1 Wɩɛ lʋrʋ wʋrʋgbɩɛ na, Yesu mʋ Petero, Jamesi na wʋnabu Yohane sɛ wʋ na ba nyiŋeŋ ju bʋrɔŋ jalɩŋtɛ garɛ dʋɔ. 2 Dɩmaŋ sɛ ba na gʋ Yesu wʋsɛ gori ba asa dʋɔ. Wʋ asanaŋ ŋalagi takɩɛ wiita, sɛ wʋ abʋrɩ afuusa fʋlʋŋsɛ takɩɛ ŋmaŋi. 3 Kɩɛ, dɩmaŋ sɛ ba na gʋ Mosesi na Ɩsʋɔ ɔja Eliya na Yesu a tawɩ.

4 Sɛ Petero tawɩ Yesu sɛ, <<Kpaŋjuo, ŋɩ wɩɛ dieli gʋ dɩ wɩɛ jɩna. Nyaa jawʋ na, yela na maa baŋ akoneŋ atoro, n teri garɛ, Mosesi teri garɛ na Ɩsʋɔ ɔja Eliya gba teri garɛ.>>

5 Gʋ Petero saŋ wʋ a tawɩ na, Ɩsʋɔ tanɛ ga ŋalagisa gaa fu ba dʋɔ. Sɛ lofu garɛ lɩɩ Ɩsʋɔ tanɛ gaa naŋ kɔŋ sɛ, <<Wina n nyina Mabu wʋŋ maa ja wʋ wɩɛ. Ma asa a su wʋ dʋɔ, n nyii wʋ jaŋ.>>

6 Gʋ wʋ kpalɛnara baa nyii ŋina na, nyɩŋtɩɛ chaŋ ba sɛ ba laŋ duo. 7 Ama Yesu kɔŋ gaa tapʋ ba tawɩ sɛ, <<N kʋlʋ, n baa yela nyɩŋtɩɛ a chaŋ amɩɛ.>> 8 Gʋ ba mʋ ba nyie adugbe na, ba n na wʋrʋ ʋ, amʋɔ Yesu nyiŋeŋ.

9 Gʋ ba tibi bʋrɔŋ gaa baa kɔnɛ na, Yesu jɔ ba nyienaŋ sɛ, <<Ba n baa tawɩ ŋii ba na na fa wʋrʋ ga tala gʋ Wʋkpa Bu wʋŋ aja feŋ lɩɩ sɩŋ naŋ.>>

10 Sɛ wʋ kpalɛnara baa tasɛ ɩ sɛ, <<Be dʋɔ sɛ mbara bakalaasa baa tawɩ sɛ ŋɩ tiri gʋ Ɩsʋɔ ɔja Eliya n chɩŋkpɩɛ kɔŋ pɔɩ?>>

11 Sɛ Yesu lɩsɛ ba nʋɔ sɛ, <<Yɩɛ gasiŋteŋ bɛ, ŋɩ tiri gʋ Eliya n chɩŋkpɩɛ kɔŋ na wʋ a gaa desina bʋrʋkʋma si ga gbɩɛ dʋɔ. 12 Ama maa tawɩ amɩɛ sɛ Eliya taŋ kɔnɛ sɛ bakpa n jiŋ ɩ ɩ. Sɛ ba yɩɛ ɩ bʋrʋkʋma gaa baa jawʋ. Dɩmʋŋ sɛ Wʋkpa Bu wʋŋ gba aja na awʋrʋfʋɔ ba pamɩɛ naŋ.>> 13 Ŋina wʋrʋgbɩɛ na, wʋ kpalɛnara baa nyii tie gʋ Yohane Ɩsʋɔ Sɔrɛ wʋŋ wɩɛ sɛ wʋ a tawɩ wʋ a fa ba.

14 Gʋ Yesu na wʋ kpalɛnara baa bɔrɛ kɔŋ jama baa jaŋ na, baalɛ wʋrʋ kɔŋ Yesu jaŋ gaa luuŋ wʋ asanaŋ 15 sɛ wʋ tawɩ sɛ, <<Kpaŋjuo, wɩɩ mabu baalɛ jaŋ gɩyɔŋ. Wʋ a kili dɩgbɩŋgbɩŋ sɛ wʋ a na awʋrʋfʋɔ fɔɩ. Wʋ a dɩlɛ wʋ sala bʋala naŋ yaa lɩŋ naŋ. 16 Ma mʋ ɩ kɔna n kpalɛnara baa sɛ ba n chɔ ɩ, ama ba n dɩlɛ ɛ.>>

17 Sɛ Yesu tawɩ ba sɛ, <<O, amɩɛ gɩnanaŋ baa ɩɩ lɩɛ ɩ di i sɛ amɩɛ gbɩɛsɛ n chirigi i. Mʋ ga tala wɩɛ aŋmaŋ sɛ maŋ na amɩɛ dɩ n cha? Mʋ ga tala wɩɛ aŋmaŋ sɛ ma n yu digela fa amɩɛ? N mʋ yeleŋbu wʋŋ kɔna maŋ jɩna.>> 18 Sɛ Yesu fʋba feliŋ sʋbʋ wʋŋ wʋ wɩɛ yeleŋbu wʋŋ tɩba na dʋɔ sɛ wʋ lɩɩ wʋ tɩba. Gabʋanaŋ sɛ wʋ yu lʋm chʋɔ.

19 Wʋrʋgbɩɛ na, wʋ kpalɛnara baa kɔŋ wʋ jaŋ wʋ nyiŋeŋ gaa tasɛ ɩ sɛ, <<Be n yɩɛ sɛ dɩ n dɩlɛ geŋ feliŋ sʋbʋ wʋŋ lɩɩ wʋ tɩba?>>

20 Sɛ wʋ lɩsɛ ba nʋɔ sɛ, <<Akala takɩɛ amɩɛ lɩɛdi n bɔla a. Maa tawɩ sɛ n nyii na dieli sɛ ɩ wɩɛna lɩɛdi pii takɩɛ kpeli daŋ bi na, nafʋɔ ɩ dɩlɛ tawɩ bʋrɔŋ gana sɛ, <Kuli lɩɩ jɩna ga sɩŋ dɩmaŋ> na ŋii kɔŋ tɩba dɩmʋŋ. Bʋrʋ taŋ sɛ ɩɩ dɩlɛ yɩɛ ɛ. 21 Dɩmʋŋ feliŋ sʋbʋ wina duluŋ amʋɔ dɩga na nʋɔ pɔgʋ aaŋ dɩlɛ geŋ ɩ.>>

22 Gʋ Yesu kpalɛnara baa jaŋi Galaliya tibi dʋɔ na, Yesu tawɩ ba sɛ, <<Baa lɩsɛ Wʋkpa Bu wʋŋ dʋ bakpa pamɩɛ naŋ 23 na baa kʋ ɩ. Ama wɩɛ atoro wɩɩ na, wʋ a feŋ lɩɩ Sɩŋ naŋ.>> Gʋ wʋ kpalɛnara baa nyii ŋina na, ba bɔtaa.

24 Gʋ Yesu na wʋ kpalɛnara baa kɔŋ Kapeniyum dɩɛ naŋ na, Ɩsʋɔ tʋm danɛ lampo lɩɛra baa kɔŋ Petero jaŋ gaa tasɛ ɩ sɛ, <<Amɩɛ wʋkalaasa a tɔ Ɩsʋɔ tʋm danɛ lampo?>>

25 Sɛ Petero lɩsɛ nʋɔ sɛ, <<Ɛɛŋ, wʋ a tɔ.>>Gʋ Petero kɔŋ waa dʋɔ na, Yesu n chɩŋkpɩɛ tasɛ ɩ sɛ, <<Simoŋ, nya nfɩɛrɛ n nyina sɩnɛ lɩɩna wɩɛ ŋina dʋɔ? Mmʋɔ aba aaŋ tɔ lampo baa fa juoneŋ? Dɩɛsɛ bie yaa mʋɔra?>>

26 Sɛ Petero lɩsɛ nʋɔ sɛ, <<Mʋɔra.>> Sɛ Yesu tawɩ Petero sɛ, <<Dɩmʋŋ bɩrɛ dɩɛsɛ bie baa tɔ lampo o.>>

27 Ama ganaŋkʋ dɩ ɩɩ dʋ ba biŋbira na dʋɔ, ju lɩɩ gaa naŋ ga lɔ darɩwa. Diji wʋŋ nyaa chɩŋkpɩɛ chaŋ na, fulu wʋ nʋɔ nyaa na diterembi. Lɩsɛ na nyaa mʋ tɔ ba maŋ na nyaŋ lampo.