1 Sɛ Yesu tawɩ sɛ, <<Ɩsʋɔ juori gaa kɩɛna bɛ takɩɛ gʋ fʋɔtɛ wʋrʋ kʋlʋ nafo ga ja tʋmɩra na baa gaa yɩɛ dɩtʋm wʋ fʋɔnaŋ. 2 Wʋ na ba tawɩ kpa sɛ wʋ a tɔ ba diterembi dinari* garɛ wiita bi sɛ wʋ mʋ ba ju wʋ fʋɔnaŋ.>>

3 Aja yɩɛ nafo karafɩɛ saŋgʋ saŋa na, wʋ ti ju ga na barɛ sɩmɩɛɩ gɩyɩɛ naŋ baa yɩɛ bʋrʋ ʋ. 4 Sɛ wʋ tawɩ ba sɛ, <<Amɩɛ gba n ju ma fʋɔnaŋ ga yɩɛ dɩtʋm, maa tɔ amɩɛ na dieli. 5 Dɩmʋŋ dʋɔ ba ju.>>

Sɛ Yesu ju dʋɔ tawɩ sɛ, <<Gʋ dɩ tala wiita karafɩɛ gifi ala na wiita karafɩɛ atoro naŋ na, fʋɔtɛ wʋŋ ti bɔrɛ ga mʋ barɛ ju.>>

6 Aja yɩɛ bʋyanɔ karafɩɛ anʋŋ naŋ na, wʋ ti ju ga na barɛ ba sɩmɩɛɩ baa yɩɛ bʋrʋ ʋ. Sɛ wʋ tasɛ ba sɛ, <<Be n yɩɛ sɛ ɩ sɩmɩɛɩ jɩna ɩ biri yela ɩɩ yɩɛ bʋrʋ?>>

7 Sɛ ba lɩsɛ ɩ nʋɔ sɛ, <<Wʋrʋ n fa daa dɩtʋm sɛ dɩ n yɩɛ ɛ.>>

Sɛ wʋ tawɩ ba sɛ, <<Amɩɛ gba n ju ga yɩɛ dɩtʋm ma fʋɔnaŋ.>>

8 Sɛ Yesu tawɩ sɛ, <<Gʋ bʋyanɔ talɛ na, fʋɔtɛ wʋŋ yagɛ wʋ kɩɛrɛ bɩnɛ tawɩ ɩ sɛ yagɛ tʋmɩra baa gaa jaŋi na nyaa tɔ ba kɩm, fara lɩɩ baa ba dʋɔ wʋrʋgbɩɛ na dʋɔ mʋ ju baa ba chɩŋkpɩɛ kɔnɛ na dʋɔ.>>

9 Dɩtʋm yɩɛra baa ba ju fʋɔ gaa naŋ aja yɩɛ karafɩɛ anʋŋ saŋa kɔnɛ sɛ ba wʋkʋma yu diterembi dinari* garɛ. 10 Gʋ dɩ tala baa ba chɩŋkpɩɛ ju fʋɔ gaa naŋ dʋɔ na, ba jiŋ sɛ baa yu kii dɩmʋŋ. Ama ba wʋkʋma yu diterembi dinari garɛ. 11 Gʋ ba lɩɛ ba aterembie na, sɛ ba fara baa fʋlʋ na fʋɔtɛ wʋŋ. 12 Sɛ ba tawɩ sɛ, <<Baala baa ba dʋɔ wʋrʋgbɩɛ gaa yɩɛ dɩtʋm karafɩɛ garɛ nyiŋeŋ na, nya tɔ daa baa dɩ sɩŋ wiita keŋkeŋ yɩɛ dɩtʋm ibiri na ba kʋrʋkʋrʋ.>>

13 Ama fʋɔtɛ wʋŋ lɩsɛ ba tɩba wʋrʋ nʋɔ sɛ, <<Ma dɩɛtɛ, ma n sisi nyaŋ ŋ. Nya n kpa gʋ diterembi dinari sɛ nyaa lɩɛ wiita bi?>> 14 Mʋ nya aterembie na nyaa pala. Maa ja sɛ maa tɔ baalɛ wʋŋ ma mʋ ɩ dɩtʋm dʋɔ wʋrʋgbɩɛ na takɩɛ ganaŋkʋ ma tɔ nyaŋ na. 15 Ma taŋ gbɩɛ na maa mʋ ma aterembie yɩɛ ŋii maa jawʋ na yaa? Yaa ajʋʋnyaŋ lɩɩna ma dɩbam yɩɛ dʋɔ?

16 Sɛ Yesu tawɩ sɛ, <<Dɩmʋŋ dʋɔ baa ba yɩɛ wʋrʋgbɩɛtina na aja yɩɛ asanaŋtina na asanaŋtina a yɩɛ wʋrʋgbɩɛtina.>>

17 Gʋ Yesu a ju Yerusalem na, wʋ mʋ wʋ kpirida gifi bala baa lɩɩ laraŋ sɛ wʋ tawɩ ba sɛ, 18 <<N nyii, dɩɩ ju Yerusalem, dɩmaŋ sɛ baa lɩsɛ Wʋkpa Bu wʋŋ fa Ɩsʋɔ sei bɩnɩɛ na Mosesi mbara bakalaasa baa na baa fu ɩ dɩpʋɛ sɛ ba n kʋ ɩ 19 na baa mʋ ɩ fa baa ba ba yɩɛ Yudatina na baa jabi ɩ, ta ɩ achʋchʋɛ na baa jɔ ɩ daŋ gasagasa dʋɔ. Ama wɩɛ atoro wɩɩ na, wʋ a feŋ lɩɩ sɩŋ naŋ.>>

20 Sɛ Sebedi alʋ na wʋ bie baala jaŋ kɔŋ Yesu jaŋ, sɛ ba naa gaa laŋ luuŋ Yesu asanaŋ sʋlʋ ɩ bʋrʋ garɛ.

21 Sɛ Yesu tasɛ ɩ sɛ, <<Be sɛ ɩ jawʋ?>>

Sɛ wʋ lɩsɛ nʋɔ sɛ, <<Yela na ma bie baala jaŋ bala bana wʋrʋ a cha n jɩsaŋ dʋɔ na wʋrʋ dʋɔ a cha n nambi dʋɔ n juori gaa naŋ.>>

22 Sɛ Yesu tawɩ ba sɛ, <<Ɩ ba jiŋ ŋii ɩ tasɛ na a. Ɩ dɩlɛ na awʋrʋfʋɔ ŋii maa naa?>>

Sɛ ba lɩsɛ nʋɔ sɛ, <<Dɩ dɩlɛ.>> 23 Sɛ Yesu tawɩ ba sɛ, <<Ɩ dɩlɛ na awʋrʋfʋɔ ŋii maa na gba na, ama naa maŋ aaŋ ja maa yela na ɩ cha ma jɩsaŋ dʋɔ yaa ma nambi dʋɔ ɔ. Achaatɩŋ ŋina yɩɛ baa Majuo desina ba si na teri bɛ.>>

24 Gʋ kpalɛnara gifi baa nyii wɩɛ ŋina na, ba kara biŋbira dʋ nabie baala jaŋ baa. 25 Sɛ Yesu yagɛ wʋ kpalɛnara baa kpiniŋ kɔŋ gaa jaŋi wʋ jaŋ sɛ wʋ tawɩ ba sɛ, <<Ɩ jiŋ gʋ baa ba ba yɩɛ Yudatina na juoneŋ a mʋ yikuo bɛ baa di ba bakpa dʋɔ, sɛ ba bɩnɩɛ gba a mʋ yikuo baa di ba bakpa dʋɔ. 26 Ama amɩɛ bɩrɛ, n baa yɩɛ takɩɛ ba. Wʋkʋma wʋŋ wʋ a ja sɛ wʋ a yɩɛ wʋjanɛ amɩɛ tɩba na, ŋɩ tiri gʋ wʋ a yɩɛ amɩɛ tɩba tʋmɩrɛ, 27 sɛ wʋkʋma wʋŋ wʋ a ja sɛ wʋ a yɩɛ asanaŋtɛ na, ŋɩ tiri gʋ wʋ a yɩɛ amɩɛ tɩba tʋmɩrɛ 28 takɩɛ ganaŋkʋ Wʋkpa Bu wʋŋ n kɔŋ sɛ ba n tʋm ɩ na, ama wʋ gaa tʋm sɛ wʋ mʋ wʋ nkpa tɔ kɩm lɩɛ bakpa fɔɩ lɩɩ ba dɩsʋbʋ naŋ.>>

29 Gʋ Yesu na wʋ kpalɛnara baa a lɩɩ Yeriko dɩɛ naŋ na, jama baa kpaŋ ɩ. 30 Kɩɛ, bataŋpʋna bala barɛ cha ba chaɩ gbɩɛ laraŋ. Gʋ ba nyii gʋ Yesu a lam na, ba kuusi tawɩ sɛ, <<Kpaŋjuo, Dawidi ganana bie, wɩɩ daa gɩyɔŋ!>>

31 Sɛ jama baa tawɩ baŋ ba sɛ ba n fu ba nʋɔsɛ dʋɔ. Ama ba ju dʋɔ kuusi na doŋ sɛ, <<Kpaŋjuo, Dawidi ganana bie, wɩɩ daa gɩyɔŋ!>>

32 Sɛ Yesu dʋɔsɩŋ sɛ wʋ yagɛ ba tasɛ ba sɛ, <<Be sɛ ɩ ja sɛ maa yɩɛ fa amɩɛ.>>

33 Sɛ ba lɩsɛ ɩ nʋɔ sɛ, <<Kpaŋjuo, dɩɩ ja sɛ daa asa a fulu bɛ.>>

34 Sɛ Yesu wɩɩ ba gɩyɔŋ sɛ wʋ mʋ wʋ pam tapʋ ba asa. Gabʋanaŋ sɛ ba asa fulu sɛ ba kpaŋ ɩ.