1 Gʋ Yesu a lɩɩ Ɩsʋɔ tʋm danɛ gaa naŋ na, wʋ kpalɛnara baa kɔŋ wʋ jaŋ gaa tawɩ ɩ sɛ wʋ n kɩɛ ganaŋkʋ Ɩsʋɔ tʋm danɩŋ ŋii kɩɛna na. 2 Sɛ Yesu tawɩ ba sɛ, <<Naa ɩ na ŋina kpiniŋ yaa? Maa tawɩ sɛ n nyii na dieli sɛ bʋɩ garɛ baa ti jaga ga dʋɔ-dʋɔ ɔ. Baa salɩɛ ŋɩ kpiniŋ.>>

3 Gʋ Yesu chaɩ Olifi dasɛ bʋrɔŋ gaa dʋɔ na, wʋ kpalɛnara baa kɔŋ wʋ nyiŋeŋ jaŋ gaa tasɛ ɩ sɛ, <<Tawɩ daa, saŋa gamʋɔ sɛ ŋina aja tibi? Sɛ be aaŋ ja yɩɛ daasɛ gaa gaa kalaa sɛ nya bɔrɛ kɔŋ na dulunya dɩtamtɩŋ talɛ?>>

4 Yesu lɩsɛ ba nʋɔ sɛ, <<N kɩɛ amɩɛ wʋsɛ dʋɔ na dieli, na wʋrʋ n baa pɩna amɩɛ. 5 Akala takɩɛ bakpa fɔɩ aja kɔŋ ma yɩrɛ naŋ na baa gaa tawɩ sɛ baa n nyina Kirisito wʋŋ na baa pɩna bakpa fɔɩ.>> 6 Ɩ nyii yuo gaa ga tirina amɩɛ na yuo gaa ga wɩɛ taŋasɛ wɩɛ na, n baa yela na amɩɛ agela a kʋlʋ. Akala takɩɛ ŋɩ tiri gʋ ŋina a tibi, ama ŋii kalaa sɛ dulunya dɩtamtɩŋ talɛ ɛ. 7 Dɩɛsɛ aja yuo dɩɛsɛ na juori a yuo juori. Dusoŋ ŋii ŋɩ nʋɔ wɩɛ doŋ aja kɔŋ na tibi a jigisi akpie dʋɔ-akpie dʋɔ. 8 Ŋina kpiniŋ kɩɛna bɛ takɩɛ dʋŋɩwʋ ŋii ŋɩ dɔŋ asanaŋ pɔɩ na alʋ a lʋrʋ na.

9 Saŋa gana naŋ, baa lɩsɛ amɩɛ fa na baa nyala amɩɛ na baa kʋ amɩɛ. Ma dʋɔ, bakpa kpiniŋ aja kɔla amɩɛ. 10 Saŋa gana naŋ, bakpa fɔɩ aaŋ ja yela ba lɩɛdi naŋ na baa lɩsɛ dɔŋa fa na baa kɔla dɔŋa. 11 Akarɩɛ bajana fɔɩ aja kɔŋ gaa pɩna bakpa fɔɩ. 12 Wɩɛ asʋbʋɛ fɔɩ dʋɔ, bakpa fɔɩ baa dɩlɛ ja ba dɔŋa a. 13 Ama wʋŋ wʋ a sɩŋ na doŋ ga tala dɩtamtɩŋ na, wʋ a yu nkpa. 14 Baa tawɩ Ɩsʋɔ juori gaa wɩɛ abama ŋii fa atawɩ yɩrɩ kpiniŋ pɔɩ na dulunya dɩtamtɩŋ a tala.

15 Sɛ Yesu ti ju dʋɔ tawɩ sɛ, <<Dɩ kɔŋ sɛ ɩ na akɔlɛsa✝ ŋii ŋii yɩɛ Ɩsʋɔ tʋm danɛ gaa iniesi ŋii Ɩsʋɔ pala na ɔja Daniyeli dʋɔ tawɩ na, n yela na wʋkʋma wʋŋ wʋ a karaŋ dɩmʋŋ wɩɛ ŋina na a nyii tie.>> 16 N yela baa ba wɩɛ Yudiya tibi dʋɔ na a se ju bʋrɔŋsɛ dʋɔ. 17 N yela na wʋŋ wʋ wɩɛ danɛ adugbe na, n baa tibi jʋʋ danɛ naŋ ga mʋ bʋrʋ. 18 N yela na wʋŋ wʋ wɩɛ fʋɔnaŋ na, n baa yɩɛ wʋ nfɩɛrɛ sɛ wʋ a ti bɔrɛ kɔŋ dɩɛ gaa mʋ wʋ adugbe gagba. 19 Dɩmʋŋ wɩɛ ŋina naŋ na, filietina na alʋsɔna, baa lakʋ. 20 N jɔ dɩga na amɩɛ sebisi n baa tibi gbaŋgbaŋ saŋa yaa Fɩɛsɛ wɩɩ. 21 Akala takɩɛ dɩmʋŋ saŋa gana naŋ na, wʋkpa wʋsɛ aja chaŋ ɩ na dieli kii ŋii ŋɩ tibi lɩɩ dulunya dɩfaratɩŋ gaa tala jaŋ, sɛ ŋɩ ŋarɛ baa ti tibi i. 22 Sɛ Ɩsʋɔ n kɔgɩ gɩyɩɛnɩŋ ŋina dʋɔ na, dɩmʋŋ bɩrɛ, nafʋɔ wʋrʋ baa yu nkpa a. Ama baa wʋ lɩsɛ ba na dʋɔ, wʋ a kɔgɩ gɩyɩɛnɩŋ ŋii dʋɔ. 23 Dɩmʋŋ saŋa gana naŋ na, sɛ wʋrʋ tawɩ amɩɛ sɛ, <<N kɩɛ, Kirisito wʋŋ mɩnaŋ yaa wʋŋ n wɩɛna dɩmaŋ na, n baa lɩɛ di.>> 24 Akala takɩɛ barɛ baa baa yɩɛ akarɩɛ sɛ ba yɩɛ Kirisito na akarɩɛ bajana aja kɔŋ gaa yɩɛ daasɛ ajanɩɛ na adaŋgana na baa mʋ pɩna baa Ɩsʋɔ lɩsɛ ba na gba. 25 N nyii, ma chɩŋkpɩɛ tawɩ amɩɛ pɔɩ na saŋa gana a tala.

26 <<Dɩmʋŋ dʋɔ sɛ wʋrʋ tawɩ amɩɛ sɛ, <N kɩɛ, Kirisito wʋŋ wɩɛ ifuli dʋɔ na,> n baa <ju dɩmaŋ ga kɩɛ,> yaa <wʋŋ n wɩɛna danɛ naŋ jɩna na,> n baa lɩɛ di. 27 Akala takɩɛ ganaŋkʋ duoni ŋmaŋi a charɩɛ lɩɩ dɩlɩɩtɩŋ mʋ ju dɩsalɩtɩŋ na bakpa a na ŋɛ na, dɩmʋŋ sɛ Wʋkpa Bu wʋŋ bɔrɛ kɔŋ aja yɩɛ. 28 Diele gaa atatɛ wɩɛ na, dɩmaŋ sɛ ajɩsaŋ asila.>>

29 Sɛ Yesu ju dʋɔ tawɩ sɛ dɩmʋŋ saŋa gana naŋ, wʋkpa wʋsɛ chaŋ wʋrʋgbɩɛ na,

<<wiita baa lɩɩ ɩ,

sɛ gafita baa fʋlʋŋsɛ ɛ.

Achikpebi aja kuli lɩɩ Ɩsʋɔ adugbe gaa sala,

na adugbe abʋrɩ kpiniŋ ajigisi.>>✝

30 <<Dɩmʋŋ saŋa gana naŋ na, bakpa aja na daasɛ Ɩsʋɔ tanɛ naŋ ŋii ŋii kalaa sɛ Wʋkpa Bu wʋŋ a kɔnɛ, na atawɩ yɩrɩ kpiniŋ aja bɔtaa. Baa na Wʋkpa Bu wʋŋ a kɔnɛ na doŋ na jilima janɛ lɩɩ Ɩsʋɔ tanɩɛ naŋ. 31 Wʋ a kpiri wʋ gabʋɔsɛ tibi dʋɔ na baa fʋlʋ dɩgaŋtaŋ na doŋ na baa sila baa wʋ lɩsɛ dulunya naŋ gapɩlɛkʋma na gaa jaŋi.>>

32 Sɛ Yesu jɔ ba diduu sɛ, <<N kɩɛ figi daŋ na ɩ kpalɩɛna bʋrʋ garɛ. Ga pɔrɔgɩ na, n jiŋ gʋ awuluŋ tirina. 33 Dɩmʋŋ gba sɛ ɩ na ŋina kpiniŋ tibi na, n jiŋ gʋ Wʋkpa Bu wʋŋ bɔrɛ kɔŋ tirina, wʋ wɩɛ buonɔ. 34 Maa tawɩ sɛ n nyii na dieli sɛ gɩnanaŋ gana baa laŋ ŋ ga tala saŋa gaa ŋina kpiniŋ aja tibi. 35 Ɩsʋɔ adugbe na tie aja laŋ, ama ma wɩɛ bɩrɛ, ŋii laŋ ŋ.>>

36 Sɛ Yesu ju dʋɔ tawɩ sɛ, <<Wʋrʋ ba jiŋ wɩɩ gaa yaa saŋa gaa a. Ɩsʋɔ gabʋɔsɛ baa ba wɩɛ Ɩsʋɔ adugbe yaa Bu wʋŋ gba ba jiŋ ŋ, amʋɔ Juo wʋŋ nyiŋeŋ. 37 Ganaŋkʋ dɩ cha yɩɛ Nowa saŋa na, dɩmʋŋ sɛ Wʋkpa Bu wʋŋ bɔrɛ kɔŋ aja yɩɛ. 38 Akala takɩɛ wɩɛ ŋina naŋ pɔɩ na lɩŋ a su walɛ mʋ dulunya na, bakpa cha baa di baa nyʋɔ yela baa fa sarɛ ga tala wɩɩ gaa Nowa jʋʋ buori janɛ gaa naŋ. 39 Na ba cha ba ba jiŋ sɛ bʋrʋ garɛ aja tibi ba dʋɔ ɔ, mʋ ga tala gʋ lɩŋ su walɛ mʋ ba kpiniŋ laŋ. Dɩmʋŋ sɛ aja yɩɛ Wʋkpa Bu wʋŋ bɔrɛ kɔŋ naŋ. 40 Baala bala aja wɩɛ fʋɔnaŋ, baa mʋ wʋrʋ na baa yela wʋrʋ. 41 Ala bala aja naŋ gamɩsɛ bʋɩ garɛ dʋɔ, baa mʋ wʋrʋ na baa yela wʋrʋ.>>

42 <<Dɩmʋŋ dʋɔ, n duo amɩɛ wʋsɛ dʋɔ, akala takɩɛ ɩ ba jiŋ wɩɩ gaa amɩɛ kpaŋjuo aja bɔrɛ kɔŋ ŋ. 43 Ama n nyii ŋina tie na dieli sɛ, nafʋɔ waatɛ jiŋ saŋa gaa ŋmɩɛlɛ aja kɔŋ yuluma na, nafʋɔ wʋ a gie wʋ waa na wʋ n baa salɩɛ jʋʋ. 44 Dɩmʋŋ dʋɔ amɩɛ gba ŋɩ tiri gʋ n desina amɩɛ wʋsɛ ɩ dana, akala takɩɛ Wʋkpa Bu wʋŋ aja kɔŋ saŋa gaa ɩ ba kɩɛna wʋ gbɩɛ ɛ.>>

45 Sɛ Yesu tawɩ sɛ, <<N Mmʋɔ n nyina tʋmɩrɛ gasiŋteŋ-tɛ na tʋmɩrɛ wɩɛ jɩmɩrɛ? Wʋŋ n nyina wʋŋ wʋ kpaŋjuo yela sɛ wʋ a kɩɛ wʋ tʋmɩra ba baŋbaŋ wʋ waa dʋɔ sɛ wʋ a fa ba adiya saŋa bam naŋ. 46 Asadi n nyina tʋmɩrɛ wʋŋ wʋ kpaŋjuo aja bɔrɛ kɔŋ gaa mɩɛna ɩ yela wʋ a tʋm wʋ dɩtʋm ga gbɩɛ dʋɔ. 47 Maa tawɩ sɛ n nyii na dieli sɛ kpaŋjuo wʋŋ aja mʋ wʋ akpaŋta kpiniŋ dʋ wʋ pamɩɛ naŋ sɛ wʋ n kɩɛ dʋɔ. 48 Ama dɩ n mʋ takɩɛ tʋmɩrɛ nyinaŋ doŋ-tɛ wʋŋ tawɩ wʋ nyinaŋ sɛ, <Ma kpaŋjuo aja taŋgɩlɛ pɔɩ na wʋ a kɔŋ,> 49 sɛ wʋ fara wʋ a tugu wʋ dɔŋa tʋmɩra baa, wʋ a di yela wʋ na sʋlʋŋ nyʋɔra baa nyʋɔ. 50 Dɩmʋŋ tʋmɩrɛ wina wʋ kpaŋjuo wʋŋ aja wʋ a purugi ɩ wɩɩ gaa wʋ aa kɩɛ wʋ gbɩɛ na saŋa gaa wʋ ba jiŋ ŋ. 51 Wʋ a fɔŋɩ wʋ dɩlɛ na dieli na wʋ a mʋ ɩ kpi aluguusitina dʋɔ, diele gaa wiiniŋ na kela naŋ tawʋ wɩɛ na.