1 Fɩɛsɛ wɩɩ garɛ, Yesu cha wʋ dɔŋ kiliŋgbe fʋɔ garɛ naŋ. Na dusoŋ chaŋ wʋ kpalɛnara baa, dɩmʋŋ dʋɔ ba fara baa jaɩ kiliŋgbe ŋii ŋarɛ baa tawʋ. 2 Gʋ Farasitina baa barɛ na dɩmʋŋ na, ba tawɩ Yesu sɛ, <<Kɩɛ, n kpalɛnara baa a yɩɛ ŋii daa mbara n fa gbɩɛ sɛ dɩ n yɩɛ Fɩɛsɛ wɩɩ.>>

3 Sɛ Yesu tasɛ ba sɛ, ɩŋ karaŋ Ɩsʋɔ Wɩɛ ŋii naŋ ŋii Dawidi yɩɛ saŋa gaa dusoŋ a kʋ wʋ na wʋ dɔŋa naa? 4 Wʋ ju Ɩsʋɔ tʋm danɛ gaa naŋ sɛ wʋ na wʋ dɔŋa ga tawʋ bodobodo gaa ba yɩɛ ga chɩrɩchɩrɩ fa Ɩsʋɔ yela Mosesi mbara n fa gbɩɛ sɛ ba n tawʋ ʋ, amʋɔ Ɩsʋɔ seina nyiŋeŋ. 5 Yaa ɩŋ karaŋ ta Mosesi mbara ŋii naŋ sɛ, Ɩsʋɔ seina wɩɛ Ɩsʋɔ tʋm danɛ naŋ Fɩɛsɛ wɩɩ kʋma baa yɩɛ dɩtʋm baa warɩɛ Fɩɛsɛ wɩɩ gaa, ama baa na ba takɩɛ ba di dɩpʋɛ ɛ? 6 Maa tawɩ amɩɛ sɛ wʋrʋ wɩɛ jɩna wʋ yɩɛ wʋ janɛ kii Ɩsʋɔ tʋm danɛ gaa. 7 Nafʋɔ ɩ nyii wɩɛ ŋii Ɩsʋɔ tawɩ Sabɩɛwɩɛ ŋii naŋ tie na sɛ, <<Maa ja gɩyɔŋ wɩɩ bɛ naa gadiesa a.✝ Nafʋɔ ɩɩ fuu baa ba n yɩɛ dɩsʋbʋ na dɩpʋɛ ɛ. 8 Dɩmʋŋ dʋɔ, Wʋkpa Bu wʋŋ yɩɛ Kpaŋjuo Fɩɛsɛ wɩɩ dʋɔ bɛ.>>

9 Sɛ Yesu lɩɩ dɩmaŋ ga jʋʋ Yudatina tʋm danɛ naŋ. 10 Na baalɛ wʋrʋ wɩɛ dɩmaŋ wʋ pam sɩŋ. Na bakpa barɛ wɩɛ dɩmaŋ baa ja sɛ baa pʋɩ Yesu. Dɩmʋŋ dʋɔ ba tasɛ ɩ sɛ, <<Daa mbara fa gbɩɛ sɛ dɩ n chɔ Fɩɛsɛ wɩɩ?>>

11 Sɛ Yesu lɩsɛ ba nʋɔ sɛ, <<Amɩɛ tɩba wʋrʋ wɩɛna fie sɛ wʋ sala bʋɔ naŋ Fɩɛsɛ wɩɩ na, wʋ aa lɩsɛ ɩ? 12 Wʋkpa yɩɛ wʋ kpari kii fie. Dɩmʋŋ dʋɔ mbara fa gbɩɛ sɛ dɩ n yɩɛ dɩbam Fɩɛsɛ wɩɩ.>>

13 Sɛ Yesu tawɩ baalɛ wʋŋ sɛ, <<Tɩɛŋɩ n pam.>> Sɛ wʋ tɩɛŋɩ sɛ wʋ pam gaa yɩɛ doŋ takɩɛ ga baŋbaŋ na. 14 Ama Farasitina baa lɩɩ tʋm danɛ gaa naŋ ga mʋ sawʋra ganaŋkʋ baa kʋ Yesu na.

15 Gʋ Yesu jiŋ ba sawʋra na, wʋ lɩɩ dɩmaŋ. Bakpa fɔɩ kpaŋ ɩ sɛ wʋ chɔ lʋmɩɛtina baa kpiniŋ. 16 Sɛ Yesu jɔ ba nyienaŋ sɛ, ba n baa tawɩ wʋ tɛ wʋŋ wʋ yɩɛ na. 17 Ŋina yɩɛ dɩmʋŋ na wɩɛ ŋii Ɩsʋɔ pala na ɔja Yisaya dʋɔ tawɩ na a kɔŋ tɩba sɛ,

18 <<Kɩɛ, wina n nyina ma tʋmɩrɛ wʋŋ ma lɩsɛ,

wʋŋ maa ja wʋ wɩɛ, ma asa su wʋ dʋɔ.

Maa mʋ ma Feliŋ fa ɩ

na wʋ a tawɩ wɩɛ ŋɩ gbɩɛ dʋɔ fa baa ba ba yɩɛ Yudatina.

19 Wʋ aa di noro o, yaa wʋ aa kuusi i,

wʋrʋ baa nyii wʋ lofu dɩɛ naŋ gbɩɛsɛ bisi dʋɔ ɔ.

20 Wʋ aa jaɩ ŋmɩrɛ ganyɔŋsa a,

sɛ wʋ aa duŋsi fitila ganya gaa gaa cham ama gaa naa na a.

Ga tala gʋ wʋ a yela na wɩɛ ŋɩ gbɩɛ dʋɔ a di dɩlɛ.

21 Wʋ yɩrɛ naŋ sɛ baa ba ba yɩɛ Yudatina aja baa yu tamaa.>>✝

22 Sɛ bakpa mʋ baalɛ wʋrʋ feliŋ sʋbʋ wɩɛ wʋ tɩba sɛ wʋ yɩɛ ɔtaŋpʋ na namu kɔna Yesu. Sɛ wʋ chɔ ɩ, sɛ wʋ tawɩ yela wʋ a na. 23 Sɛ dɩ yɩɛ bakpa baa kpiniŋ doba sɛ ba tasɛ sɛ, <<Wina yɩɛ Dawidi ganana bie wʋŋ bɛ yaa?>>

24 Ama gʋ Farasitina baa nyii ŋina na, ba tawɩ sɛ, <<Belesebu* wʋŋ wʋ yɩɛ feliŋ sʋbʋ bɩnɛ na yikuo sɛ wʋ chamɩna wʋ a geŋ feliŋ sʋbʋ wʋ a lɩɩ bakpa tɩba.>>

25 Ama gʋ Yesu jiŋ ba nfɩɛrɛ na sɛ wʋ tawɩ ba sɛ, <<Juori kʋma gaa ga kpara ga wʋsɛ tɩba gaa yuo dɔŋa na, gaa salɩɛ. Dɩmʋŋ sɛ dɩɛ janɛ yaa waa kʋma gaa ga kpara ga wʋsɛ tɩba gaa yuo dɔŋa na, gaa salɩɛ. 26 Sɛ Sɩtanɩ geŋ Sɩtanɩ na, wʋ a yuo wʋ wʋsɛ. Aja yɩɛ sɩnɛ na wʋ juori a sɩŋ ga nafara dʋɔ. 27 Sɛ ɩ tawɩ sɛ Belesebu yikuo sɛ ma chamɩna maa gɩŋ feliŋ sʋbʋ maa lɩɩ bakpa tɩba na, dɩmʋŋ bɩrɛ Mmʋɔ yikuo sɛ amɩɛ kpamɩra dʋɔ chamɩna baa gɩŋ feliŋ sʋbʋ baa lɩɩ bakpa tɩba? Sɛ dɩ yɩɛ dɩmʋŋ bɩrɛ baa aaŋ ja baa yɩɛ amɩɛ wɩɛ dira. 28 Ama sɛ Ɩsʋɔ Feliŋ sɛ ma chamɩna maa gɩŋ feliŋ sʋbʋ maa lɩɩ bakpa tɩba na, dɩmʋŋ bɩrɛ Ɩsʋɔ Juori kɔŋ amɩɛ jaŋ.>>

29 <<Yaa wʋrʋ taŋ wʋ a dɩlɛ ju doŋ-tɛ waa dʋɔ ga mʋ wʋ gapatɩɛ ɛ amʋɔ wʋ chɩŋkpɩɛ pɔgʋ ɩ pɔɩ na wʋ a dɩlɛ ŋmɛlɩ ɩ.>>

30 Sɛ Yesu ju dʋɔ tawɩ sɛ, <<Wʋkʋma wʋŋ wʋ n kpi ma dʋɔ na, wʋ a kʋlʋ sɩŋ ma dʋɔ. Wʋkʋma wʋŋ wʋ aa kʋla wʋ a chɔna maŋ ŋ, a yasɩŋ tɩba bɛ.>> 31 Dɩmʋŋ dʋɔ maa tawɩ amɩɛ sɛ, Ɩsʋɔ aja mʋ dɩsʋbʋ kʋma gaa wʋkpa aja yɩɛ na mbusu wɩɛ ŋii wʋ a tawɩ na chɩɛ ɩ. Ama wʋkʋma wʋŋ wʋ a tawɩ mbusu wɩɛ baŋ Ɩsʋɔ Feliŋ na bɩrɛ, wʋ aa mʋ chɩɛ ɩ. 32 Wʋkʋma wʋŋ wʋ a tawɩ wɩɛ baŋ Wʋkpa Bu wʋŋ na, Ɩsʋɔ aja mʋ chɩɛ ɩ. Ama wʋkʋma wʋŋ wʋ a tawɩ mbusu wɩɛ baŋ Ɩsʋɔ Feliŋ na bɩrɛ, wʋ aa mʋ chɩɛ ɩ dulunya gana naŋ yaa dulunya gaa gaa kɔŋ na naŋ ŋ.

33 Sɛ Yesu ju dʋɔ tawɩ sɛ, <<Yɩɛ daŋ gabam na ga bie a yɩɛ abama, yaa yɩɛ daŋ ga sʋbʋ na ga bie a yɩɛ asʋbʋɛ. Akala takɩɛ daŋ gaa bie sɛ ba chamɩna baa jiŋ ga. 34 Ɩ yɩɛ bakpa sʋbʋɛ takɩɛ dʋmɩɛ, sɩnɛ sɛ amɩɛ bakpa sʋbʋɛ a dɩlɛ tawɩ wɩɛ abama? Akala takɩɛ wɩɛ ŋii ŋɩ suu wʋkpa digela naŋ na, ŋii aaŋ lɩɩna wʋ nʋɔ. 35 Wʋkpa bam a lɩsɛ wɩɛ abama ŋii ŋɩ wɩɛ wʋ digela naŋ na asoŋ. Dɩmʋŋ sɛ wʋkpa sʋbʋ gba a lɩsɛ wɩɛ asʋbʋɛ ŋii ŋɩ wɩɛ wʋ digela naŋ na asoŋ. 36 Ama maa tawɩ amɩɛ sɛ Ɩsʋɔ wɩɛ di wɩɩ gaa na, dɩtawɩ jaga kʋma gaa wʋkpa tawɩ na, wʋ a lɩsɛ ga nʋɔ. 37 Akala takɩɛ Ɩsʋɔ aja sɩŋ n dɩ tawɩ dʋɔ bɛ tala n wɩɛ takɩɛ n di dɩlɛ yaa n di dɩpʋɛ.>>

38 Sɛ Farasitina na Mosesi mbara bakalaasa baa barɛ tawɩ Yesu sɛ, <<Wʋkalaasa, dɩɩ ja sɛ dɩɩ na adaŋgana lɩɩ n jaŋ.>>

39 Sɛ Yesu lɩsɛ ba nʋɔ sɛ, <<Amɩɛ nyinaŋ doŋtina na gɩnanaŋ gaa ɩ yɩɛ gɩ baa di gasiŋteŋ fa Ɩsʋɔ, ɩ ja adaŋgana na ɩ na. Ama ɩɩ na ŋarɛ ɛ, amʋɔ ŋii ŋɩ tibi ɔja Yona dʋɔ na. 40 Takɩɛ ganaŋkʋ Yona cha di wɩɛ atoro wiita na yuluma diji janɛ lorinaŋ na, dɩmʋŋ sɛ Wʋkpa Bu wʋŋ gba aja di wɩɛ atoro wiita na yuluma gachaŋ naŋ. 41 Niniwetina aja kʋlʋ sɩŋ fu gɩnanaŋ gana dɩpʋɛ Ɩsʋɔ wɩɛ di wɩɩ. Akala takɩɛ ba nyii Yona wɩɛ na, ba biliŋi lɩɩ ba dɩsʋbʋ naŋ. Kɩɛ, wʋŋ wʋ kii Yona na wɩɛ jɩna. 42 Siba ala Juo aja kʋlʋ sɩŋ na wʋ a fu gɩnanaŋ gana dɩpʋɛ Ɩsʋɔ wɩɛ di wɩɩ. Akala takɩɛ wʋ lɩɩ taŋasɛ gaa nyii Solomoŋ kpiŋjim wɩɛ. Kɩɛ, wʋŋ wʋ kii Solomoŋ na wɩɛ jɩna.>>

43 Sɛ Yesu ju dʋɔ tawɩ sɛ, <<Feliŋ sʋbʋ lɩɩ wʋkpa tɩba na, wʋ dɔŋ ifuli dʋɔ bɛ wʋ a ja dɩchatɩŋ. Sɛ wʋ n yu na, 44 wʋ a tawɩ bɛ sɛ, <Maa ti bɔrɛ ju ma waa gabɩnɛ dʋɔ.>Wʋ bɔrɛ kɔŋ gaa na gʋ wʋrʋ taŋ waa gaa ba desina ga dʋɔ na dieli na, 45 wʋ a bɔrɛ ga mʋ feliŋ sʋbʋ lɩkaarɛ baa ba wɩɛ nyinaŋ doŋ kii ɩ, na baa gaa cha wʋkpa wʋŋ tɩba. Na wʋkpa wina chawʋ naŋ a warɩɛ kii wʋ chawʋ gɩbɩnɩŋ. Dɩmʋŋ sɛ aja yɩɛ fa amɩɛ nyinaŋ doŋ gɩnanaŋ gana.>>

46 Gʋ Yesu saŋ wʋ a tawɩ wʋ a fa jama baa na, wʋnaa na wʋnabie gaa sɩŋ waa gaa asʋŋ baa ja sɛ baa tawɩ wʋ jaŋ. 47 Sɛ wʋrʋ tawɩ ɩ sɛ, <<Kɩɛ, nnaa na nnabie sɩmɩɛɩ waa gaa asʋŋ baa ja sɛ baa tawɩ n jaŋ.>>*

48 Sɛ Yesu tasɛ ɩ sɛ, <<Mmʋɔ n nyina manaa sɛ Mmʋɔ n nyina manabie?>> 49 Sɛ wʋ mʋ wʋ pam kalaa wʋ kpalɛnara baa tawɩ sɛ, <<Kɩɛ, manaa na ma manabie mɩnaŋ. 50 Wʋkʋma wʋŋ wʋ a yɩɛ Majuo wʋŋ wʋ wɩɛ Ɩsʋɔ adugbe jawʋ na n nyina manaa, manabu na madiesi.>>