1 Sɛ Yesu jɔ diduu mʋ kalaa wʋ kpalɛnara baa sɛ ba n jɔ dɩga saŋa kʋma na ba pamɩɛ naŋ n baa yɔgɔsɛ na dɩga jɔ. 2 Sɛ wʋ tawɩ baa sɛ, <<Wɩɛ diri wʋrʋ n cha wʋ wɩɛna dɩɛ garɛ naŋ wʋ aa se Ɩsʋɔ sɛ wʋ ba chamɩna wʋkpa wʋ a yagɛ bʋrʋ ʋ. 3 Okulapu wʋrʋ gba cha wʋ wɩɛ dɩɛ gana naŋ. Wɩɩ kʋma wʋ dɔŋ wɩɛ diri wʋŋ dʋɔ wʋ a sʋlʋ ɩ sɛ di wɩɛ ŋɩ gbɩɛ dʋɔ fa maŋ na maa di dɩlɛ ma ɔdʋŋ dʋɔ.>> 4 Okulapu wʋŋ pala wɩɛ diri wʋŋ dʋɔ taŋgɩlɛ ama wʋ aa dʋ ɩ nʋɔ ɔ. Ama wʋrʋgbɩɛ na wʋ tawɩ wʋ wʋsɛ sɛ, <<Wɩɛ tɩba sɛ maa se Ɩsʋɔ sɛ ma ba chamɩna wʋkpa maa yagɛ bʋrʋ ʋ, 5 ama ganaŋkʋ okulapu wina a nyala maŋ na dʋɔ, maa tawɩ wɩɛ ŋɩ gbɩɛ dʋɔ na wʋ a di dɩlɛ na wʋ a yela maŋ ga nyala.>>

6 Sɛ kpaŋjuo tawɩ sɛ, <<Nyii wɩɛ ŋii wɩɛ diri wʋŋ wʋ aa di wɩɛ ŋɩ gbɩɛ dʋɔ na tawɩ. 7 Sɛ yɩɛ dɩmʋŋ na, be n yɩɛ sɛ Ɩsʋɔ baa di wɩɛ ŋɩ gbɩɛ dʋɔ fa bakpa baa wʋ lɩsɛ ba sɛ baa wii baa yagɛ ɩ wiita na yuluma na a di dɩlɛ? Wʋ a taŋgɩlɛ na amɩɛ chɔna? 8 Maa tawɩ amɩɛ sɛ, Ɩsʋɔ aja yela na ɩ yu wɩɛ ŋɩ gbɩɛ dʋɔ bileŋ. Ama Wʋkpa Bu wʋŋ bɔrɛ kɔŋ na, wʋ gaa na bakpa baa ba wɩɛna lɩɛdi na tibi dʋɔ?>>

9 Sɛ Yesu ti bɔrɛ jɔ diduu fa baa baa kɩɛ ba wʋsɛ sɛ ba gbɩɛsɛ chirigi yela baa kɩɛ wʋkʋma kpakpuo na sɛ, 10 <<Baala bala barɛ ju Ɩsʋɔ tʋm danɛ naŋ na baa ga jɔ dɩga. Wʋrʋ cha wʋ yɩɛ Farasi wʋkpa sɛ wʋrʋ dʋɔ yɩɛ lampo lɩɛrɛ. 11 Sɛ Farasi wʋkpa wʋŋ kʋlʋ sɩŋ jɔ dɩga mʋ wʋ wʋsɛ adugbe sɛ Ɩsʋɔ, maa yɩlɩ nyaŋ gʋ ma ba yɩɛ ŋmɩɛla baa ba chamɩna doŋ baa lɩɛ bakpa abʋrɩ, dɩsʋbʋ yɩɛra, lɩɩ wʋ alʋ wʋrʋgbɩɛ yaa lɩɩ wʋ baalɛ wʋrʋgbɩɛ takɩɛ baa ba kakaa na, yaa dɩmʋŋ lampo lɩɛrɛ wina. 12 Maa chaŋ nʋɔ pɔgʋ bʋla suoji kʋma, sɛ maa fa ma gifi naŋ garɛ ŋii maa yu na kpiniŋ dʋɔ.>>

13 Ama lampo lɩɛrɛ wʋŋ kʋlʋ sɩŋ laraŋ gatʋŋgʋrʋ mʋ wʋ nyi wuu, sɛ wʋ mʋ wʋ pamɩɛ jaga wʋ digela dʋɔ tawɩ sɛ, <<Ɩsʋɔ, ma yɩɛ dɩsʋbʋ yɩɛrɛ bɛ, wɩɩ ma gɩyɔŋ.>>

14 Sɛ Yesu ju dʋɔ tawɩ sɛ, <<Maa tawɩ amɩɛ sɛ lampo lɩɛrɛ wʋŋ n bɔrɛ ju dɩɛ takɩɛ wʋ chirigi Ɩsʋɔ asanaŋ, naa Farasi wʋkpa wʋŋ ŋ. Akala takɩɛ wʋkʋma wʋŋ wʋ a jiŋna wʋ wʋsɛ na, Ɩsʋɔ aja kɔna ɩ tie, sɛ wʋkʋma wʋŋ wʋ a kɔna wʋ wʋsɛ tie na, Ɩsʋɔ aja jiŋna ɩ adugbe.>>

15 Sɛ bakpa barɛ mʋ bachaasɛ bisi kɔna Yesu sɛ wʋ n mʋ wʋ pam jaga ba dʋɔ. Ama gʋ wʋ kpalɛnara baa na dɩmʋŋ na, baa gɩŋ ba. 16 Ama Yesu yagɛ bachaasɛ bisi baa kɔŋ wʋ jaŋ tawɩ sɛ, <<N yela na bachaasɛ bisi baa a kɔŋ ma jaŋ, ama n baa gaa ba gbɩɛ, akala takɩɛ Ɩsʋɔ juori gaa yɩɛ baa ba kɩɛna dɩmʋŋ na teri bɛ. 17 Maa tawɩ sɛ n nyii na dieli sɛ wʋkʋma wʋŋ wʋ n lɩɛ Ɩsʋɔ Juori di takɩɛ wʋchaa pii na, wʋ aa dɩlɛ jʋʋ ʋ.>>

18 Sɛ Yudatina bɩnɛ wʋrʋ tasɛ Yesu sɛ, <<Wʋkalaasa wʋbam, be n tiri gʋ ma n yɩɛ na maa yu nkpa ŋii ŋɩ taŋ gɩtɛ?>>

19 Sɛ Yesu lɩsɛ ɩ nʋɔ sɛ, <<Be n yɩɛ sɛ nyaa yagɛ maŋ sɛ wʋbam? Wʋrʋ taŋ wʋ yɩɛ wʋbam m, amʋɔ Ɩsʋɔ nyiŋeŋ. 20 N jiŋ Ɩsʋɔ mbara ŋii ŋii kalaa sɛ, <N baa yɩɛ baalɛ wʋrʋgbɩɛ lɩɩ yaa alʋ wʋrʋgbɩɛ lɩɩ, n baa tagapʋ, n baa ŋmɩɛlɛ, n baa di akarɩɛ seriya, na nyaa bu njuo na nnaa.>✝>>

21 Sɛ baalɛ wʋŋ tawɩ Yesu sɛ, <<Wʋkalaasa, lɩɩ ma gɩchasɩtɩɛ sɛ ma kpaŋ mbara wɩɛ ŋina kpiniŋ dʋɔ.>>

22 Gʋ Yesu nyii dɩmʋŋ na, sɛ wʋ tawɩ ɩ sɛ, <<Dɩkaka nyaŋ bʋrʋ darɛ. Ju ga yaa bʋrʋkʋma gaa nya wɩɛna, na nyaa mʋ aterembie ŋii ga fa ayɔŋtina, na nyaa yu akpaŋta Ɩsʋɔ adugbe. Na nyaa gaa kpaŋ maŋ.>>

23 Gʋ aterembie-tɛ wʋŋ nyii ŋina na, dɩ n yɩɛ ɩ jʋŋ ŋ, akala takɩɛ wʋ wɩɛna akpaŋta na dieli. 24 Sɛ Yesu kɩɛ ɩ sɛ wʋ tawɩ sɛ, <<Aja yɩɛ doŋ fa akpaŋtatina na baa jʋʋ Ɩsʋɔ Juori gaa naŋ. 25 Aja fʋ fa nyɔma na wʋ a mʋna dɩkparɛ bʋɔ naŋ, ama aja yɩɛ wiliŋ fa akpaŋtatɛ na wʋ a jʋʋ Ɩsʋɔ Juori gaa naŋ.>>

26 Sɛ baa ba nyii wɩɛ ŋii na tasɛ sɛ, <<Dɩmʋŋ bɩrɛ Mmʋɔ sɛ baa mɔlɔgɩ?>>

27 Sɛ Yesu lɩsɛ nʋɔ sɛ, <<Ŋii wʋkpa baa dɩlɛ yɩɛ na, Ɩsʋɔ bɩrɛ, wʋ a dɩlɛ yɩɛ bʋrʋkʋma.>>

28 Sɛ Petero tawɩ Yesu sɛ, <<Dɩ yela bʋrʋkʋma gaa kpaŋ nyaŋ.>>

29 Yesu tawɩ ba sɛ, <<Maa tawɩ sɛ n nyii na dieli sɛ wʋkʋma wʋŋ wʋ a yela wʋ waa yaa wʋ alʋ yaa wʋ ŋmɩɛtina yaa wʋ lʋrʋda yaa wʋbie Ɩsʋɔ juori gaa dʋɔ na, 30 wʋ a yu ŋarɛ kpi saŋa gana dulunya na wʋ a ti yu nkpa ŋii ŋɩ taŋ gɩtɛ dulunya gaa gaa kɔŋ na naŋ.>>

31 Sɛ Yesu mʋ wʋ kpalɛnara baa lɩɩ laraŋ, sɛ wʋ tawɩ ba sɛ, <<N nyii, dɩ ju Yerusalem dɩɛ naŋ, bʋrʋkʋma gaa Ɩsʋɔ bajana baa sabɩɛ mʋ lɩɩna Wʋkpa Bu wʋŋ dʋɔ si na, aja kɔŋ tɩba. 32 Baa lɩsɛ ɩ fa baa ba ba yɩɛ Yudatina na baa jabi ɩ, tii ɩ, tɔ mɩtalɩŋ fu ɩ, taɩ ɩ achʋchʋɛ na baa kʋ ɩ. 33 Ama wɩɛ atoro wɩɩ na, wʋ a feŋ lɩɩ sɩŋ naŋ.>>

34 Ama wʋ kpalɛnara baa n nyii wɩɛ ŋii wʋ a tawɩ na tie ɩ. Wɩɛ ŋii wʋ tawɩ na tie cha wɩsɛ ba, sɛ ba ba jiŋ wɩɛ ŋii wʋ a tawɩ na dʋɔ ɔ.

35 Gʋ Yesu tirina Yeriko dɩɛ na, baalɛ ɔtaŋpʋ wʋrʋ chaɩ gbɩɛ laraŋ wʋ a sʋlʋ. 36 Gʋ wʋ nyii bakpa fɔɩ a yɩɛ galaŋba baa lam na, wʋ tasɛ sɛ be aaŋ ju dʋɔ bɛ? 37 Sɛ ba lɩsɛ ɩ nʋɔ sɛ, <<Yesu Nasarati wʋkpa wʋŋ aaŋ lam.>>

38 Sɛ wʋ kuusi tawɩ sɛ, <<Yesu, Juo Dawidi ganana bie wɩɩ ma gɩyɔŋ.>>

39 Sɛ bakpa baa ba dɔŋ asanaŋ na fuba wʋ dʋɔ sɛ wʋ n fu wʋ nʋɔ dʋɔ. Ama wʋ ju dʋɔ kuusi na doŋ sɛ, <<Juo Dawidi ganana bie, wɩɩ ma gɩyɔŋ.>>

40 Sɛ Yesu dʋɔsɩŋ sɛ wʋ dʋ ba sɛ ba n mʋ ɔtaŋpʋ wʋŋ kɔnɛ ɩ. Gʋ wʋ kɔŋ Yesu jaŋ na, wʋ tasɛ ɩ sɛ, 41 <<Be sɛ nyaa ja sɛ maa yɩɛ fa nyaŋ?>> Sɛ ɔtaŋpʋ wʋŋ lɩsɛ nʋɔ sɛ, <<Kpaŋjuo, maa ja sɛ maa na.>>

42 Yesu tawɩ ɩ sɛ, <<Na abʋrɩ, n lɩɛdi chɔ nyaŋ.>> 43 Gabʋanaŋ sɛ wʋ asa fulu sɛ wʋ kpaŋ Yesu wʋ a kalɩɛ Ɩsʋɔ. Gʋ bakpa baa kpiniŋ na ŋii ŋɩ tibi na, ba kalɩɛ Ɩsʋɔ.