1 Gʋ Yudatina a kɔŋ baa gaa di Bodobodo gaa ga Tana Yiisi Asadi Adiya di gaa baa yagɛ sɛ Nyiŋi Asadi Adiya di* tirina na. 2 Sei Bɩnɩɛ na Mosesi mbara bakalaasa baa cha baa ja gbɩɛ gaa baa mʋna dʋɔ wɩsɛ chaŋ Yesu na baa kʋ ɩ, ama baa se bakpa baa.

3 Sɛ Sɩtanɩ jʋʋ Yudasi, wʋŋ baa yagɛ sɛ Isikariyoti tɩba. Wʋ yɩɛ kpirida gifi bala baa tɩba wʋrʋ bɛ. 4 Sɛ Yudasi ju Ɩsʋɔ sei bɩnɩɛ na Ɩsʋɔ tʋm danɛ kɩɛra jaŋ ga pɔgʋ na ba ganaŋkʋ wʋ a lɩsɛ Yesu fa ba na. 5 Ba asadi sɛ ba kpa gʋ baa fa ɩ aterembie. 6 Sɛ Yudasi kpa sɛ wʋ fara wʋ a ja gbɩɛ gaa wʋ a mʋna dʋɔ lɩsɛ Yesu fa yela jama baa n na a.

7 Wɩɩ gaa Yudatina a di Bodobodo gaa ga Tana Yiisi, sɛ baa kʋ nyiŋi asadi adiya di fiebu mʋ diesi gadiesa talɛ na. 8 Sɛ Yesu kpiri Petero na Yohane sɛ, <<Ba n ju ga desina diele gaa dɩ di Nyiŋi Asadi Adiya di adiya na.>>

9 Sɛ ba tasɛ sɛ, <<Le sɛ nyaa ja sɛ dɩ ga desina si?>>

10 Sɛ Yesu lɩsɛ nʋɔ sɛ, <<Ɩ jʋʋ dɩɛ janɛ gaa naŋ na, ɩ jaŋina baalɛ wʋrʋ wʋ siana sapɩɛ bie na lɩŋ. N kpaŋ ɩ ju waa gaa wʋ a jʋʋ ga dʋɔ na. 11 N tawɩ waatɛ wʋŋ sɛ, <Wʋkalaasa wʋŋ sɛ, kalaa daa mʋɔra danɛ gaa maŋ na ma kpalɛnara dɩ cha tɩba di Nyiŋi Asadi Adiya di adiya ŋii na?> 12 Wʋ a kalaa amɩɛ abaŋsʋrʋ danɛ janɛ garɛ ba desina ga tɩba na. Dɩmaŋ sɛ n yɩɛ nyiŋi asadi adiya di adiya ŋii.>>

13 Sɛ ba ju ga na bʋrʋkʋma ganaŋkʋ Yesu tawɩ ba na. Sɛ ba yɩɛ Nyiŋi Asadi Adiya di adiya ŋii dɩmaŋ.

14 Gʋ saŋa gaa talɛ sɛ baa di na, Yesu na wʋ kpirida baa ga cha baa di. 15 Sɛ wʋ tawɩ ba sɛ, <<Jawʋ sɛ maa ja sɛ maŋ na amɩɛ dɩ di Nyiŋi Asadi Adiya di adiya ŋii pɔɩ na maa na awʋrʋfʋɔ. 16 Maa tawɩ amɩɛ sɛ, maa ti di dɩmʋŋ adiya ŋina a ga tala ganaŋkʋ ŋɩ di tie aja kɔŋ tɩba Ɩsʋɔ juori gaa naŋ.>>

17 Sɛ Yesu mʋ gafie bie gaa wayɩŋ sʋlʋŋ wɩɛ tɩba sɛ wʋ yɩlɩ Ɩsʋɔ sɛ wʋ tawɩ ba sɛ, <<N lɩɛ na ɩ nyʋɔ fa dɔŋa. 18 Akala takɩɛ maa tawɩ amɩɛ sɛ, maa ti nyʋɔ bobi wayɩŋ sʋlʋŋ ŋina ŋarɛ ɛ ga tala gʋ Ɩsʋɔ Juori gaa aja kɔŋ.>>

19 Sɛ Yesu mʋ bodobodo, sɛ wʋ yɩlɩ Ɩsʋɔ sɛ wʋ jaɩ-jaɩ tɩba mʋ fa ba tawɩ sɛ, <<Ma wʋsɛ mɩnaŋ ma chamɩna maa fa amɩɛ. N yɩɛ ŋina mʋ nyiŋi maŋ.>>

20 Dɩmʋŋ sɛ gʋ ba di taŋ na, wʋ mʋ gafie bie na wayɩŋ sʋlʋŋ tawɩ sɛ, <<Wayɩŋ sʋlʋŋ ŋii ŋɩ wɩɛ gafie bie gana naŋ na n nyina ma asima ŋii ŋɩ chɩɛgɩ wʋrʋgɩ fa amɩɛ, ŋii n gaa Ɩsʋɔ na bakpa dɩkɔŋ fɔlɛ gaa ba jʋɔ na nʋɔ. 21 Kɩɛ, wʋŋ wʋ a lɩsɛ maŋ fa na, wʋ chaɩ ma jaŋ didiitiŋ jiŋna. 22 Wʋkpa Bu wʋŋ aja sɩŋ ganaŋkʋ ba sabɩɛ si na. Ama wʋkpa wʋŋ wʋ a lɩsɛ Wʋkpa Bu wʋŋ fa na, wʋŋ lakʋ!>> 23 Sɛ ba fara baa tasɛ dɔŋa ba tɩba wʋŋ wʋ a yɩɛ ŋina na.

24 Sɛ dɩkɔŋ takɩɛ Yesu kpalɛnara baa a di dɔŋa noro wʋŋ wʋ yɩɛ bɩnɛ. 25 Sɛ Yesu tawɩ ba sɛ, <<Baa ba ba yɩɛ Yudatina na juoneŋ a mʋ yikuo bɛ baa di ba bakpa dʋɔ sɛ baa yagɛ ba wʋsɛ sɛ bakpa chɔnara. 26 Ama amɩɛ bɩrɛ, n baa yɩɛ takɩɛ ba. Ama amɩɛ tɩba wʋjaŋ-janɛ n yɩɛ wʋ wʋsɛ takɩɛ wʋ pii, sɛ wʋŋ wʋ yɩɛ asanaŋtɛ amɩɛ tɩba na, n yɩɛ wʋ wʋsɛ takɩɛ tʋmɩrɛ. 27 Mmʋɔ n nyina wʋjanɛ, wʋŋ wʋ chaɩ tebulu gaa jaŋ wʋ a di na yaa wʋŋ wʋ a tʋm na? Naa wʋŋ wʋ chaɩ tebulu jaŋ wʋ a di naa? Ama maŋ bɩrɛ, ma wɩɛ amɩɛ jaŋ takɩɛ tʋmɩrɛ. 28 Amɩɛ n sɩmana ma wʋrʋgbɩɛ ma awʋrʋfʋɔ naŋ. 29 Takɩɛ ganaŋkʋ Majuo mʋ juori gaa fa maŋ na, dɩmʋŋ sɛ maŋ gba maa mʋ fa amɩɛ, 30 ganaŋkʋ ɩ di na ɩ nyʋɔ ma juori naŋ na ɩ cha juorigbeli gaa dʋɔ di Isirali buonɔsɛ gifi ala ŋii dʋɔ.>>

31 Sɛ Yesu tawɩ sɛ, <<Simoŋ, Simoŋ, nyii! Sɩtanɩ sʋlʋ gbɩɛ Ɩsʋɔ jaŋ na wʋ a mʋna lɔ tɩba dʋɔ fuosi amɩɛ takɩɛ ganaŋkʋ faradɛ a fuosi gamɩsɛ duofu wʋ a lɩsɛ bie naŋ na. 32 Ama Simoŋ, ma jɔ dɩga fa nyaŋ ganaŋkʋ nyaa yela n lɩɛdi tɩba a. Sɛ nya bɔrɛ kɔŋ ma jaŋ na, dʋ n dɔŋa baa doŋ naŋ.>>

33 Ama Petero lɩsɛ nʋɔ, <<Kpaŋjuo, ma yɩɛ siriya takɩɛ yɩɛ danɛ dɩtʋɔtɩŋ bɛ ʋ, sɩŋ naŋ bɛ ʋ, maŋ na nyaŋ.>>

34 Sɛ Yesu tawɩ ɩ sɛ, <<Petero, maa tawɩ nyaŋ sɛ, pɔɩ na dijimba akɔlɛ jaŋ na, nyaa pɩɛ butoro sɛ n ba jiŋ maŋ ŋ.>>

35 Sɛ Yesu tasɛ wʋ kpalɛnara baa sɛ, <<Gʋ ma kpiri amɩɛ sɛ ɩŋ mʋ aterembie takpe, adiku yaa asibita na, bʋrʋ garɛ tiri amɩɛ yaa?>> Sɛ ba lɩsɛ nʋɔ sɛ, <<Aye, bʋrʋ n tiri daa a.>>

36 Sɛ wʋ tawɩ ba sɛ, <<Ama dɩtɩɛna bɩrɛ, wʋŋ wʋ wɩɛna aterembie takpe na adiku na wʋ n mʋ. Sɛ wʋŋ wʋ n tana yuo dabɩla na, wʋŋ n yaa wʋ adugbe gagbasɛ na ɩ mʋ lɩɛ ŋarɛ. 37 Akala takɩɛ ba sabɩɛ ma wʋsɛ dʋɔ wɩɛ Sabɩɛwɩɛ ŋii naŋ si sɛ, <Ba kalaa maŋ kpi dɩsʋbʋ yɩɛra dʋɔ.> Dɩmʋŋ dʋɔ maa tawɩ amɩɛ sɛ ŋɩ tiri gʋ ŋina a kɔŋ tɩba ma dʋɔ.✝ Maa tawɩ amɩɛ sɛ, ŋɩ tiri gʋ ŋina kpiniŋ a kɔŋ tɩba. Gasiŋteŋ ŋii ba sabɩɛ si lɩɩ ma dʋɔ na aja kɔŋ tɩba.>>

38 Sɛ Yesu kpalɛnara baa tawɩ sɛ, <<Kpaŋjuo kɩɛ, yuo dabɩlasɛ ala mɩnaŋ. Sɛ Yesu tawɩ ba sɛ dɩ mɩɛ!>>

39 Yesu ju Olifi dasɛ bʋrɔŋ dʋɔ ganaŋkʋ wʋ fɩla wʋ a ju na. Sɛ wʋ kpalɛnara baa kpaŋ ɩ. 40 Gʋ ba tala dɩmaŋ na, wʋ tawɩ ba sɛ, <<N jɔ dɩga na n baa jʋʋ lɔ tɩba naŋ.>> 41 Sɛ Yesu ju wʋ asanaŋ chonii luuŋ wʋ dʋna dʋɔ sɛ wʋ jɔ dɩga sɛ, 42 <<Majuo, nyaa jawʋ na yela na dɩmʋŋ awʋrʋfʋɔ ŋina a giligi maŋ. Ama naa ŋii maa jawʋ na a, ama ŋii nyaa jawʋ na.>> 43 Sɛ Ɩsʋɔ gabʋɔ lɩɩ Ɩsʋɔ adugbe kɔŋ wʋ jaŋ gaa dʋ ɩ doŋ naŋ. 44 Gʋ wʋ wɩɛ gayɩyɩɛ gana naŋ na, wʋ mʋ dɩsɛ chɩbɛ jɔ dɩga sɛ wʋ wʋsɛ difɩŋ yɩɛ takɩɛ asima ŋii wʋrʋgɩ tibi naŋ.

45 Gʋ wʋ jɔ dɩga taŋ na, wʋ bɔrɛ ju wʋ kpalɛnara baa jaŋ, sɛ wʋ gaa na gʋ ba duo akala takɩɛ ba wʋsɛ cha yɔgɔsɛ ba. 46 Sɛ Yesu tasɛ ba sɛ, <<Be n yɩɛ sɛ ɩ duo? N kʋlʋ sɩŋ na ɩ jɔ dɩga na n baa jʋʋ lɔ tɩba naŋ.>>

47 Gʋ Yesu saŋ wʋ a tawɩ na, kɩɛ jama baa kɔŋ dɩmaŋ sɛ Yudasi Isikariyoti wʋŋ wʋ yɩɛ wʋ kpirida gifi bala baa tɩba wʋrʋ na pala ba asanaŋ. Sɛ wʋ tirina Yesu sɛ wʋ puga ɩ. 48 Sɛ Yesu tasɛ ɩ sɛ, <<Yudasi, n chamɩna puga nyaa lɩsɛ Wʋkpa Bu wʋŋ nyaa fa?>>

49 Gʋ Yesu kpalɛnara baa na bʋrʋ gaa ga tibi na, ba tasɛ ɩ sɛ, <<Kpaŋjuo, dɩ n lɩsɛ daa yuo dabɩlasɛ na dɩ yuo ba yaa?>> 50 Sɛ Yesu kpalɛnara baa tɩba wʋrʋ lɩsɛ yuo dabɩla kara Ɩsʋɔ sei bɩnɩɛ naŋ bɩnɛ wʋŋ tʋmɩrɛ dɩlɛ jɩsaŋ.

51 Ama Yesu tawɩ ba sɛ, <<N yela!>> Sɛ Yesu mʋ wʋ pam tapʋ baalɛ wʋŋ dɩlɛ gaa sɛ ga mataa.

52 Sɛ Yesu tasɛ sei bɩnɩɛ naŋ bɩnɛ na Ɩsʋɔ tʋm danɛ naŋ kɩɛra na dɩɛ bɩnɩɛ baa ba kɔŋ baa gaa chaŋ ɩ na sɛ, <<Ma yɩɛ ŋmɩɛlɛ wʋŋ wʋ chamɩna doŋ wʋ a lɩɛ bakpa abʋrɩ bɛ sɛ ɩ mʋ yuo dabɩlasɛ na akolie ɩ kɔŋ ɩ chaŋ maŋ? 53 Wɩɩ kʋma ma wɩɛ amɩɛ jaŋ Ɩsʋɔ tʋm danɛ naŋ, ama ɩŋ chaŋ maŋ ŋ. Ama amɩɛ saŋa n talɛ takɩɛ Sɩtanɩ yikuo n di juo.>>

54 Yuora baa chaŋ Yesu sɛ ba mʋ ɩ ju sei bɩnɛ wʋŋ waa dʋɔ yela Petero kpamɩna ba nafarɛ-nafarɛ. 55 Ba dʋ bʋala waa gaa tɩtɩba ba chaɩ baa wʋlʋ sɛ Petero ga cha ba jaŋ, 56 Sɛ tʋmɩrɛ galibie wʋrʋ na Petero wʋ chaɩ wʋ a wʋlʋ bʋala. Sɛ wʋ kɩɛ ɩ na dieli tawɩ sɛ, <<Dɩmʋŋ baalɛ wina cha kpi Yesu dʋɔ.>>

57 Ama Petero pɩɛ sɛ, <<Alʋ, ma ba jiŋ ɩ ɩ.>>

58 Gʋ dɩ yɩɛ chonii na, wʋrʋ dʋɔ ti na Petero sɛ wʋ tawɩ sɛ, <<Nyaŋ gba n yɩɛ ba tɩba wʋrʋ bɛ.>> Sɛ Petero tawɩ sɛ, <<Baalɛ, ma ba yɩɛ ba tɩba wʋrʋ ʋ.>>

59 Aja yɩɛ takɩɛ karafɩɛ garɛ wʋrʋgbɩɛ na, sɛ wʋ fɔlɛ dʋɔ ti bɔrɛ baŋ ŋɩ dʋɔ sɛ, <<Gasiŋteŋ baalɛ wina gba cha kpi Yesu dʋɔ, akala takɩɛ wʋ yɩɛ Galaliya wʋkpa bɛ.>>

60 Sɛ Petero lɩsɛ nʋɔ sɛ, <<Baalɛ, ma ba jiŋ wɩɛ ŋii nyaa tawɩ na a!>> Gʋ wʋ saŋ wʋ a tawɩ na, sɛ dijimba kɔlɛ. 61 Sɛ Kpaŋjuo biliŋi kɩɛ Petero. Dɩmaŋ sɛ Petero nyiŋi wɩɛ ŋii Kpaŋjuo tawɩ ɩ na sɛ, <<Pɔɩ na dijimba akɔlɛ jaŋ yuluma na, n taŋ fɩla pɩɛ butoro sɛ n ba jiŋ maŋ ŋ.>> 62 Sɛ Petero lɩɩ ju asʋŋ ga wii fɔɩ.

63 Baala baa baa kɩɛ Yesu dʋɔ na fara baa jabi ɩ yela baa tugu ɩ. 64 Ba pɔgʋ wʋ asa sɛ ba tasɛ ɩ sɛ, <<Gbala kalaa daa wʋŋ wʋ taɩ nyaŋ na.>> 65 Sɛ ba ju dʋɔ tawɩ atawɩ jaga mʋ tii ɩ.

66 Gʋ tɩɛna na, dɩɛnaŋ bɩnɩɛ naŋ bɩnɩɛ dikpeŋ gaa, sei bɩnɩɛ na na Mosesi mbara bakalaasa kpiniŋ kpi ba dʋɔ gaa sila, sɛ ba mʋ Yesu gaa sɩŋ ba asanaŋ. 67 Sɛ ba tasɛ ɩ sɛ, <<Nyaŋ n nyina Kirisito wʋŋ na, tawɩ daa.>> Sɛ Yesu lɩsɛ nʋɔ sɛ, <<Ma tawɩ amɩɛ na ɩɩ lɩɛ maŋ di i, 68 sɛ ma tasɛ amɩɛ na, ɩɩ lɩsɛ maŋ nʋɔ ɔ. 69 Ama lɩɩ dɩtɩɛna mʋ a ju na, Wʋkpa Bu wʋŋ aja cha Ɩsʋɔ doŋtɛ wʋŋ pam jɩsaŋ dʋɔ.>>

70 Sɛ ba kpiniŋ ba tasɛ, <<Dɩmʋŋ bɩrɛ, nyaŋ n nyina Ɩsʋɔ Bu wʋŋ?>> Sɛ wʋ lɩsɛ nʋɔ sɛ, <<E tawɩ gasiŋteŋ bɛ maŋ mɩnaŋ.>>

71 Sɛ ba tawɩ sɛ, <<Be n yɩɛ sɛ dɩ ti dɩ ja seriyatina? Dɩ nyii lɩɩ wʋ tɩŋtɩŋ wʋ nʋɔnaŋ.>>