21 Sɛ Petero kɔŋ Yesu jaŋ gaa tasɛ ɩ sɛ, <<Kpaŋjuo, ma dʋɔ yɩɛ maŋ dɩsʋbʋ na, gbɩɛta bʋŋmaŋ sɛ ma n mʋ chɩɛ ɩ? Gbɩɛta lɩkaarɛ?>>

22 Sɛ Yesu lɩsɛ ɩ nʋɔ sɛ, <<Maa tawɩ amɩɛ sɛ, naa gbɩɛta lɩkaarɛ ɛ, ama gbɩɛta ŋitoro sala na lɩkaarɛ.>>

23 <<Dɩmʋŋ dʋɔ Ɩsʋɔ Juori gaa kɩɛna bɛ takɩɛ Juo wʋrʋ wʋŋ wʋ yagɛ wʋ tʋmɩra sɛ ba n gaa kalaa ɩ wʋ aterembie nʋɔ. 24 Gʋ wʋ fara wʋ a yɩɛ ŋina na, ba mʋ baalɛ wʋrʋ wʋŋ wʋ chamɩna ɩ kɩm diterembi talɛntɩ kɔrʋɔsɛ gifi na kɔna ɩ. 25 Gʋ wʋ n dɩlɛ tɔ kɩm gaa na dʋɔ, wʋ kpaŋjuo wʋŋ dʋ sɛ ba n yaa ɩ, wʋ alʋ, wʋ bie na bʋrʋkʋma gaa wʋ wɩɛna na, na baa mʋ gaa tɔ kɩm gaa.>>

26 Sɛ tʋmɩrɛ wʋŋ luuŋ wʋ dʋna dʋɔ wʋ kpaŋjuo asanaŋ sʋlʋ ɩ sɛ, <<Yu digela fa maŋ, maa tɔ nyaŋ kɩm gaa kpiniŋ.>> 27 Sɛ wʋ kpaŋjuo wʋŋ wɩɩ wʋ gɩyɔŋ, sɛ wʋ mʋ kɩm gaa chɩɛ ɩ sɛ wʋ yela sɛ wʋ lam.

28 Sɛ Yesu ju dʋɔ tawɩ sɛ, <<Gʋ tʋmɩrɛ wʋŋ a ju na, wʋ ga na wʋ dʋɔ tʋmɩrɛ wʋrʋ wʋ chamɩna ɩ kɩm aterembie dinari*18:28 Dinari gafie yɩɛ dɩtʋm yɩɛrɛ wiitabi kɩmtʋɔ bɛ gafie. Sɛ wʋ chaŋ wʋ lofu tie tawɩ ɩ sɛ tɔ maŋ kɩm gaa n chamɩna maŋ na.>>

29 Sɛ Yesu ju dʋɔ tawɩ sɛ, <<Wʋ dʋɔ tʋmɩrɛ wʋŋ luuŋ wʋ dʋna dʋɔ wʋ asanaŋ sʋlʋ ɩ sɛ, yu digela fa maŋ maa tɔ nyaŋ kɩm gaa kpiniŋ.>>

30 <<Ama wʋŋ bɩrɛ wʋ pɩɛ, sɛ wʋ mʋ ɩ ga tɔ danɛ dɩtʋɔtɩŋ ga tala saŋa gaa wʋ a gaa tɔ kɩm gaa.>> 31 Gʋ tʋmɩra ba baŋbaŋ baa na ŋii ŋɩ tibi na, ba asa n lɩɛ ɛ sɛ ba ju ga tawɩ ŋii ŋɩ tibi na kpiniŋ fa ba kpaŋjuo wʋŋ.

32 Sɛ kpaŋjuo wʋŋ yagɛ tʋmɩrɛ wʋŋ tawɩ ɩ sɛ, <<Nyaŋ tʋmɩrɛ nyinaŋ doŋ-tɛ, nya sʋlʋ maŋ dʋɔ ma mʋ n kɩm kpiniŋ chɩɛ nyaŋ. 33 Be dʋɔ sɛ nya n dɩlɛ wɩɩ n dʋɔ gɩyɔŋ takɩɛ ganaŋkʋ ma wɩɩ n gɩyɔŋ naa?>> 34 Sɛ wʋ kpaŋjuo wʋŋ kara biŋbira sɛ wʋ tawɩ fa danɛ tʋɔra sɛ ba n nyala ɩ ga tala gʋ wʋ a tɔ kɩm gaa kpiniŋ.

35 Sɛ Yesu ju dʋɔ tawɩ sɛ, <<N na sɛ Majuo wʋŋ wʋ wɩɛ Ɩsʋɔ adugbe na aja yɩɛ amɩɛ wʋkʋma wʋŋ wʋ n lɩɩ wʋ digela naŋ mʋ wʋ dʋɔ dɩsʋbʋ chɩɛ ɩ na.>>