Mateus 2

Kpiŋjimtina baa ba lɩɩ dɩlɩɩtɩŋ na wʋsɛ dʋɔ wɩɛ

1 Ba lʋrʋ Yesu Betilehem gaa ga wɩɛ Yudiya tibi dʋɔ, dɩmʋŋ saŋa gana na Hɛrɔdɩ n nyina Juo. Wʋ lʋrʋ wʋrʋgbɩɛ na, kpiŋjimtina barɛ lɩɩ dɩlɩɩtɩŋ kɔŋ Yerusalem 2 gaa tasɛ sɛ, <<Le sɛ ba lʋrʋ wʋchaa fɔlɛ wʋŋ wʋ a gaa yɩɛ Yudatina Juo naa? Dɩ na wʋ gachikpebi wiita dɩlɩɩtɩŋ sɛ dɩ kɔŋ na dɩ gaa tʋŋ ɩ.>>

3 Gʋ Juo Hɛrɔdɩ nyii dɩmʋŋ wɩɛ ŋina na, wʋ na Yerusalemtina kpiniŋ agela warɩɛ ba. 4 Dɩmʋŋ dʋɔ wʋ yagɛ Ɩsʋɔ sei bɩnɩɛ kpiniŋ na Mosesi mbara bakalaasa gaa jaŋi tasɛ ba sɛ, <<Le sɛ baa lʋrʋ Kirisito*2:4 Girikitina a yagɛ sɛ Kirisito sɛ Yudatina dʋɔ a yagɛ sɛ Mesaya wʋŋ naa?>> 5 Sɛ ba lɩsɛ ɩ nʋɔ sɛ Betilehem gaa ga wɩɛ Yudiya tibi dʋɔ. Akala takɩɛ Ɩsʋɔ pala na wʋ bajana dʋɔ sabɩɛ si sɛ,

6 <<Nyaŋ Betilehem, gaa ga wɩɛ Yuda tibi dʋɔ,

n ba yɩɛ wʋ pii dɩɛsɛ ajanɩɛ ŋii ŋɩ wɩɛ Yuda tibi dʋɔ na naŋ ŋ.

Akala takɩɛ n tɩba sɛ asanaŋtɛ wʋjanɛ aja lɩɩ

na wʋ a yɩɛ kɩɛrɛ fa ma bakpa Isiralitina.>>✝2:6 Mik 5:2.

7 Sɛ Juo Hɛrɔdɩ yagɛ kpiŋjimtina baa lɩɩ laraŋ, sɛ wʋ tasɛ ba na wʋ a jiŋ saŋa gaa gachikpebi wʋŋ lɩɩ na. 8 Sɛ wʋ kpiri ba Betilehem tawɩ ba sɛ, <<N ju ga ja wʋchaa fɔlɛ wʋŋ na dieli. Ɩ na ɩ na n kɔŋ gaa tawɩ maŋ na maŋ gba maa ju ga tʋŋ ɩ.>>

9 Gʋ ba nyii Juo wʋŋ jaŋ taŋ na ba lɩɩ dɩmaŋ laŋ. Gʋ baa ju na, ba ti na gachikpebi wʋŋ ba chɩŋkpɩɛ na ɩ wiita dɩlɩɩtɩŋ na dɔŋ ba asanaŋ ga tala gʋ wʋ ga dʋɔsɩŋ waa gaa wʋchaa fɔlɛ wʋŋ wɩɛ ga tɩba na kʋrʋkʋrʋ. 10 Gʋ ba na gachikpebi wʋŋ na, ba asadi galaŋ. 11 Gʋ ba jʋʋ waa gaa tɩba na, ba na wʋchaa fɔlɛ wʋŋ na wʋ naa Mariya sɛ ba luuŋ tʋŋ ɩ. Sɛ ba buoli ba akpaŋta kpari didaka lɩsɛ aterembie asɩɛma, mʋlʋŋ tii alifeŋsa na ɩnsɛnsɩ gafɔla lira mʋ fa ɩ takɩɛ afaasa. 12 Ɩsʋɔ cha jɔ kpiŋjimtina baa nyienaŋ duosi naŋ sɛ ba n baa ti bɔrɛ ju Juo Hɛrɔdɩ jaŋ. Dɩmʋŋ dʋɔ ba mʋna gbɩɛ fɔlɛ dʋɔ bɔrɛ ju ba dɩɛnaŋ.