1 Bɩnɛ Tiyofilosi, bakpa fɔɩ n mʋ jaga ba wʋsɛ dʋɔ sabɩɛ wɩɛ ŋii ŋɩ kɔŋ tɩba daa tɩba na si. 2 Ba sabɩɛ wɩɛ ŋii Yesu kpalɛnara baa tɩŋtɩŋ chɩŋkpɩɛ mʋ ba asa na, na baa ba yɩɛ wɩɛ ŋii tʋmɩra ŋii Yesu yɩɛ saŋa gaa wʋ wɩɛ daa jaŋ na, lɩɩ saŋa gaa wʋ fara wʋ dɩtʋm na. 3 Dɩmʋŋ dʋɔ, ma tɩŋtɩŋ ma kɩɛ bʋrʋkʋma naŋ na dieli lɩɩ dɩ faratɩŋ, dɩmʋŋ dʋɔ dɩdaga na maŋ gba maa sabɩɛ wɩɛ ŋii dɔŋa dʋɔ ganaŋkʋ ŋɩ wɩɛ dieli na fa nyaŋ, 4 na nyaa jiŋ gʋ wɩɛ ŋii ba kalaa nyaŋ na kpiniŋ yɩɛ gasiŋteŋ.

5 Yudatina Juo Hɛrɔdɩ saŋa na, Ɩsʋɔ sei wʋrʋ cha wʋ wɩɛ baa yagɛ ɩ sɛ Sakariya. Wʋ cha kpi Abiya seina dikpeŋ gaa dʋɔ. Wʋ alʋ cha wʋ yɩɛ Elisabeti wʋŋ wʋ yɩɛ Ɩsʋɔ sei Arɔŋ ganana bie bɛ. 6 Sakariya na wʋ alʋ Elisabeti ba chirigi Ɩsʋɔ asanaŋ. Baa kpaŋ Ɩsʋɔ mbara na wʋ wɩɛ apɔgʋsa dʋɔ na dieli. 7 Ba ŋmɛ fɔɩ ama ba n lʋrʋ bachaasɛ ɛ. Akala takɩɛ Elisabeti yɩɛ alʋ pamkpaŋtɛ bɛ.

8 Wɩɩ darɛ Sakariya a tʋm Ɩsʋɔ tʋm danɛ naŋ, akala takɩɛ dɩ tala seina dikpeŋ gaa wʋ kpi ga dʋɔ na tʋm saŋa. 9 Ba lɔ mbi lɩsɛ ɩ ganaŋkʋ Ɩsʋɔ seina ayɩɛsa akala sɛ wʋ n ju Ɩsʋɔ tʋm danɛ naŋ ga tʋʋ tii galifeŋsa. 10 Saŋa gaa wʋ a tʋʋ ɩnsɛnsɩ Ɩsʋɔ tʋm danɛ gaa naŋ na, yela bakapa wɩɛ asʋŋ baa jɔ dɩga.

11 Dɩmaŋ sɛ Ɩsʋɔ gabʋɔ lɩsɛ wʋ wʋsɛ kalaa ɩ yela wʋ sɩmɩɛɩ gadiesa dɩgbɩŋgbɩŋ gaa baa tʋʋ ɩnsɛnsɩ ga dʋɔ na jɩsaŋ dʋɔ. 12 Gʋ Sakariya na ɩ na, wʋ digela karɛ ɩ sɛ nyɩŋtɩɛ chaŋ ɩ 13 Ama Ɩsʋɔ gabʋɔ wʋŋ tawɩ ɩ sɛ, <<Sakariya, n baa yela nyɩŋtɩɛ a chaŋ nyaŋ. Akala takɩɛ Ɩsʋɔ nyii n dɩga. Nya alʋ Elisabeti aja lʋrʋ bu baalɛ fa nyaŋ na nyaa yagɛ ɩ sɛ Yohane. 14 Wʋ a yela nyaa yu asadi galaŋ, sɛ bakpa fɔɩ gba aja yu asadi wʋ lʋrʋ dʋɔ. 15 Akala takɩɛ wʋ a yɩɛ wʋkpa janɛ Ɩsʋɔ asanaŋ. Ŋɩ n tiri sɛ wʋ n nyʋɔ wayɩŋ sʋlʋŋ yaa sʋlʋŋ adoŋtina a. Ɩsʋɔ Feliŋ aja su wʋ tɩba pɔɩ na baa lʋrʋ ɩ. 16 Wʋ a yela Isiralitina fɔɩ aja bɔrɛ kɔŋ ba Ɩsʋɔ jaŋ. 17 Wʋ a pala Kpaŋjuo asanaŋ Ɩsʋɔ feliŋ na Ɩsʋɔ ɔja Eliya yikuo naŋ, na wʋ a biliŋi juo aba asa kɔŋ ba bie dʋɔ na wʋ a yela dɩlɛ naŋ doŋtina a gaa yɩɛ kpiŋjimtina takɩɛ ba chirigisa, na wʋ a desina bakpa daa Kpaŋjuo.>>

18 Sɛ sei Sakariya tasɛ Ɩsʋɔ gabʋɔ wʋŋ sɛ, <<Be aaŋ ja yela na maa lɩɛdi sɛ ŋina yɩɛ gasiŋteŋ? Akala takɩɛ maŋ na ma alʋ kpiniŋ dɩ ŋmɛ.>>

19 Sɛ gabʋɔ wʋŋ lɩsɛ nʋɔ sɛ, <<Maŋ n nyina Gabireli wʋŋ ma sɩmɩɛɩ Ɩsʋɔ asanaŋ, sɛ wʋ kpiri maŋ sɛ ma n gaa tawɩ wɩɛ abama ŋina fa nyaŋ. 20 Gʋ nya n lɩɛ ma wɩɛ ŋii ŋii kɔŋ ŋɩ saŋa gabam naŋ di na dʋɔ ɔ, dɩtɩɛna nyaa yɩɛ namu ga tala wɩɩ gaa dɩmʋŋ wɩɛ ŋina aja kɔŋ tɩba.>>

21 Saŋa gana naŋ na, bakpa baa dana Sakariya yela baa yɩyɩɛ bʋrʋ gaa ga yɩɛ sɛ wʋ taŋgɩlɛ Ɩsʋɔ tʋm danɛ naŋ na. 22 Saŋa gaa wʋ lɩɩ Ɩsʋɔ tʋm danɛ gaa naŋ na, wʋ aa ti dɩlɛ wʋ a tawɩ ba jaŋ ŋ. Ba na gʋ wʋ yu Ɩsʋɔ lɩsɛ kalaa Ɩsʋɔ tʋm danɛ gaa naŋ. Akala takɩɛ wʋ pam sɛ wʋ chamɩna wʋ a yɩɛ daasɛ wɩɛ wʋ a kalaa ba. Ama wʋ n dɩlɛ tawɩ ɩ.

23 Gʋ wʋ tʋŋ gɩyɩɛnɩŋ ju gɩtɛ na, wʋ bɔrɛ ju dɩɛ naŋ. 24 Ŋina wʋrʋgbɩɛ na, wʋ alʋ Elisabeti yu fɩlɩ sɛ wʋ mʋ wʋ wʋsɛ wɩsɛ waa dʋɔ gafɩtasɛ sɩnʋŋ. 25 Sɛ wʋ tawɩ sɛ, <<Ɩsʋɔ n yɩɛ ŋina fa maŋ. Gɩyɩɛnɩŋ ŋina naŋ, Ɩsʋɔ wɩɩ ma dʋɔ sɛ wʋ lɩsɛ asaju lɩɩ ma dʋɔ bakapa asa naŋ.>>

26 Gʋ Elisabeti fɩlɩ yu gafɩtasɛ lʋrʋ na, Ɩsʋɔ ti bɔrɛ kpiri gabʋɔ Gabireli sɛ wʋ n ju Nasarati gaa ga wɩɛ Galaliya tibi dʋɔ na, 27 sɛ wʋ n ju wuboloŋpu wʋŋ wʋ ba jiŋ baalɛ sɛ baa yagɛ ɩ sɛ Mariya. Ba mʋ ɩ fa Yosefu sarɛ. Yosefu yɩɛ Juo Dawidi ganana bie bɛ. 28 Sɛ Ɩsʋɔ gabʋɔ wʋŋ yɩlɩ Mariya tawɩ sɛ, <<Nyaŋ wʋŋ Ɩsʋɔ wɩɩ n dʋɔ. Ɩsʋɔ kpi n dʋɔ.>>

29 Sɛ Mariya wʋsɛ yɔgɔsɛ ɩ Ɩsʋɔ gabʋɔ wʋŋ wɩɛ ŋii dʋɔ sɛ wʋ fa nfɩɛrɛ sɛ be yɩlɩ duluŋ naŋ mɩnaŋ? 30 Ama Ɩsʋɔ gabʋɔ wʋŋ tawɩ ɩ sɛ, <<Mariya n baa yela nyɩŋtɩɛ a chaŋ nyaŋ! Ɩsʋɔ wɩɩ n dʋɔ. 31 Kɩɛ, nyaa yu fɩlɩ na nyaa lʋrʋ bu baalɛ na nyaa si ɩ yɩrɛ sɛ Yesu. 32 Wʋ a yɩɛ wʋkpa janɛ na baa yagɛ ɩ Ɩsʋɔ Wʋjanɛ wʋŋ Bu. Ɩsʋɔ, Ɩsʋɔ wʋŋ aja mʋ wʋ duluŋ naŋ juo Dawidi juorigbeli gaa fa ɩ, 33 wʋ a di Yakubu waa dʋɔ gakpaa. Wʋ Juori taŋ gɩtɛ ɛ.>>

34 Sɛ Mariya tasɛ Ɩsʋɔ gabʋɔ wʋŋ sɛ, <<Ma ba jiŋ baalɛ ɛ, aja yɩɛ sɩnɛ na ŋina a kɔŋ tɩba?>>

35 Sɛ Ɩsʋɔ gabʋɔ wʋŋ lɩsɛ nʋɔ sɛ, <<Ɩsʋɔ Feliŋ aja kɔŋ n dʋɔ, na Ɩsʋɔ Wʋjanɛ wʋŋ doŋ aja gaa fu n dʋɔ. Dɩmʋŋ dʋɔ, n bu wʋŋ nyaa lʋrʋ ɩ na wʋ a yɩɛ dɩchɩrɩchɩrɩ na baa yagɛ ɩ sɛ Ɩsʋɔ Bu. 36 Kɩɛ, Elisabeti wʋŋ wʋ yɩɛ n lʋŋtɛ na a kɔŋ wʋ a gaa lʋrʋ wʋ gɩnʋmʋŋsarɛ saŋa naŋ. Wʋŋ sɛ bakpa a tawɩ sɛ wʋ aa lʋrʋ na gba dɔŋna fɩlɩ gafɩtasɛ lʋʋrʋ. 37 Akala takɩɛ bʋrʋ taŋ sɛ Ɩsʋɔ baa dɩlɛ yɩɛ ɛ.>>

38 Sɛ Mariya tawɩ sɛ, <<Ma yɩɛ Ɩsʋɔ tʋmɩrɛ bɛ. Ŋɩ n yɩɛ fa maŋ takɩɛ ganaŋkʋ nya tawɩ na.>> Sɛ Ɩsʋɔ gabʋɔ wʋŋ lɩɩ wʋ jaŋ.

39 Wɩɛ akalisa ŋarɛ wʋrʋgbɩɛ na, Mariya kʋlʋ bileŋ ju dɩɛ garɛ ga wɩɛ bʋrɔŋsɛ dʋɔ Yuda tibi dʋɔ na naŋ, 40 sɛ wʋ ju Sakariya waa dʋɔ ga yɩlɩ wʋ alʋ Elisabeti. 41 Gʋ Elisabeti nyii Mariya yɩlɩ na, sɛ wʋchaa wʋŋ wʋ wɩɛ wʋ lorinaŋ na jigisi. Sɛ Ɩsʋɔ Feliŋ gaa su Elisabeti tɩba. 42 Sɛ wʋ fuba na doŋ tawɩ sɛ, <<Kusee n nyina nyaŋ ala kpiniŋ naŋ sɛ kusee n nyina bu wʋŋ nyaa lʋrʋ na. 43 Be n yɩɛ sɛ jilima ŋina kɔŋ ma dʋɔ sɛ Kpaŋjuo wʋnaa gaa bʋɔ ma dʋɔ? 44 Kɩɛ, gʋ ma nyii n yɩlɩ na, sɛ wʋchaa wʋŋ mʋ asadi jigisi ma lorinaŋ. 45 Kusee n nyina nyaŋ wʋŋ nya lɩɛ Ɩsʋɔ wɩɛ ŋii wʋ tawɩ fa nyaŋ na di sɛ ŋɩ kɔŋ tɩba.>>

46 Sɛ Mariya tawɩ sɛ,

<<Ma sʋbʋ n kalɩɛ Ɩsʋɔ,

47 sɛ ma sʋbʋ asadi Ɩsʋɔ wʋŋ wʋ yɩɛ Mɔlɔgɩrɛ

48 Akala takɩɛ wʋ nyiŋi wʋ alʋ tʋmɩrɛ

maŋ wʋŋ ma n daga a

lɩɩ jaŋ mʋ a ju na, gɩnanaŋ ŋii ŋii kɔŋ na kpiniŋ aja yagɛ maŋ sɛ wʋŋ ba yɩɛ ɩ kusee.

49 Akala takɩɛ, Ɩsʋɔ Doŋtɛ wʋŋ n yɩɛ wɩɛ a janɩɛ ŋina fa maŋ.

Wʋ yɩrɛ n nyina dɩchɩrɩchɩrɩ.

50 Wʋ a wɩɩ baa baa se ɩ na gɩyɔŋ,

lɩɩ jaŋ gɩnanaŋ mʋ ga tala chifuo gɩnanaŋ dʋɔ.

51 Wʋ mʋ wʋ pam yɩɛ yikuo wɩɛ.

Sɛ wʋ puseŋ baa baa kʋna ba wʋsɛ adugbe ba agela naŋ na.

52 Wʋ a kʋna juoneŋ ba juorigbeliŋ dʋɔ,

sɛ wʋ jiŋna baa baa kɔna ba wʋsɛ tie na adugbe.

53 Wʋ yela sɛ ayɔŋtina yu abʋrɩ abama,

ama baa ba yɩɛ akpaŋtatina na bɩrɛ, ba ju pamɩɛ kpaŋ.

54 Wʋ chɔna wʋ bakpa Isiralitina,

sɛ wʋ nyiŋi sɛ wʋ wɩɩ ba gɩyɔŋ

55 Abiraham na wʋ tietina gɩyɔŋ gakpaa

ganaŋkʋ wʋ tawɩ ba gɩnanaŋ na.>>

56 Sɛ Mariya cha Elisabeti jaŋ aja yɩɛ gafɩtasɛ atoro pɔɩ sɛ wʋ bɔrɛ ju dɩɛ.

57 Gʋ Elisabeti lʋrʋ talɛ na, wʋ lʋrʋ bu baalɛ. 58 Baa wʋ na ba chaɩ tirina na wʋ lʋŋtina nyii gʋ Ɩsʋɔ wɩɩ wʋ gɩyɔŋ fɔɩ, sɛ wʋ na ba kpiniŋ asadi.

59 Gʋ wʋchafɔlɩɛ wʋŋ yu wɩɛ jiŋinara na, ba kɔŋ na baa gaa kara wʋ baŋlɛ, nafʋɔ ba ja sɛ baa mʋ wʋ juo Sakariya yɩrɛ si ɩ. 60 Sɛ wʋnaa tawɩ sɛ, <<Aye! Baa yagɛ sɛ Yohane.>>

61 Sɛ ba tawɩ ɩ sɛ, <<N lʋŋtɩrɛ naŋ wʋrʋ taŋ sɛ baa yagɛ dɩmʋŋ yɩrɛ gana a.>>

62 Sɛ ba mʋ ba pamɩɛ mʋ yɩɛ daasɛ kalaa Sakariya yɩrɛ gaa wʋ a ja sɛ ba n mʋ si wʋchaa wʋŋ na. 63 Sɛ wʋ mʋ wʋ pam yɩɛ daasɛ kalaa ba sɛ ba n mʋ bʋrʋ ga sabɩɛsa kɔna ɩ, sɛ wʋ sabɩɛ ga dʋɔ sɛ, <<Wʋ yɩrɛ n nyina Yohane.>> Sɛ dɩ yɩɛ wʋkʋma doba. 64 Gabʋanaŋ sɛ Sakariya nʋɔ fulu sɛ wʋ nʋɔjʋlʋŋ buoli sɛ wʋ dɩlɛ wʋ a tawɩ sɛ wʋ mʋ kalɩɛwʋ fa Ɩsʋɔ. 65 Sɛ nyɩŋtɩɛ chaŋ baa wʋ na ba ba chaɩ tirina na kpiniŋ, na bakpa baa ba chaɩ dɩɛsɛ ŋii ŋɩ wɩɛ bʋrɔŋsɛ dʋɔ Yudiya tibi dʋɔ na kpiniŋ a tawɩ dɩmʋŋ wɩɛ ŋina. 66 Sɛ wʋkʋma wʋŋ wʋ nyii dɩmʋŋ wɩɛ ŋina na, wʋ fa ŋɩ nfɩɛrɛ sɛ wʋ tasɛ ɩ sɛ, <<Be sɛ wʋchaa wina a kɔŋ wʋ a gaa yɩɛ?>> Akala takɩɛ Ɩsʋɔ pam jagaɩ wʋ dʋɔ.

67 Sɛ Ɩsʋɔ Feliŋ su Yohane wʋjuo Sakariya tɩba, sɛ wʋ gbala sɛ,

68 <<Kalɩɛwʋ n ju fa Ɩsʋɔ, Isirali Ɩsʋɔ wʋŋ,

Akala takɩɛ wʋ kɔŋ gaa mɔlɔgɩ wʋ bakpa.

69 Wʋ fa daa Mɔlɔgɩrɛ doŋ-tɛ

lɩɩ wʋ tʋmɩrɛ Juo Dawidi lʋŋtɩrɛ naŋ, 70 [ganaŋkʋ wʋ cha pala na wʋ bajana baa ba wʋsɛ yɩɛ dɩchɩrɩchɩrɩ sɛ ba cha laŋ na dʋɔ tawɩ si sɛ,]

71 Wʋ a kɔŋ gaa mɔlɔgɩ daa lɩɩ daa badʋŋna,

na baa baa kɔla daa na kpiniŋ pamɩɛ naŋ.

72 Wʋ a wɩɩ daa duluŋ gɩyɔŋ

na wʋ a nyiŋi dɩkɔŋ chɩrɩchɩrɩ.

73 Wʋ ka ntaŋ fa daa duluŋ Abiraham

74 sɛ, wʋ a lɩsɛ daa lɩɩ daa badʋŋna pamɩɛ naŋ

na wʋ a yela dɩ tʋm ɩ yela nyɩŋtɩɛ ba chamɩna daa a,

75 na chɩrɩchɩrɩ na chirigi naŋ wʋ asanaŋ daa nkpa gɩyɩɛnɩŋ kpiniŋ naŋ.>>

76 Sɛ Sakariya tawɩ wʋbu Yohane sɛ, <<Baa yagɛ nyaŋ sɛ Ɩsʋɔ Wʋjanɛ ɔja.

Akala takɩɛ nyaa pala daa Kpaŋjuo wʋŋ asanaŋ na nyaa desina gbɩɛ si da ɩ.

77 Nyaa yela na wʋ bakpa a jiŋ gʋ ba dɩsʋbʋ mʋ chɩɛ dʋɔ

sɛ ba yu mɔlɔgɩ.

78 Akala takɩɛ Ɩsʋɔ wʋŋ wʋ wɩɩ daa gɩyɔŋ dʋɔ,

wʋ yela sɛ wiita lɩɩ fa daa.

79 Sɛ dɩ ŋmaŋi fa baa ba chaɩ giteŋteŋbiri naŋ

na baa ba wɩɛ sɩŋ giteŋteŋbiri naŋ,

na wʋ a gie daa nafara mʋ pala wʋsɛfɩɛ gbɩɛ naŋ.>>

80 Sɛ wʋchaa wʋŋ bɩɩ sɛ wʋ yɩɛ doŋ feliŋ naŋ. Sɛ wʋ cha ifuli dʋɔ ga tala gʋ wʋ lɩsɛ wʋ wʋsɛ kalaa Isiralitina.