Yohane Ɩsʋɔ Sɔrɛ wʋŋ tawɩ Ɩsʋɔ wɩɛ
1 Gʋ Roma Juo janɛ Tiberosi Kayisa yɩɛ Juo bɩŋsɛ gifi anʋŋ naŋ na, Pontiyosi Pilato n cha wʋ nyina Yudiya tibi dʋɔ kɩɛrɛ, sɛ Juo Hɛrɔdɩ dʋɔ yɩɛ Galaliya Juo, sɛ wʋ ŋmɩɛtɩ Filipo dʋɔ yɩɛ Ituriya na Tirakonitisi Juo, sɛ Lisaniyasi yɩɛ Abilene Juo. 2 Dɩmʋŋ saŋa gana sɛ Anasi na Kayifasi yɩɛ Ɩsʋɔ sei bɩnɩɛ naŋ bɩnɛ. Sɛ Ɩsʋɔ wɩɛ kɔŋ Yohane wʋŋ wʋ yɩɛ Sakariya bu na jaŋ ifuli dʋɔ. 3 Dɩmʋŋ dʋɔ, wʋ ju dɩɛsɛ ŋii ŋɩ logo Yodaŋ buo na ga tawɩ Ɩsʋɔ wɩɛ sɛ, <<N biliŋi lɩɩ amɩɛ dɩsʋbʋ naŋ na ɩ kɔŋ Ɩsʋɔ jaŋ na maa sɔ amɩɛ Ɩsʋɔ sɔ, na wʋ a mʋ amɩɛ dɩsʋbʋ chɩɛ amɩɛ.>> 4 Ganaŋkʋ Ɩsʋɔ ɔja Yisaya chɩŋkpɩɛ sabɩɛ Ɩsʋɔ wɩɛ si sɛ
<<Lofu garɛ kuusi ifuli dʋɔ sɛ,
desina gbɩɛ si fa Kpaŋjuo wʋŋ,
na ɩ chirigi gbɩɛ fa ɩ.
5 Dɩtaka kʋma aja su
sɛ bʋrɔŋ na bʋrɔŋ bie kʋma aja sirigi na ŋii tatɩrɛ.
Gbɩɛsɛ anyɔŋsa aja chirigi
Gbɩɛsɛ awarɩɛsa aja yɩɛ tɔlɛtɔlɛ.
6 Bakpa kpiniŋ aja na nya Mɔlɔgɩrɛ wʋŋ.>>3:6 Yis 40:3-5.
7 Sɛ Yohane tawɩ jama baa baa kɔŋ wʋ jaŋ sɛ wʋŋ sɔ ba Ɩsʋɔ sɔ na sɛ, <<Amɩɛ baa ɩ kɩɛna takɩɛ dʋmɩɛ sɔrɛtina, Mmʋɔ n jɔ amɩɛ nyienaŋ sɛ n se lɩɩ Ɩsʋɔ biŋbira ŋii wʋ chamɩna wʋ a kɔŋ amɩɛ dʋɔ na? 8 N yela na amɩɛ ayɩɛsa a kalaa takɩɛ ɩ biliŋi lɩɩ amɩɛ dɩsʋbʋ naŋ. N baa fara ɩ fa nfɩɛrɛ sɛ, <Abiraham yɩɛ daa duluŋ bɛ.> Maa tawɩ amɩɛ sɛ, Ɩsʋɔ a dɩlɛ mʋ bʋɛ ŋina yɩɛ ganana bie fa Abiraham. 9 Ba fɩla mʋ dɩkpaŋfa ga jaga dasɛ ŋii lira dʋɔ, daŋ kʋma gaa gaa si bie abama na, baa wʋŋ ga lɔ na baa mʋ lɔ dʋ bʋala naŋ.>>
10 Sɛ jama baa tasɛ ɩ sɛ, <<Sɩnɛ sɛ dɩ n yɩɛ?>>
11 Sɛ Yohane lɩsɛ nʋɔ sɛ, <<Wʋkʋma wʋŋ wʋ wɩɛna gagbasɛ ala na, wʋŋ mʋ garɛ fa wʋŋ wʋ tana na. Sɛ wʋkʋma wʋŋ wʋ wɩɛna adiya dʋɔ na, wʋŋ yɩɛ dɩmʋŋ.>>
12 Lampo lɩɛra gba kɔŋ gaa tawɩ ɩ sɛ wʋŋ sɔ ba Ɩsʋɔ sɔ. Sɛ ba tasɛ ɩ sɛ, <<Wʋkalaasa, sɩnɛ sɛ dɩ n yɩɛ?>>
13 Sɛ Yohane lɩsɛ ba nʋɔ sɛ, <<N baa lɩɛ lampo kii ganaŋkʋ dɩdaga na ɩ lɩɛ na.>>
14 Sɛ yuo yuora baa barɛ gba kɔŋ gaa tasɛ ɩ sɛ, <<Sɩnɛ sɛ dɩ n yɩɛ?>> Sɛ wʋ lɩsɛ ba nʋɔ sɛ, <<N baa ŋɩrɛ wʋrʋ doŋ dʋɔ lɩɛ wʋ aterembie yaa n baa yɩɛ akarɩɛ jaga wʋrʋ. N yela amɩɛ asa a su amɩɛ kɩmtʋɔ.>>
15 Na bakpa baa a kɩɛ Nkpalɩɛrɛ wʋŋ gbɩɛ yela baa fa nfɩɛrɛ sɛ Yohane n nyina Kirisito3:15 Yudatina a yagɛ Kirisito sɛ Mesaya wʋŋ. 16 Sɛ wʋ tawɩ bakpa baa sɛ, <<Maŋ bɩrɛ maa mʋ lɩŋ sɔ amɩɛ Ɩsʋɔ sɔ. Ama wʋŋ wʋ a kɔŋ ma wʋrʋgbɩɛ na yɩɛ wʋ janɛ kii maŋ, ma n daga na maa luuŋ buoli wʋ asibita ganyasɛ ɛ. Wʋŋ bɩrɛ, Ɩsʋɔ Feliŋ ŋii na bʋala sɛ wʋ a mʋ sɔ amɩɛ. 17 Wʋ chamɩna bʋrʋ gafalɩsa wʋ pam naŋ na wʋ a mʋ fala lɩsɛ gamɩsɛ lɩɩ duofu naŋ ŋɩ dɩkpalaŋ naŋ, na wʋ a kui bie ŋii dʋ wʋ dichonkon naŋ. Ama duofu ŋii bɩrɛ, wʋ a tʋ ŋɛ bʋala gaa gaa dum na naŋ.>> 18 Yohane pala gbɩɛsɛ fɔɩ dʋɔ tawɩ dʋ bakpa sɛ wʋ tawɩ Ɩsʋɔ Wɩɛ Abama ŋii fa ba.