1 Sɛ Farasitina na Sadukitina barɛ kɔŋ Yesu jaŋ na baa gaa yɩɛ ɩ lɔ tɩba, dɩmʋŋ dʋɔ ba tawɩ ɩ sɛ wʋ n yela na adaŋgana a lɩɩ Ɩsʋɔ adugbe kɔŋ.

2 Sɛ Yesu lɩsɛ ba nʋɔ sɛ, <<Dɩ tala bʋyanɔ na, ɩ tawɩ sɛ, <Duoni tanɩɛ aja yɩɛ dieli akala takɩɛ duoni tanɩɛ chɩbɛ,> 3 sɛ nafo dʋɔ, ɩ tawɩ sɛ, <Jaŋ duoni aja nɩɛ, akala takɩɛ duoni cha sɛ duoni tanɩɛ biri.>Ɩ dɩlɛ ɩ kɩɛ Ɩsʋɔ tanɛ naŋ na ɩ kalaa ŋii ŋii kɔŋ tibi na, ama daasɛ ŋii ŋii tibi saŋa gana na, ɩɩ nyii tie e. 4 Amɩɛ nyinaŋ doŋ gɩnanaŋ sɛ ɩ yɩɛ gɩ baa di gasiŋteŋ fa Ɩsʋɔ, ɩ aja adaŋgana na ɩ na. Ama ɩɩ na ŋarɛ ɛ, amʋɔ ŋii ŋɩ tibi Yona dʋɔ na.>> Sɛ Yesu yela ba sɛ wʋ lam.

5 Gʋ wʋ kpalɛnara baa tɩɛsɛ lɩɩ gaa ju gatɩɛsa na, dɩmaŋ sɛ ba nyiŋi gʋ ba n mʋ bodobodo o, 6 Yesu tawɩ ba sɛ, <<N kɩɛ amɩɛ wʋsɛ dʋɔ na dieli lɩɩ Farasitina na Sadukitina yiisi* dʋɔ.>>

7 Sɛ wʋ kpalɛnara baa tawɩ ba nyiŋeŋ-nyiŋeŋ sɛ, <<Bodobodo gaa dɩ n mʋ na dʋɔ sɛ wʋ tawɩ dɩmʋŋ.>>

8 Gʋ Yesu jiŋ wɩɛ ŋii baa tawɩ na, wʋ tasɛ ba sɛ, <<Amɩɛ baa amɩɛ lɩɛdi n bɔla a, be n yɩɛ sɛ ɩ tawɩ amɩɛ nyiŋeŋ-nyiŋeŋ sɛ dɩ tana bodobodo? 9 Ɩ saŋ ɩŋ nyii ta tie? Ɩ nyiŋi bodobodo anʋŋ ŋii ma jaɩ fa bakpa kɔrʋɔsɛ sɩ nʋŋ (5,000) sɛ ba di kakaa na, gachaŋasɛ aŋmaŋ sɛ ɩ kuiwu? 10 Yaa bodobodo lɩkaarɛ ŋii ma jaɩ fa bakpa kɔrʋɔsɛ sɩ nara (4,000) sɛ ba di kakaa na, gachaŋasɛ aŋmaŋ sɛ ɩ kuiwu? 11 Be n yɩɛ sɛ ɩɩ nyii tie sɛ naa bodobodo wɩɛ sɛ maa tawɩ maa fa amɩɛ? Ama n kɩɛ amɩɛ wʋsɛ dʋɔ na dieli lɩɩ Farasitina na Sadukitina yiisi dʋɔ.>> 12 Dɩmaŋ sɛ wʋ kpalɛnara baa nyii tie gʋ naa yiisi ŋii baa mʋ baa dʋ bodobodo tɩba na wɩɛ sɛ wʋ a tawɩ sɛ ba n kɩɛ ba wʋsɛ dʋɔ na dieli i, ama Farasitina na Sadukitina kalaa wɩɛ sɛ wʋ dʋɔna.

13 Gʋ Yesu ju Kayisariya Filipi tibi dʋɔ na, wʋ tasɛ wʋ kpalɛnara baa sɛ, <<Mmʋɔ sɛ bakpa a tawɩ sɛ Wʋkpa Bu wʋŋ yɩɛ?>>

14 Ba lɩsɛ nʋɔ sɛ, <<Barɛ sɛ Yohane Ɩsʋɔ Sɔrɛ, barɛ sɛ Ɩsʋɔ ɔja Eliya, sɛ barɛ dʋɔ sɛ Ɩsʋɔ ɔja Yeremiya yaa Ɩsʋɔ bajana baa tɩba wʋrʋ bɛ.>>

15 Sɛ Yesu tasɛ ba sɛ, <<Amɩɛ dʋɔ, Mmʋɔ sɛ ɩ sɛ ma yɩɛ?>>

16 Sɛ Simoŋ Petero lɩsɛ nʋɔ sɛ, <<Nyaŋ n nyina Kirisito,* Ɩsʋɔ wʋkɩɛnasa wʋŋ Bu.>>

17 Sɛ Yesu tawɩ ɩ sɛ, <<Nyaŋ Simoŋ, Yona bu, kusee n nyina nyaŋ, akala takɩɛ naa wʋkpa n lɩsɛ wɩɛ ŋina kalaa nyaŋ ŋ, ama Majuo wʋŋ wʋ wɩɛ Ɩsʋɔ adugbe na. 18 Maŋ bɩrɛ, maa tawɩ nyaŋ sɛ nyaŋ n nyina Petero*, nyaŋ dɩkpa gana dʋɔ sɛ maa ma Kirisito lɩɛdɩra dikpeŋ jaga dʋɔ. Sɛ sɩŋ gba baa dɩlɛ di ga dʋɔ ɔ. 19 Maa mʋ Ɩsʋɔ Juori gaa safiwu aba fa nyaŋ. Wɩɛ kʋma ŋii nya pɔgʋ ŋɛ tibi dʋɔ na, baa pɔgʋ ŋɛ Ɩsʋɔ adugbe. Sɛ wɩɛ kʋmʋ ŋii nya buoli ŋɛ tibi dʋɔ na, baa buoli ŋɛ Ɩsʋɔ adugbe.>> 20 Sɛ Yesu jɔ wʋ kpalɛnara baa nyienaŋ sɛ ba n baa tawɩ wʋrʋ sɛ wʋŋ n nyina Kirisito wʋŋ.

21 Lɩɩ dɩmʋŋ saŋa gana mʋ a ju na, Yesu fara wʋ a tawɩ wʋ kpalɛnara baa sɛ ŋɩ tiri gʋ wʋ a ju Yerusalem na wʋ a na awʋrʋfʋɔ fɔɩ dɩɛ bɩnɩɛ, Ɩsʋɔ sei bɩnɩɛ na mbara bakalaasa pamɩɛ naŋ na baa kʋ ɩ, ama wɩɛ atoro wɩɩ na, wʋ a feŋ lɩɩ sɩŋ naŋ.

22 Sɛ Petero yagɛ Yesu lɩɩ laraŋ sɛ wʋ tawɩ baŋ ɩ sɛ, <<Kpaŋjuo, Ɩsʋɔ n mʋ ju taŋasɛ! Ŋina baa tibi n dʋɔ ɔ.>>

23 Sɛ Yesu biliŋi kɩɛ Petero sɛ wʋ tawɩ ɩ sɛ, <<Lɩɩ ma dʋɔ Sɩtanɩ! Nya yɩɛ gbɩɛ garadɛ bɛ fa maŋ, akala takɩɛ wʋkpa nfɩɛrɛ sɛ nyaa faa, naa Ɩsʋɔ teri i.>>

24 Sɛ Yesu tawɩ wʋ kpalɛnara baa sɛ, <<Wʋkʋma wʋŋ wʋ a ja sɛ wʋ a kpaŋ maŋ na, ŋɩ tiri gʋ wʋ a yela wʋ tɩŋtɩŋ wʋ jawʋ na wʋ a mʋ wʋ daŋ gasagasa na wʋ a kpaŋ maŋ. 25 Akala takɩɛ wʋkʋma wʋŋ wʋ a ja sɛ wʋ a mɔlɔgɩ wʋ tɩŋtɩŋ wʋ nkpa na, ŋii jɔ ɩ. Ama wʋkʋma wʋŋ wʋ nkpa jɔ ɩ lɩɩ ma dʋɔ na, wʋ a yu nkpa ŋii ŋɩ taŋ gɩtɛ. 26 Wʋkpa yu dulunya abʋrɩ kpiniŋ sɛ wʋ nkpa lɩɩ wʋ pam naŋ na, be sɛ wʋ a yu? Yaa be sɛ wʋkpa a dɩlɛ mʋ chɩɛgɩna wʋ nkpa? 27 Wʋkpa Bu wʋŋ aja wʋ a kɔŋ Wʋ juo jilima naŋ wʋ na wʋ gabʋɔsɛ, na wʋ a gaa tɔ wʋkʋma kɩm ganaŋkʋ wʋ ayɩɛsa kɩɛna. 28 Maa tawɩ sɛ n nyii na dieli sɛ, amɩɛ baa ɩ wɩɛ jɩna na barɛ baa na sɩŋ ŋ ga tala gʋ baa na Wʋkpa Bu wʋŋ bɔrɛ wʋ a kɔŋ wʋ juori naŋ.>>