi, Mkulu wa hetwe,

ndikomya itagwa lya hegwe lyangutogoligwa kuli isi yeng'ha.