1 Gʋ Yesu kalaa wʋ kpalɛnara gifi bala baa taŋ na, wʋ lɩɩ dɩmaŋ ju ga kalaa, sɛ wʋ tawɩ Ɩsʋɔ Wɩɛ Abama ŋii Galaliya dɩɛsɛ naŋ.

2 Gʋ Yohane Ɩsʋɔ Sɔrɛ wɩɛ danɛ dɩtʋɔtɩŋ sɛ wʋ nyii ŋii Kirisito a yɩɛ na, wʋ kpiri wʋ kpalɛnara 3 sɛ ba n ga tasɛ ɩ sɛ, <<Nyaŋ n nyina wʋŋ wʋ a kɔnɛ na yaa dɩ n kɩɛ wʋ fɔlɛ gbɩɛ?>>

4 Sɛ Yesu lɩsɛ nʋɔ sɛ, <<N bɔrɛ ju ga tawɩ Yohane ŋii ɩ naa na ŋii ɩ nyii sɛ, 5 bataŋpʋna asa fulu, buobi aba palɛ, achalaŋa yu lʋm chʋɔ, akpawu a nyii wɩɛ, atatina feŋ lɩɩ sɩŋ naŋ, sɛ ayɔŋtina gba nyii Ɩsʋɔ wɩɛ abama ŋii. 6 Kusee n nyina wʋkʋma wʋŋ ma dʋɔ wʋ aa yela wʋ lɩɛdi naŋ ŋ.>>

7 Gʋ Yohane kpalɛnara baa a bɔrɛ na, Yesu fara wʋ a tawɩ Yohane wʋsɛ dʋɔ wɩɛ wʋ a fa jama baa sɛ, <<Be sɛ ɩ ju ifuli dʋɔ ga kɩɛ? Ɩ ju ga kɩɛ ŋmɩrɛ ŋii feliŋ a jʋɔ naa? 8 Sɛ naa dɩmʋŋ na, be sɛ ɩ ju ga kɩɛ? Yaa baalɛ wʋŋ wʋ fuona gagbasɛ abama naa? Aye, baa ba fuona gagbasɛ abama ba chaɩ juorigbɩɛ na. 9 Be sɛ ɩ ju ga kɩɛ? Ɩsʋɔ ɔja? Gasiŋteŋ, maa tawɩ amɩɛ sɛ, Yohane wʋŋ ɩ naa na kii Ɩsʋɔ ɔja. 10 Yohane Ɩsʋɔ Sɔrɛ wina sɛ ba sabɩɛ wʋ wʋsɛ dʋɔ wɩɛ Ɩsʋɔ wɩɛ naŋ sɛ,

<<Maa kpiri ma gabʋɔ pala nya asanaŋ

na wʋ a desina gbɩɛ si fa nyaŋ.>>✝

11 Maa tawɩ sɛ n nyii na dieli sɛ Yohane Ɩsʋɔ Sɔrɛ yɩɛ wʋjanɛ kii wʋkʋma wʋŋ ba lʋrʋ ɩ. Ama wʋŋ wʋ yɩɛ wʋ pii Ɩsʋɔ Juori naŋ na, kii ɩ. 12 Lɩɩ Yohane saŋa mʋ gaa tala jaŋ, bakpa chɩdɩsɛ baa ja sɛ baa jʋʋ Ɩsʋɔ Juori gaa naŋ dʋɔ, baa ba mʋ dɩsɛ chɩbɛ chɩdɩsɛ na aaŋ ja baa yu gbɩɛ jʋʋ. 13 Ɩsʋɔ bajana na Mosesi mbara ŋii kpiniŋ fɩla tawɩ Ɩsʋɔ Juori gaa wɩɛ pɔɩ sɛ Yohane kɔnɛ. 14 Sɛ ɩ ja sɛ ɩ lɩɛ dʋ na, Yohane wina n nyina Eliya wʋŋ wʋ a kɔŋ na. 15 Wʋkʋma wʋŋ wʋ wɩɛna dɩla na, wʋ n nyii.

16 Sɛ Yesu ju dʋɔ tawɩ sɛ be sɛ maa mʋ jaŋ gɩnanaŋ gana mʋ kɩɛsɩna? Ba kɩɛna bɛ takɩɛ bachaasɛ baa ba chaɩ gɩyɩɛ naŋ baa yagɛ dɔŋa baa tawɩ sɛ,

17 <<Dɩ fʋlʋ galɩɛbɩ fa amɩɛ,

ama ɩŋ sʋɛ ɛ,

Dɩ kpie lie numba fa amɩɛ,

ama ɩŋ wii i.>>

18 Gʋ Yohane Ɩsʋɔ Sɔrɛ wʋŋ kɔnɛ na, wʋ n di adiya a, sɛ wʋ n nyʋɔ sʋlʋŋ ŋ, sɛ ɩ tawɩ sɛ, <<Feliŋ sʋbʋ wɩɛ wʋ tɩba. 19 Wʋkpa Bu wʋŋ kɔnɛ na, wʋ a di sɛ wʋ a nyʋɔ, sɛ ɩ tawɩ sɛ n kɩɛ, wʋ yɩɛ diiri na sʋlʋŋ nyʋɔrɛ. Wʋ yɩɛ lampo lɩɛra na dɩsʋbʋ yɩɛra ba dɩɛtɛ. Bakpa baa ba wɩɛna Ɩsʋɔ kpiŋjim na, ba ayɩɛsa aja yela na baa tawɩ sɛ ŋɩ wɩɛ dieli.>>

20 Sɛ Yesu fara wʋ a tawɩ wʋ a baŋ bakpa baa ba wɩɛ dɩɛsɛ ajanɩɛ ŋii wʋ yɩɛ adaŋgana fɔɩ ŋɩ dʋɔ na, akala takɩɛ ba n biliŋi lɩɩ ba dɩsʋbʋ naŋ ŋ. 21 Sɛ wʋ tawɩ sɛ, <<Korasintina, amɩɛ lakʋ! Betisayidatina, amɩɛ lakʋ! Nafʋɔ adaŋgana ŋii ma yɩɛ amɩɛ tɩba na sɛ ma yɩɛ Tirosi na Sidoŋ dɩmʋŋ na, nafʋɔ baa fu kotoku gagba na baa susaa npʋɔ na ŋii kalaa takɩɛ ba biliŋi lɩɩ ba dɩsʋbʋ naŋ taŋgɩlɛ. 22 Ama maa tawɩ amɩɛ Korasintina na Betisayidatina sɛ, Ɩsʋɔ wɩɛ di wɩɩ gaa na, wʋ a fɔŋɩ amɩɛ dɩlɛ na dieli kii Tirositina na Sidoŋtina. 23 Amɩɛ Kapeniyumtina, ɩ jiŋ sɛ Ɩsʋɔ aja jiŋna amɩɛ Ɩsʋɔ adugbe bɛ? Aye, Ɩsʋɔ aja mʋ amɩɛ ju awʋrʋfʋɔ bʋala naŋ bɛ. Nafʋɔ adaŋgana ŋii ma yɩɛ amɩɛ tɩba na sɛ ma yɩɛ Sodom na, nafʋɔ ga saŋ ga wɩɛ gaa lɩɩ jaŋ. 24 Ama maa tawɩ amɩɛ Kapeniyumtina sɛ, Ɩsʋɔ wɩɛ di wɩɩ gaa na, wʋ a fɔŋɩ amɩɛ dɩlɛ na dieli kii Sodomtina.>>

25 Saŋa gana sɛ Yesu tawɩ sɛ, <<Majuo, Ɩsʋɔ adugbe na tie tɛ maa kalɩɛ nyaŋ gʋ nya mʋ wɩɛ ŋina wɩsɛ wɩɛ jimɩra na nfɩɛrɛtina, sɛ nya lɩsɛ kalaa bachaasɛ bisi. 26 Ɛɛŋ, Majuo, ŋii nya yɩɛ na su nya asa.>>

27 <<Majuo mʋ abʋrɩ kpiniŋ dʋ ma pam naŋ. Wʋrʋ ba jiŋ Bu wʋŋ ŋ, amʋɔ Juo wʋŋ nyiŋeŋ. Dɩmʋŋ sɛ wʋrʋ ba jiŋ Juo wʋŋ ŋ, amʋɔ Bu wʋŋ nyiŋeŋ na baa Bu wʋŋ a jawʋ na sɛ wʋ a lɩsɛ Juo wʋŋ kalaa ba.>>

28 Sɛ Yesu ju dʋɔ tawɩ sɛ, <<N kɔŋ ma jaŋ, amɩɛ baa dɩ bɩɩ amɩɛ lɩɩna amɩɛ gasʋlasɛ ayuntina dʋɔ, maa yela na ɩ fɩɛsɛ. 29 N mʋ ma gasʋla na ɩ kpalɩɛna lɩɩ ma jaŋ, akala takɩɛ ma fʋʋ sɛ maa kɔna ma wʋsɛ tie ma digela naŋ, na ɩ yu fɩɛsɛ fa amɩɛ sʋbʋɛ. 30 Akala takɩɛ ma gasʋla taŋ doŋ na sɩlɛ sɛ ga taŋ yuŋ ŋ.>>