1 Sɛ Yesu ti jɔ diduu tawɩ ba sɛ, 2 <<Ɩsʋɔ juori gaa kɩɛna bɛ takɩɛ gʋ juo wʋrʋ desina sarɛ asa lɩɛ adiya fa wʋbu baalɛ jaŋ. 3 Wʋ kpiri wʋ tʋmɩra sɛ ba n ju ga tawɩ baa wʋ lɔ pam yagɛ ba na sɛ ba n kɔŋ ama ba pɩɛ.>>

4 Sɛ wʋ ti kpiri wʋ tʋmɩra fɔɩ barɛ tawɩ ba sɛ, <<N tawɩ baa ma lɔ pam yagɛ ba na sɛ ma yɩɛ sarɛ asadi adiya taŋ. Ma kʋ naa baalɛ na naa nuntɛ, sɛ bʋrʋkʋma yɩɛ siriya. N kɔŋ sarɛ asadi gaa tie.>>

5 Ama ba n dʋ ɩ nʋɔ ɔ sɛ ba lam gatʋŋgʋrʋ. Barɛ laŋ ba fʋɔsɛ naŋ sɛ barɛ dʋɔ laŋ ba gɩyɩɛ. 6 Sɛ baa ba kakaa na gba chaŋ juo wʋŋ tʋmɩra baa tugu ba sɛ ba kʋ ba. 7 Sɛ juo wʋŋ kara biŋbira fɔɩ. Sɛ wʋ kpiri wʋ yuora sɛ ba n ga kʋ gatagapʋna baa, na baa tʋ ba dɩɛ janɛ gaa.

8 Sɛ wʋ tawɩ wʋ tʋmɩra baa sɛ, <<Ma yɩɛ sarɛ asadi adiya ŋii taŋ, ama baa ma lɔ pam yagɛ ba na n daga na baa kɔŋ ŋ. 9 N ju dɩɛ naŋ gbɩɛsɛ bisi naŋ ga yagɛ wʋkʋma wʋŋ ɩ na na baa kɔŋ asadi adiya ŋii tie. 10 Dɩmʋŋ dʋɔ wʋ tʋmɩra baa ju dɩɛ naŋ gbɩɛsɛ bisi naŋ gapɩlɛkʋma ga yagɛ wʋkʋma wʋŋ ba na ɩ na, bakpa ba bama na ba sʋbʋɛ kpiniŋ kɔŋ. Sɛ mʋɔra su sarɛ dɩlɩɛtɩŋ gaa.>>

11 Sɛ Yesu tawɩ sɛ, <<Ama gʋ Juo wʋŋ jʋʋ sarɛ asadi dɩlɩɛtɩŋ gaa na wʋ a gaa kɩɛ mʋɔra baa na, wʋ na gʋ baalɛ wʋrʋ wɩɛ dɩmaŋ wʋ ba fuona sarɛ abʋrɩ afuusa a.>> 12 Sɛ wʋ tasɛ ɩ sɛ, <<Ma dɩɛtɛ, sɩnɛ sɛ nya yɩɛ gaa jʋʋ jɩna yela n ba fuona sarɛ abʋrɩ afuusa?>> Ama baalɛ wʋŋ n tawɩ bʋrʋ ʋ.

13 Sɛ Juo wʋŋ tawɩ wʋ tʋmɩra baa sɛ, <<N pɔgʋ wʋ pamɩɛ na wʋ nafara na ɩ lɔ ɩ asʋŋ ga dʋ giteŋteŋbiri naŋ, dɩmaŋ sɛ wiiniŋ na kela naŋ tawʋ wɩɛ.>>

14 Sɛ Yesu tawɩ sɛ, <<Ba yagɛ bakpa fɔɩ, ama pii barɛ sɛ ba lɩsɛ.>>

15 Sɛ Farasitina barɛ ga jaŋi ja gbɩɛ gaa baa mʋna dʋɔ yii Yesu gʋdʋ wʋ nʋɔnaŋ atawɩsa dʋɔ. 16 Ba kpiri ba kpalɛnara na Juo Hɛrɔdɩ wʋrʋgbɩɛtina tɩba barɛ sɛ ba n ju wʋ jaŋ ga tasɛ ɩ sɛ, <<Wʋkalaasa, dɩ jiŋ gʋ nya yɩɛ gasiŋteŋ diri bɛ, sɛ nyaa kalaa Ɩsʋɔ wɩɛ ŋii ŋɩ yɩɛ gasiŋteŋ ŋɩ gbɩɛ dʋɔ. Ŋɩ n tiri nyaŋ lɩɩ ŋii bakpa a tawɩ ɩ, akala takɩɛ nyaa kɩɛ wʋkpa asanaŋ n dɩ tawɩ naŋ ŋ. 17 Tawɩ daa, sɩnɛ n nyina nya nfɩɛrɛ wɩɛ ŋina dʋɔ? Ŋɩ wɩɛ gbɩɛ sɛ dɩ n tɔ lampo fa Roma Juo Kayisa yaa dɩ n baa tɔ?>>

18 Ama Yesu jiŋ ba nfɩɛrɛ sʋbʋ dʋɔ, wʋ tawɩ sɛ, <<Amɩɛ aluguusitina, be n yɩɛ sɛ ɩ ja sɛ ɩ yii maŋ gʋdʋ? 19 N mʋ diterembi dinari gaa baa mʋ baa tɔ lampo na kɔna maŋ na maa kɩɛ.>> Sɛ ba mʋ diterembi dinari kɔna ɩ 20 sɛ wʋ tasɛ ba sɛ, <<Mmʋɔ nyi na wʋ yɩrɛ n jaga na ga dʋɔ?>>

21 Sɛ ba lɩsɛ nʋɔ sɛ, <<Juo Kayisa teri.>>

Sɛ Yesu tawɩ ba sɛ, <<N mʋ ŋii ŋɩ yɩɛ Juo Kayisa teri na fa Juo Kayisa na ɩ mʋ ŋii ŋɩ yɩɛ Ɩsʋɔ teri na fa Ɩsʋɔ.>>

22 Gʋ ba nyii wɩɛ ŋina na, dɩ yɩɛ ba doba sɛ ba yela ɩ sɛ ba lam.

23 Dɩmʋŋ wɩɩ gana na, Sadukitina baa baa lɩɛ baa di sɛ feŋ lɩɩ sɩŋ naŋ wɩɛ na barɛ kɔŋ Yesu jaŋ na baa gaa tasɛ ɩ wɩɛ. 24 Sɛ ba tasɛ ɩ sɛ, <<Wʋkalaasa, Mosesi tawɩ daa sɛ baalɛ sɩŋ yela wʋ alʋ sɛ ba n lʋrʋ bie na, ŋɩ tiri gʋ wʋnabu n saa okulapu wʋŋ, na wʋ a lʋrʋ bie fa wʋ ŋmɩɛtɩ wʋŋ wʋ sɩŋ na. 25 Juo lʋrʋbie baala jaŋ lɩkaarɛ barɛ n cha ba wɩɛna. Sɛ ba tɩba bɩnɛ jaŋ wʋŋ saa alʋ, wʋ n lʋrʋ ʋ sɛ wʋ sɩŋ. Sɛ wʋnabu mʋ okulapu wʋŋ saa. 26 Dɩmʋŋ sɛ dɩ mɩɛna wʋnabu balatɛ wʋŋ na batoro-tɛ wʋŋ mʋ ga tala lɩkaaratɛ wʋŋ dʋɔ. 27 Wʋrʋgbɩɛ na, sɛ alʋ wʋŋ gba sɩŋ. 28 Dɩmʋŋ dʋɔ feŋ lɩɩ sɩŋ naŋ wɩɩ na, ba tɩba wʋ Mmʋɔ alʋ n nyina alʋ wʋŋ?>>Akala takɩɛ juo lʋrʋbie lɩkaarɛ baa kpiniŋ saa ɩ.

29 Sɛ Yesu lɩsɛ ba nʋɔ sɛ, <<Ɩ tʋsʋ gbɩɛ, akala takɩɛ ɩ ba jiŋ Ɩsʋɔ Sabɩɛwɩɛ ŋii yaa Ɩsʋɔ doŋ ŋ. 30 Akala takɩɛ feŋ lɩɩ sɩŋ naŋ wʋrʋgbɩɛ na, bakpa baa saa a, baa kɩɛna bɛ takɩɛ Ɩsʋɔ gabʋɔsɛ baa ba wɩɛ Ɩsʋɔ adugbe na. 31 Lɩɩna atatina feŋ lɩɩ sɩŋ naŋ na, ɩŋ karaŋ ŋii Ɩsʋɔ tawɩ fa amɩɛ sɛ, 32 maŋ n nyina Abiraham Ɩsʋɔ, Isaki Ɩsʋɔ na Yakubu Ɩsʋɔ wʋŋ wʋ ba yɩɛ atatina Ɩsʋɔ ɔ, ama wʋ yɩɛ bakpa bakɩɛnasa Ɩsʋɔ bɛ.>>

33 Gʋ jama baa nyii wɩɛ ŋii na, dɩ yɩɛ ba doba na wʋ kalaa ŋii.

34 Gʋ Farasitina baa nyii ganaŋkʋ Yesu lɩsɛ Sadukitina baa nʋɔ sɛ dɩ duo ba nʋɔ na, ba yagɛ dɔŋa gaa jaŋi. 35 Sɛ ba tɩba wʋrʋ wʋŋ wʋ yɩɛ mbara wʋbɩɩsa na tasɛ ɩ wɩɛ mʋ yɩɛ ɩ lɔ tɩba sɛ, 36 <<Wʋkalaasa, Mosesi mbara ŋii kpiniŋ naŋ, gamʋɔ n nyina gajaŋ-janɛ?>>

37 Sɛ Yesu lɩsɛ ɩ nʋɔ sɛ, <<Ja Ɩsʋɔ nya Ɩsʋɔ lɩɩ n digela naŋ kpiniŋ, n sʋbʋ kpiniŋ, nya nfɩɛrɛ kpiniŋ naŋ.✝ 38 Mbara gana n nyina gaa ga dɔŋ asanaŋ sɛ ga yɩɛ gajaŋ-janɛ. 39 Mbara bʋlatɛ kɩɛna takɩɛ gana. Gaa n nyina sɛ ja n dʋɔ takɩɛ n wʋsɛ.✝ 40 Mosesi Mbara ŋii na Ɩsʋɔ bajana baa kalaa ŋii kpiniŋ sɩmɩɛɩ dɩmʋŋ mbara ala ŋina dʋɔ bɛ.>>

41 Gʋ Farasitina baa jaŋi na, Yesu tasɛ ba sɛ, 42 <<Sɩnɛ n nyina amɩɛ nfɩɛrɛ lɩɩna Kirisito wʋŋ dʋɔ?>>Mmʋɔ ganana bie n nyina ɩ?

Sɛ ba lɩsɛ nʋɔ sɛ, <<Dawidi ganana bie bɛ.>>

43 Sɛ Yesu ti tasɛ baa sɛ, Be dʋɔ sɛ Ɩsʋɔ feliŋ yela sɛ Dawidi yagɛ ɩ sɛ, <<Kpaŋjuo?>> Akala takɩɛ Dawidi tawɩ sɛ,

44 <<Ɩsʋɔ wʋŋ n tawɩ ma Kpaŋjuo sɛ,

Cha ma pam jɩsaŋ dʋɔ ga

tala gʋ maa mʋ n badʋŋna

mʋ yɩɛ n nafara dɩjagatɩŋ.✝>>

45 Sɛ Dawidi tɩŋtɩŋ yagɛ Kirisito sɛ, <<Kpaŋjuo na, sɩnɛ sɛ Kirisito wʋŋ a ti dɩlɛ yɩɛ Dawidi ganana bie?>> 46 Wʋrʋ n dɩlɛ lɩsɛ nʋɔ ɔ. Lɩɩ dɩmʋŋ wɩɩ gana mʋ a ju na, wʋrʋ n ti dɩlɛ yu digela tasɛ ɩ wɩɛ ŋarɛ ɛ.