1 Gʋ Yesu na wʋ kpalɛnara baa a ju sɛ ba tirina Yerusalem dɩɛ na, gʋ ba tala Betifage dɩɛ bie gaa ga wɩɛ olifi dasɛ bʋrɔŋ bie gaa dʋɔ na sɛ Yesu kpiri wʋ kpalɛnara baa tɩba bala, 2 sɛ wʋ tawɩ ba sɛ, <<N ju dɩɛ bie gaa ga wɩɛ amɩɛ asanaŋ na naŋ. Gʋ ɩ jʋʋ na, ɩ na kpaŋa pɔgaɩ yela kpaŋa bie wʋrʋ sɩmɩɛɩ wʋ jaŋ, n buoli ba kɔna maŋ. 3 Sɛ wʋrʋ tasɛ amɩɛ bʋrʋ darɛ na, n tawɩ ɩ sɛ Kpaŋjuo wʋŋ n tiri ba, wʋ a fa amɩɛ gbɩɛ na ɩ mʋ ba kɔna maŋ.>>

4 Ŋina yɩɛ dɩmʋŋ na wɩɛ ŋii Ɩsʋɔ pala na wʋ ɔja dʋɔ tawɩ si na a kɔŋ tɩba sɛ,

5 <<Tawɩ Siyoŋ dɩɛ sɛ

N kɩɛ amɩɛ juo a kɔŋ amɩɛ jaŋ,

wʋ fʋʋ sɛ wʋ chaɩ kpaŋa,

kpaŋa bie wʋrʋ dʋɔ.>>✝

6 Sɛ wʋ kpalɛnara baa ju ga yɩɛ ganaŋkʋ Yesu kalaa ba sɛ baŋ ga yɩɛ na. 7 Ba mʋ kpaŋa wʋŋ na kpaŋa bie wʋrʋ kɔna Yesu, ba mʋ ba adugbe gagbasɛ jaga wʋ dʋɔ sɛ Yesu cha ŋɛ dʋɔ. 8 Bakpa fɔɩ mʋ ba adugbe gagbasɛ tɔ gbɩɛ naŋ sɛ barɛ dʋɔ wʋŋɩɩ abilafa tɔ gbɩɛ naŋ. 9 Sɛ jama baa ba dɔŋ asanaŋ na baa ba kpamɩna wʋrʋgbɩɛ na kpiniŋ kuusi sɛ,

<<Hosana* n ju fa Dawidi ganana bie.>>

<<Kusee n nyina wʋŋ wʋ a kɔŋ Ɩsʋɔ yɩrɛ naŋ!>>✝

<<Hosana* n ju fa Ɩsʋɔ wʋŋ wʋ wɩɛ adugbe na!>>

10 Gʋ Yesu jʋʋ Yerusalem dɩɛ naŋ na, dɩɛ gaa kpiniŋ asadi fɔɩ sɛ ba tasɛ sɛ <<Mmʋɔ bɛ?>>

11 Sɛ jama baa lɩsɛ nʋɔ sɛ, <<Wina n nyina Yesu, Ɩsʋɔ ɔja wʋŋ wʋ lɩɩ Nasarati gaa ga wɩɛ Galaliya tibi dʋɔ na.>>

12 Sɛ Yesu jʋʋ Ɩsʋɔ tʋm danɛ naŋ sɛ wʋ geŋ baa baa di yawʋ na kpiniŋ lɩɩ dɩmaŋ. Sɛ wʋ titi ba tebulu aba ŋii baa chɩɛgɩna aterembie ŋɩ dʋɔ, na juori gakuosɛ yara gbeliŋ lɔ. 13 Sɛ wʋ tawɩ ba sɛ, <<<Ba sabɩɛ Ɩsʋɔ wɩɛ naŋ sɛ baa yagɛ ma tʋm danɛ sɛ dɩga danɛ.✝ Ama ɩ mʋ dɩmaŋ yɩɛ ŋmɩɛla baa ba chamɩna doŋ baa lɩɛ bakpa abʋrɩ na dɩchatɩŋ.>✝>>

14 Gʋ wʋ wɩɛ dɩmaŋ na, bataŋpʋna na buobi aba kɔŋ wʋ jaŋ sɛ wʋ chɔ ba. 15 Ama gʋ sei bɩnɩɛ na Mosesi mbara bakalaasa baa na adaŋgana ŋii wʋ yɩɛ, na ganaŋkʋ bachaasɛ a kuusi Ɩsʋɔ tʋm danɛ naŋ sɛ, <<Hosana n ju fa Dawidi ganana bie na,>> ba kara biŋbira.

16 Sɛ ba tasɛ Yesu sɛ, <<N nyii ŋii bachaasɛ bana a tawɩ naa?>>

Sɛ Yesu lɩsɛ ba nʋɔ sɛ, Ɛɛŋ, ma nyii. Sɛ wʋ tasɛ ba sɛ ɩŋ karaŋ ta Ɩsʋɔ Wɩɛ ŋii ŋɩ tawɩ sɛ,

<<Bachaasɛ na bachaasɛ bisi

chamɩna kalɩɛwʋ baa fa nyaŋ.>>

17 Sɛ wʋ yela ba dɩmaŋ lɩɩ dɩɛ janɛ gaa naŋ ju Batani ga duo dɩmaŋ.

18 Nafo fuu gʋ Yesu bɔrɛ wʋ a kɔŋ Yerusalem na, dusoŋ chaŋ ɩ. 19 Wʋ na figi daŋ garɛ sɩmɩɛɩ gbɩɛ laraŋ. Sɛ wʋ ju ga tie ama wʋ n na bʋrʋ ʋ amʋɔ fagɩɛ nyiŋeŋ. Sɛ Yesu tawɩ figi daŋ gaa sɛ, <<Nya aa ti si bie ɩ.>> Gabʋanaŋ sɛ figi daŋ gaa kpisi.

20 Gʋ wʋ kpalɛnara baa na ŋina na, dɩ yɩɛ ba doba. Sɛ ba tasɛ sɛ, <<Be n yɩɛ sɛ figi daŋ gaa kpisi bileŋ dɩmʋŋ?>>

21 Sɛ Yesu lɩsɛ ba nʋɔ sɛ, <<Maa tawɩ sɛ n nyii na dieli sɛ ɩ lɩɛdi sɛ ɩŋ di noro na, naa ŋii ma yɩɛ figi daŋ gana nyiŋeŋ sɛ ɩ dɩlɛ yɩɛ ɛ, ama ɩ dɩlɛ tawɩ bʋrɔŋ gana sɛ, <Kuli ju ga sala ɔpʋ naŋ> na ŋii yɩɛ dɩmʋŋ. 22 Sɛ ɩ lɩɛ di na bʋrʋkʋma gaa ɩ jɔ dɩga sɛ ɩ tasɛ na, ɩ yu.>>

23 Sɛ Yesu jʋʋ Ɩsʋɔ tʋm danɛ gaa naŋ. Gʋ wʋ a kalaa na, Ɩsʋɔ sei bɩnɩɛ na dɩɛ bɩnɩɛ barɛ kɔŋ wʋ jaŋ. Sɛ ba tasɛ ɩ sɛ, <<Yikuo gamʋɔ sɛ nya wɩɛna sɛ nyaa yɩɛ abʋrɩ ŋina? Mmʋɔ n fa nyaŋ dɩmʋŋ yikuo gana?>>

24 Sɛ Yesu lɩsɛ ba nʋɔ sɛ, <<Maa tasɛ amɩɛ wɩɛ a dʋŋdʋlʋŋ, sɛ ɩ dɩlɛ lɩsɛ nʋɔ na, maa tawɩ amɩɛ yikuo gaa ma chamɩna maa yɩɛ abʋrɩ ŋina. 25 N tawɩ maŋ, Yohane Ɩsʋɔ Sɔrɛ wʋŋ Ɩsʋɔ sɔ lɩɩ Ɩsʋɔ bɛ yaa wʋkpa?>> Sɛ ba tawɩ ba nyiŋeŋ-nyiŋeŋ sɛ dɩ lɩsɛ nʋɔ sɛ ŋɩ lɩɩ Ɩsʋɔ na wʋ a tasɛ daa sɛ be n yɩɛ sɛ dɩ n lɩɛ Yohane Ɩsʋɔ Sɔrɛ wʋŋ di?

26 Ama sɛ dɩ lɩsɛ nʋɔ sɛ, <<Ŋɩ lɩɩ bakpa na, dɩɩ se bakpa baa, akala takɩɛ wʋkʋma lɩɛdi gʋ Yohane cha wʋ yɩɛ Ɩsʋɔ ɔja bɛ.>>

27 Dɩmʋŋ dʋɔ ba lɩsɛ nʋɔ sɛ, <<Dɩ ba jiŋ ŋ. Sɛ Yesu tawɩ ba sɛ maŋ gba, maa tawɩ amɩɛ yikuo gaa maa mʋ maa yɩɛ abʋrɩ ŋina na a.>>

28 Sɛ Yesu ju dʋɔ tawɩ sɛ, <<Sɩnɛ n nyina amɩɛ nfɩɛrɛ wɩɛ ŋina dʋɔ? Baalɛ wʋrʋ cha wʋ wɩɛ wʋ wɩɛna bie baala jaŋ bala. Wʋ ju bɩnɛ jaŋ wʋŋ jaŋ ga tawɩ ɩ sɛ mabu baalɛ jaŋ, ju ga yɩɛ dɩtʋm ma fʋɔnaŋ jaŋ.>>

29 Sɛ wʋ tawɩ sɛ, <<Maa ju u.>> Ama wʋrʋgbɩɛ na, wʋ biliŋi wʋ nfɩɛrɛ sɛ wʋ ju.

30 Sɛ juo wʋŋ ju wʋbu pii wʋŋ jaŋ ga tawɩ ɩ dɩmʋŋ. Sɛ wʋ tawɩ sɛ,<<Majuo, maa ju.>> Ama wʋ n ju u.

31 Sɛ Yesu tasɛ Ɩsʋɔ sei bɩnɩɛ na dɩɛ bɩnɛ baa sɛ, <<Wʋ bie bala baa tɩba wʋ Mmʋɔ n yɩɛ wʋ juo jawʋ?>>

Sɛ ba lɩsɛ ɩ nʋɔ sɛ, <<Bɩnɛ jaŋ wʋŋ.>>

Sɛ Yesu tawɩ ba sɛ, <<Maa tawɩ sɛ n nyii na dieli sɛ lampo lɩɛra na ala jaga baa aja chɩŋkpɩɛ amɩɛ jʋʋ Ɩsʋɔ juori gaa naŋ.>>

32 Akala takɩɛ Yohane Ɩsʋɔ Sɔrɛ kɔŋ amɩɛ jaŋ gaa kalaa amɩɛ gbɩɛ ga chirigisa sɛ ɩŋ lɩɛ ɩ di i, ama lampo lɩɛra na ala jaga baa lɩɛ ɩ di. Gʋ ɩ na ŋina wʋrʋgbɩɛ na, ɩŋ biliŋi lɩɩ amɩɛ dɩsʋbʋ naŋ, na ɩ lɩɛ ɩ di i.

33 Sɛ Yesu jɔ ba diduu sɛ, <<N nyii diduu gabaŋbaŋ. Baalɛ wʋrʋ cha fara girepi fʋɔ. Wʋ ma dɩpɔrɛ logo fʋɔ gaa, sɛ wʋrʋ girepi bie dɩŋaŋsɛtɩŋ ga tɩba. Wʋ ma giera danɛ jalɩŋtɛ garɛ fʋɔ gaa naŋ. Sɛ wʋ mʋ girepi fʋɔ gaa dʋ kɩɛra barɛ pamɩɛ naŋ. Wʋrʋgbɩɛ na, wʋ ju gbɩɛ. 34 Gʋ karɩŋ saŋa talɛ na, sɛ fʋɔtɛ wʋŋ kpiri wʋ tʋmɩra fʋɔ kɩɛra baa jaŋ sɛ ba n ju ga lɩɛ wʋ teri kɔna ɩ. 35 Ama fʋɔ kɩɛra baa chaŋ ba, tugu wʋrʋ, kʋ wʋrʋ sɛ ba lɔ bʋɛ kʋ wʋrʋ.>>

36 Sɛ fʋɔtɛ wʋŋ ti kpiri tʋmɩra barɛ baa ba kii baa wʋ chɩŋkpɩɛ kpiri na, dɩmʋŋ sɛ ba yɩɛ baa gba. 37 Wʋŋ wʋ kakaa sɛ wʋ kpiri ɩ na n nyina wʋ tɩŋtɩŋ wʋbu baalɛ jaŋ. Sɛ wʋ tawɩ sɛ, <<Mabu baalɛ jaŋ wina bɩrɛ, baa bu ɩ.>>

38 Ama gʋ fʋɔ kɩɛra baa na wʋbu wʋŋ na, ba tawɩ ba nyiŋeŋ-nyiŋeŋ sɛ, <<Wina n nyina gapatɩɛ diiri wʋŋ. N kɔŋ na dɩ kʋ ɩ na gapatɩɛ gaa a yɩɛ daa teri. 39 Dɩmʋŋ dʋɔ ba chaŋ wʋbu wʋŋ sɛ ba fɔŋɩ ɩ lɩɩ girepi fʋɔ gaa naŋ sɛ ba kʋ ɩ.>>

40 Sɛ Yesu tasɛ ba sɛ, <<Dɩmʋŋ dʋɔ sɛ fʋɔtɛ wʋŋ kɔnɛ na, be sɛ wʋ a yɩɛ fʋɔ kɩɛra baa?>>

41 Sɛ ba lɩsɛ nʋɔ sɛ, <<Wʋ a kʋ dɩmʋŋ kɩɛra basʋbʋɛ bana na wʋ a mʋ fʋɔ gaa dʋ kɩɛra ba fɔlɛ pamɩɛ naŋ baa karɩŋ saŋa talɛ na, baa fa ɩ wʋ teri.>>

42 Sɛ Yesu tawɩ ba sɛ ɩŋ karaŋ ta Ɩsʋɔ Sabɩɛwɩɛ ŋii? Ŋii ba sabɩɛ sɛ,

<<<Bʋɩ gaa danɛ mara pɩɛ ga na,

gaa aaŋ ja gaa chaŋ danɛ gaa dɩkɔŋ naŋ na doŋ.

Ɩsʋɔ n yɩɛ ŋina

sɛ dɩ yɩɛ doba daa asa dʋɔ.>✝>>

43 Sɛ Yesu tawɩ sɛ, <<Dɩmʋŋ dʋɔ maa tawɩ amɩɛ sɛ baa mʋ Ɩsʋɔ juori gaa lɩɩ amɩɛ jaŋ, na baa mʋ fa bakpa baa baa yɩɛ wʋ jawʋ na. 44 Wʋkʋma wʋŋ wʋ sala bʋɩ gaa dʋɔ na, gaa karɩɛ-karɩɛ ɩ aguŋda-aguŋda. Sɛ wʋkʋma wʋŋ bʋɩ gaa sala wʋ dʋɔ na, gaa patɩɛ ɩ.>>*

45 Gʋ Ɩsʋɔ sei bɩnɩɛ na Farasitina baa nyii Yesu aduuna na, ba jiŋ gʋ baa sɛ wʋ dʋɔna. 46 Dɩmʋŋ dʋɔ baa ja gbɩɛ gaa baa mʋna dʋɔ na baa chaŋ ɩ ama baa se jama baa akala takɩɛ bakpa baa jiŋ gʋ wʋ yɩɛ Ɩsʋɔ ɔja bɛ.