1 Ŋina wʋrʋgbɩɛ na, Yesu pala dɩɛsɛ ajanɩɛ na dɩɛsɛ bisi naŋ, wʋ a tawɩ Ɩsʋɔ Juori gaa dʋɔ Wɩɛ Abama ŋii. Na wʋ kpalɛnara gifi bala baa cha kpi wʋ dʋɔ, 2 dɩmʋŋ sɛ ala barɛ baa wʋ cha gɩŋ feliŋ sʋbʋ lɩɩ ba tɩba, na baa wʋ chɔ ba lʋmɩɛ. Ala bana barɛ n nyina Mariya [wʋŋ baa yagɛ sɛ Magadalini] sɛ feliŋ sʋbʋ lɩkaarɛ n cha lɩɩ wʋ tɩba na. 3 Yowana, Kusa alʋ wʋŋ wʋ yɩɛ Juo Hɛrɔdɩ kɩɛra bɩnɛ na, Susana na fɔɩ baa ba kakaa na. Dɩmʋŋ ala bana n chamɩna ba tɩŋtɩŋ ba abʋrɩ baa tʋm Yesu na wʋ kpalɛnara.

4 Gʋ bakpa fɔɩ lɩɩ akpie dʋɔ akpie dʋɔ kɔŋ gaa sila Yesu jaŋ na, sɛ wʋ jɔ ba diduu sɛ, 5 <<Farɩdɛ wʋrʋ n ju na wʋ a ga ŋmati wʋ adiya bie. Gʋ wʋ a ŋmati na, bie ŋii ŋarɛ sala gbɩɛ laraŋ sɛ bakpa pala ŋɩ dʋɔ sɛ jimbisi kɔŋ gaa tɔɔsɩ ŋɩ kpiniŋ di. 6 Sɛ ŋarɛ sala bʋɛ ŋii tɩɛra n bɔla dʋɔ ɔ. Ŋɩ tu sɛ ŋɩ sɩŋ. Akala takɩɛ ŋɩ n yu tibi ga fɩɛsa a. 7 Sɛ ŋarɛ dʋɔ sala sɔba tibi dʋɔ sɛ sɔba na adiya bie ŋii tu bʋga, ama sɔba ŋii bɩɩ ŋɩrɛ ŋɛ. 8 Dɩmʋŋ sɛ ŋarɛ dʋɔ sala tibi bam dʋɔ. Ŋɩ tu bɩɩ sɛ ŋɩ si bie gafie kii ŋii wʋ ŋmati na.>> Sɛ Yesu tawɩ ba sɛ, <<Wʋŋ wʋ wɩɛna dɩla na, wʋ n nyii.>>

9 Sɛ Yesu kpalɛnara baa tasɛ ɩ diduu gaa tie. 10 Sɛ Yesu lɩsɛ ba nʋɔ sɛ, <<Amɩɛ bɩrɛ, wʋ mʋ Ɩsʋɔ Juori gaa asiri wɩɛ ŋii kalaa amɩɛ, ama baa ba kakaa na bɩrɛ, aduuna naŋ sɛ ma mʋ tawɩ fa ba.>> Dɩmʋŋ dʋɔ

<<Baa kɩɛ bɩrɛ ama baa na a,

baa nyii ama baa nyii tie e.>>

11 Sɛ Yesu tawɩ ba sɛ, <<Diduu gaa tie n nyina sɛ, adiya bie ŋii n nyina Ɩsʋɔ wɩɛ ŋii. 12 Adiya bie ŋii ŋɩ sala gbɩɛ naŋ na n nyina baa ba nyii Ɩsʋɔ wɩɛ na, sɛ Sɩtanɩ a gaa lɩsɛ lɩɩ ba agela naŋ. Dɩmʋŋ dʋɔ ba n dɩlɛ lɩɛ Ɩsʋɔ wɩɛ ŋii di na ba yu nkpa a. 13 Sɛ ŋii ŋɩ sala bʋɛ tibi dʋɔ na n nyina baa ba nyii Ɩsʋɔ wɩɛ, sɛ baa mʋ asadi mʋ lɩɛ ŋɛ bʋdʋŋdʋlʋŋ. Ama gʋ wɩɛ ŋii n pɩsɛ ba agela naŋ dʋɔ baa sala ba lɩɛ di naŋ. Lɔ tɩba kɔŋ ba dʋɔ na, sɛ baa kena ba lɩɛdi naŋ yela. 14 Bie ŋii ŋɩ sala sɔba tibi dʋɔ na n nyina baa ba nyii Ɩsʋɔ wɩɛ, ama ba yela sɛ chawʋ naŋ wɩɛ bisi, dulunya abʋrɩ jawʋ, na asadi dʋɔ baa dɩlɛ baa bɩɩ ba lɩɛ di naŋ ŋ. 15 Sɛ ŋii ŋɩ sala tibi bam dʋɔ na n nyina baa ba mʋ digela bam lɩɛ Ɩsʋɔ wɩɛ ŋii sɛ baa di ŋɩ dʋɔ. Baa sɩŋ na doŋ sɛ baa si bie.>>

16 Sɛ Yesu ju dʋɔ tawɩ sɛ, <<Wʋrʋ baa tʋ fitila na wʋ a mʋ dinyiŋkpa fu ga dʋɔ yaa wʋ a mʋ dʋ mpa tie e. Ama wʋ a mʋ jaga fitila dɩjagatɩŋ bɛ na gaa ŋmaŋi fa baa baa jʋʋ waa gaa dʋɔ na. 17 Akala takɩɛ wɩɛ ŋii ŋɩ wɩsaɩ na, ŋii lɩɩ na baa na. Dɩmʋŋ sɛ bʋrʋkʋma gaa ba fu ga dʋɔ na, gaa fulu dʋɔ na baa na. 18 Dɩmʋŋ dʋɔ, n kɩɛ na dieli lɩɩna wɩɛ ŋii ɩ nyii na dʋɔ. Wʋkʋma wʋŋ wʋ wɩɛna bʋrʋ garɛ na, Ɩsʋɔ aja mʋ ŋarɛ kpi wʋ dʋɔ. Ama wʋkʋma wʋŋ wʋ tana na, pii ŋii wʋ wɩɛna ŋɛ na, Ɩsʋɔ aja lɩɛ lɩɩ wʋ jaŋ.>>

19 Sɛ Yesu wʋnaa na wʋnabie kɔŋ baa ja ɩ. Ama jama baa dʋɔ, ba n yu gbɩɛ ju wʋ jaŋ ŋ. 20 Sɛ wʋrʋ tawɩ ɩ sɛ, <<Nnaa na nnabie sɩmɩɛɩ waa gaa asanaŋ baa ja baa na nyaŋ.>>

21 Sɛ wʋ lɩsɛ nʋɔ sɛ, <<Manaa na manabie n nyina baa baa nyii Ɩsʋɔ wɩɛ sɛ baa di ŋɩ dʋɔ.>>

22 Wɩɩ darɛ Yesu tawɩ wʋ kpalɛnara baa sɛ, <<N yela dɩ tɩɛsɛ lɩɩ gaa ju gatɩɛsa, sɛ ba jʋʋ buori naŋ sɛ ba laŋ.>> 23 Gʋ baa ju na, Yesu duo asoroŋ. Sɛ feliŋ janɛ jɔ lɩɩ gaa dʋɔ sɛ dɩ jɔ apaa dʋ buori gaa naŋ hali ga ja gaa muru sɛ ba dɩsɛ chɩbɛ.

24 Sɛ wʋ kpalɛnara baa feŋsi ɩ tawɩ sɛ, <<Kpaŋjuo, Kpaŋjuo, dɩ ja dɩ muru.>> Sɛ wʋ kʋlʋ fʋba feliŋ na apaa ŋii dʋɔ sɛ ŋɩ n cha kuruŋ sɛ ŋɩ cha kuruŋ. 25 Sɛ wʋ tasɛ ba sɛ, <<Amɩɛ lɩɛdi wɩɛ le?>> Sɛ dɩ yɩɛ ba doba sɛ nyɩŋtɩɛ chaŋ ba, sɛ ba tasɛ dɔŋa sɛ, <<Wʋkpa wʋ Mmʋɔ mɩnaŋ sɛ wʋ a fʋba sɛ apaa na lɩŋ a nyii wʋ jaŋ?>>

26 Yesu na wʋ kpalɛnara baa tɩɛsɛ Galaliya lɩɩ ju gatɩɛsa gaa ga wɩɛ Gerasa tibi dʋɔ. 27 Gʋ Yesu lɩɩ buori gaa naŋ na, dɩmaŋ sɛ baalɛ wʋrʋ wʋŋ wʋ lɩɩ dɩɛ gaa naŋ, sɛ feliŋ sʋbʋ wɩɛ wʋ tɩba na kɔŋ wʋ jaŋ. Baalɛ wina pala diboloŋ taŋgɩlɛ, wʋ aa cha waa dʋɔ ɔ, ama bʋɔsɛ naŋ sɛ wʋ chaɩ. 28 Gʋ wʋ na Yesu na, wʋ kuusi sɛ wʋ se gaa luuŋ wʋ dʋna dʋɔ wʋ asanaŋ, sɛ wʋ kuusi tawɩ sɛ, <<Yesu, Ɩsʋɔ Wʋjanɛ Bu. Be sɛ maŋ na nyaŋ wɩɛna dɩ yɩɛ? Maa sʋlʋ nyaŋ, n baa nyala maŋ.>> 29 Wʋ tawɩ dɩmʋŋ, akala takɩɛ Yesu dʋ feliŋ sʋbʋ wʋŋ sɛ, <<Nyaŋ feliŋ sʋbʋ lɩɩ baalɛ wʋŋ tɩba.>> Ŋɩ wɩɛ takɩɛ baa mʋ dɩgbaraŋgbaraŋ pɔgʋ wʋ pamɩɛ na nafara yela baa gara ɩ bɩrɛ. Ama saŋa kʋma gaa feliŋ sʋbʋ wʋŋ aja jigisi wʋ wʋsɛ na, wʋ a karɩɛ agbaraŋgbaraŋ ŋii, sɛ ŋii mʋ ɩ ju ifuli dʋɔ.

30 Sɛ Yesu tasɛ ɩ sɛ <<Sɩnɛ sɛ baa yagɛ nyaŋ?>> Sɛ wʋ lɩsɛ nʋɔ sɛ, <<Bɔlɩŋ>> Akala takɩɛ feliŋ sʋbʋ bɔlɩɛɩ ma tɩba. 31 Sɛ feliŋ sʋbʋ wʋŋ sʋlʋ ɩ sɛ wʋ n baa dʋ ba na baa ga jʋʋ bʋɔ gaa ga taŋ gɩtɛ na naŋ.

32 Na ɔvaaba barɛ wɩɛ bʋrɔŋ garɛ jaŋ baa di. Sɛ feliŋ sʋbʋ wʋŋ sʋlʋ Yesu sɛ, <<Gɩŋ daa na dɩ ga jʋʋ ɔvaaba dikpeŋ baa tɩba.>> Sɛ Yesu fa ba gbɩɛ sɛ ba lɩɩ baalɛ wʋŋ tɩba ga jʋʋ ɔvaaba baa tɩba. 33 Gʋ feliŋ sʋbʋ wʋŋ lɩɩ baalɛ wʋŋ tɩba ga jʋʋ ɔvaaba baa tɩba na, sɛ ba tibi bʋrɔŋ se ga jʋʋ lɩɩ naŋ sɛ ba sɩŋ.

34 Gʋ ɔvaaba baa kɩɛra na ŋii ŋɩ tibi na, ba se ju dɩɛ gaa naŋ na fʋɔsɛ naŋ ga tawɩ wɩɛ ŋii fa bakpa. 35 Dɩmʋŋ dʋɔ, bakapa ju ga kɩɛ ŋii ŋɩ tibi na. Gʋ ba kɔŋ Yesu jaŋ na, ba na baalɛ wʋŋ feliŋ sʋbʋ fɔɩ cha ba wɩɛ wʋ tɩba na kparɛ wʋ fuona gagba wʋ chaɩ Yesu jaŋ, sɛ nyɩŋtɩɛ chaŋ ba. 36 Baa ba na ŋii ŋɩ tibi na, ba kalaa fa baa ba kɔŋ dɩmaŋ na ganaŋkʋ Yesu chɔ baalɛ wʋŋ feliŋ sʋbʋ wɩɛ wʋ tɩba na. 37 Sɛ bakpa baa ba chaɩ Gerasa tibi dʋɔ kpiniŋ sʋlʋ Yesu sɛ wʋ n lɩɩ ba tibi dʋɔ. Akala takɩɛ nyɩŋtɩɛ fɔɩ chaŋ ba. Sɛ Yesu jʋʋ buori naŋ laŋ.

38 Sɛ baalɛ wʋŋ feliŋ sʋbʋ lɩɩ wʋ tɩba na sʋlʋ Yesu sɛ wʋ a kpaŋ ɩ. Sɛ Yesu pɩɛ sɛ wʋ tawɩ ɩ sɛ, 39 <<Bɔrɛ ju n dɩɛ naŋ na nyaa ga tawɩ ŋii Ɩsʋɔ yɩɛ fa nyaŋ na.>> Dɩmʋŋ dʋɔ baalɛ wʋŋ bɔrɛ ju ga tawɩ ŋii Yesu yɩɛ fa ɩ na dɩɛ gaa kpiniŋ naŋ.

40 Gʋ Yesu na wʋ kpalɛnara bɔrɛ tɩɛsɛ kɔŋ gatɩɛsa na, jama baa yɩɛ ɩ nsa-nsa, akala takɩɛ ba kɩɛna wʋ gbɩɛ bɛ. 41 Yudatina tʋm danɛ naŋ bɩnɛ wʋrʋ baa yagɛ ɩ sɛ Yariyosi kɔŋ gaa luuŋ Yesu nafara tie, sɛ wʋ sʋlʋ ɩ sɛ wʋŋ kɔŋ wʋ waa dʋɔ, 42 akala takɩɛ mabu galibie wʋ dʋŋdʋlʋŋ wʋŋ wʋ a yɩɛ bɩŋsɛ gifi ala na aja wʋ a sɩŋ. Gʋ Yesu a ju na, jama baa a gɩŋtɩ ɩ. 43 Alʋ wʋrʋ asima ajɔyɩ bɩŋsɛ gifi ala sɛ wʋrʋ n dɩlɛ chɔ ɩ na cha wʋ wɩɛ dɩmaŋ. 44 Wʋ lɩɩ Yesu wʋrʋgbɩɛ sɛ wʋ tapʋ wʋ adugbe gagba nʋɔ, gabʋanaŋ sɛ asima ŋii ŋii jɔ ɩ na kena yela.

45 Sɛ Yesu tasɛ sɛ, <<Mmʋɔ n tapʋ maŋ?>> Sɛ ba kpiniŋ ba pɩɛ sɛ naa baa a. Sɛ Petero tawɩ sɛ, <<Kpaŋjuo, jama logo nyaŋ baa gɩŋtɩ nyaŋ.>>

46 Ama Yesu tawɩ sɛ, <<Wʋrʋ tapʋ maŋ, akala takɩɛ wʋ jiŋ wʋ wʋsɛ naŋ gʋ yikuo ŋarɛ lɩɩ wʋ tɩba.>>

47 Alʋ wʋŋ na gʋ wʋ aa dɩlɛ wɩsɛ wʋ wʋsɛ ɛ, sɛ wʋ mʋ wʋsɛ selesi gaa luuŋ Yesu nafara tie. Sɛ wʋ tawɩ bakpa baa kpiniŋ asanaŋ bʋrʋ gaa dʋɔ sɛ wʋ tapʋ ɩ na, na ganaŋkʋ gabʋanaŋ wʋ yu alaŋfiya na. 48 Sɛ Yesu tawɩ ɩ sɛ, <<Alʋ, n lɩɛdi chɔ nyaŋ. Pala wʋsɛfɩɛ naŋ.>>

49 Gʋ Yesu saŋ wʋ a tawɩ na, wʋrʋ lɩɩ Yarosi wʋŋ wʋ yɩɛ Yudatina tʋm danɛ naŋ bɩnɛ na waa dʋɔ kɔŋ gaa tawɩ ɩ sɛ, <<Nbu galibie sɩŋ. N baa ti nyala wʋkalaasa wʋŋ.>>

50 Gʋ Yesu nyii wɩɛ ŋii na, sɛ wʋ tawɩ Yariyosi sɛ, <<N baa yela nyɩŋtɩɛ a chaŋ nyaŋ, nyaŋ bɩrɛ lɩɛ di, wʋ a yu lʋm chʋɔ.>>

51 Gʋ wʋ ga tala Yariyosi waa dʋɔ na, wʋ n yela wʋrʋ a jʋʋ kpi wʋ dʋɔ ɔ amʋɔ Petero, Yohane na Jamesi na galibie wʋŋ lʋrʋda. 52 Bakpa baa kpiniŋ cha baa wii yela baa yɩyɩɛ. Sɛ Yesu tawɩ ba sɛ, <<N yela wiiniŋ, wʋ n sɩŋ ŋ, ama wʋ duo bɛ.>>

53 Sɛ bakpa baa kpiniŋ mʋɩ ɩ, akala takɩɛ ba jiŋ gʋ galibie wʋŋ sɩŋ. 54 Sɛ Yesu chaŋ atatɛ wʋŋ tawɩ sɛ, <<Mabu, kʋlʋ.>> 55 Sɛ wʋ sʋbʋ bɔrɛ kɔŋ wʋ tɩba, gabʋanaŋ sɛ wʋ kʋlʋ. Sɛ Yesu tawɩ ba sɛ n ja adiya fa ɩ na wʋ a di. 56 Sɛ dɩ yɩɛ wʋ lʋrʋda baa doba, ama wʋ dʋ ba sɛ ba n baa tawɩ wʋrʋ bʋrʋ gaa ga tibi na.