1 <<Sɛ Yesu ti jɔ diduu sɛ saŋa gana naŋ na, Ɩsʋɔ Juori gaa aja kɩɛna bɛ takɩɛ gʋ ala gifi barɛ baa ba ba jiŋ baalɛ na mʋ ba fitila aba lɩɩ baa ga jaŋina alʋfɔlɛ baalɛ. 2 Ba tɩba ba nʋŋ yɩɛ bamalaŋpʋna sɛ ba nʋŋ dʋɔ yɩɛ wɩɛ jimɩra. 3 Bamalaŋpʋna baa mʋ ba fitila aba, ama ba n mʋ nuŋ chaŋ kpi i. 4 Ama wɩɛ jimɩra baa bɩrɛ mʋ ba fitila aba na nuŋ sapɩɛ bie naŋ chaŋ kpi. 5 Gʋ alʋfɔlɛ baalɛ n kɔŋ bileŋ na, asoroŋ chaŋ ba sɛ ba duo.>>

6 <<Gʋ dɩ tala tɩɛtɩtɩba na, wʋrʋ kuusi tawɩ sɛ alʋfɔlɛ baalɛ wʋŋ a kɔnɛ, n kʋlʋ ga jaŋina ɩ!>>

7 Sɛ ala gifi baa ba ba jiŋ baalɛ na kpiniŋ feŋ kʋlʋ jiŋna ba fitila aba. 8 Sɛ bamalaŋpʋna baa tawɩ wɩɛ jimɩra baa sɛ, <<N fa daa amɩɛ nuŋ ŋii ŋarɛ. Akala takɩɛ daa fitila aba aja ŋii duŋ.>>

9 Sɛ wɩɛ jimɩra baa lɩsɛ ba nʋɔ sɛ, <<Aye, daa teri n bɔla ŋii tala daa na amɩɛ ɛ. N ju baa baa yaa nuŋ na jaŋ na ɩ lɩɛ ŋarɛ.>>

10 Gʋ baa ju na baa ga lɩɛ nuŋ na, sɛ alʋfɔlɛ baalɛ wʋŋ gaa talɛ. Sɛ wʋ na ala baa ba ba jiŋ baalɛ sɛ ba kʋla ba wʋsɛ ba dana ɩ na, jʋʋ waa gaa baa di sarɛ asadi adiya na naŋ. Sɛ ba chaŋ bʋɔlɛ tɔ.

11 Wʋrʋgbɩɛ na, bamalaŋpʋna baa kɔŋ gaa jɔ bʋɔlɛ tawɩ sɛ, <<Kpaŋjuo, kpaŋjuo, tʋlʋ daa.>>

12 Ama alʋfɔlɛ baalɛ wʋŋ lɩsɛ ba nʋɔ sɛ, <<Maa tawɩ sɛ n nyii na dieli takɩɛ ma ba jiŋ amɩɛ ɛ.>>

13 <<Dɩmʋŋ dʋɔ n kɩɛ amɩɛ wʋsɛ dʋɔ na dieli, akala takɩɛ ɩ ba jiŋ wɩɩ gaa yaa saŋa gaa ŋii kɔŋ na a.>>

14 Sɛ Yesu ti jɔ diduu sɛ, <<Ɩsʋɔ juori gaa kɩɛna bɛ takɩɛ gʋ baalɛ wʋrʋ kuli gbɩɛ ju dɩɛ garɛ dʋɔ. Sɛ wʋ yagɛ wʋ tʋmɩra gaa jaŋi wʋ jaŋ, sɛ wʋ mʋ wʋ akpaŋta dʋ ba pamɩɛ naŋ sɛ ba n kɩɛ dʋɔ. 15 Wʋ fa wʋrʋ diterembi talɛntɩ anʋŋ, wʋrʋ diterembi talɛntɩ ala, sɛ wʋrʋ dʋɔ diterembi talɛntɩ garɛ. Ganaŋkʋ wʋkʋma aja dɩlɛ yɩɛ bʋrʋ garɛ. Wʋrʋgbɩɛ na sɛ wʋ kuli gbɩɛ. 16 Sɛ baalɛ wʋŋ wʋ yu diterembi talɛntɩ anʋŋ na laŋ gabʋanaŋ mʋ wʋ aterembie ga dɩ yawʋ sɛ wʋ yu diterembi talɛntɩ anʋŋ kpi. 17 Dɩmʋŋ sɛ wʋŋ wʋ yu diterembi talɛntɩ ala na gba yu diterembi talɛntɩ ala kpi. 18 Ama baalɛ wʋŋ wʋ yu diterembi talɛntɩ garɛ na bɩrɛ, wʋ ju ga wuru bʋɔ sɛ wʋ mʋ wʋ kpaŋjuo aterembie ŋii ga wuu.

19 <<Gʋ dɩ taŋgɩlɛ na, tʋmɩra baa kpaŋjuo wʋŋ bɔrɛ kɔŋ. Sɛ wʋ yagɛ ba sɛ ba n gaa kalaa ɩ wʋ aterembie nʋɔ. 20 Sɛ wʋŋ wʋ yu diterembi talɛntɩ anʋŋ na mʋ diterembi talɛntɩ anʋŋ ŋii wʋ yu kpi na kɔŋ, sɛ wʋ tawɩ sɛ Kpaŋjuo, nya fa maŋ diterembi talɛntɩ anʋŋ bɛ. Kɩɛ, ma yu diterembi talɛntɩ anʋŋ kpi ŋɩ dʋɔ.>>

21 <<Sɛ wʋ Kpaŋjuo wʋŋ tawɩ ɩ sɛ ma tʋmɩrɛ wʋbam wʋŋ wʋ a di gasiŋteŋ! N sa na dɩtʋm. Nya di gasiŋteŋ abʋrɩ pii ŋina dʋɔ, maa yela na nyaa kɩɛ abʋrɩ fɔɩ dʋɔ. Kɔŋ ma asadi adiya di tie na maŋ na nyaŋ dɩɩ lɩɛ daa asa.>>

22 <<Sɛ wʋŋ wʋ yu diterembi talɛntɩ ala na gba kɔŋ gaa tawɩ sɛ Kpaŋjuo, nya fa maŋ diterembi talɛntɩ ala bɛ. Kɩɛ, ma yu diterembi talɛntɩ ala kpi ŋɩ dʋɔ.>>

23 Sɛ wʋ Kpaŋjuo wʋŋ tawɩ ɩ sɛ, <<Ma tʋmɩrɛ wʋbam wʋŋ wʋ a di gasiŋteŋ! N sa na dɩtʋm. Nya di gasiŋteŋ abʋrɩ pii ŋina dʋɔ, maa yela na nyaa kɩɛ abʋrɩ fɔɩ dʋɔ. Kɔŋ ma asadi adiya di tie na maŋ na nyaŋ dɩɩ lɩɛ daa asa.>>

24 Sɛ wʋŋ wʋ yu diterembi talɛntɩ garɛ kɔŋ gaa tawɩ sɛ, <<Kpaŋjuo, ma jiŋ gʋ n wɩɛ wɩɛ doŋ. Nyaa kara diele gaa nya n duu u, sɛ nyaa kʋla diele gaa nya n ŋmati bie ɩ. 25 Maa se nyaŋ dʋɔ ma ga wuru bʋɔ sɛ ma mʋ nya talɛntɩ ga wuu. Kɩɛ, nya diterembi talɛntɩ mɩnaŋ.

26 <<Sɛ wʋ kpaŋjuo wʋŋ lɩsɛ nʋɔ sɛ nyaŋ tʋmɩrɛ sʋbʋ wʋlʋjɔtɛ! N jiŋ gʋ maa kara diele gaa ma n du u, sɛ maa kʋla diele gaa ma n ŋmati bie ɩ. 27 Dɩmʋŋ bɩrɛ nafʋɔ nya mʋ ma aterembie ŋii ga dʋ aterembie disiitiŋ ganaŋkʋ maa bɔrɛ kɔŋ na maa lɩɛ ŋɩ na ŋɩ tɔnʋɔ.>>

28 <<N lɩɛ diterembi talɛntɩ gaa lɩɩ wʋ jaŋ na ɩ mʋ kpi wʋŋ wʋ wɩɛna diterembi talɛntɩ gifi na dʋɔ. 29 Akala takɩɛ wʋkʋma wʋŋ wʋ wɩɛna bʋrʋ garɛ na, Ɩsʋɔ aja mʋ ŋarɛ kpi wʋ dʋɔ na wʋ a yu fɔɩ. Ama wʋkʋma wʋŋ wʋ tana na, pii ŋii wʋ wɩɛna na, Ɩsʋɔ aja lɩɛ lɩɩ wʋ jaŋ. 30 Tʋmɩrɛ kpakpuo wʋŋ bɩrɛ, n lɔ ɩ tʋsʋ asʋŋ mʋ ga dʋ giteŋteŋbiri naŋ. Diele gaa wiiniŋ na kela naŋ tawʋ wɩɛ.>>

31 Sɛ Yesu ti tawɩ sɛ, <<Saŋa gaa Wʋkpa Bu wʋŋ aja bɔrɛ kɔŋ wʋ jilima naŋ yela Ɩsʋɔ gabʋɔsɛ kpiniŋ kpi wʋ dʋɔ na, wʋ a cha wʋ jilima juorigbeli dʋɔ adugbe. 32 Atawɩ yɩrɩ kpiniŋ aja sila wʋ jaŋ, na wʋ a kpara ba tɩba takɩɛ ganaŋkʋ feŋ kparɛ a kpara feŋ na ajalasɛ tɩba na. 33 Wʋ a mʋ feŋ si wʋ jɩsaŋ dʋɔ na wʋ a mʋ ajalasɛ si wʋ naŋbii dʋɔ.

34 <<Dɩmaŋ sɛ juo wʋŋ aja wʋ a tawɩ baa ba wɩɛ wʋ pam jɩsaŋ dʋɔ na sɛ n kɔŋ, amɩɛ baa Majuo yɩɛ amɩɛ kusee. N kɔŋ na ɩ gaa di Ɩsʋɔ juori gaa wʋ desina si fa amɩɛ lɩɩ naŋ dulunya dɩfaratɩŋ. 35 Akala takɩɛ gʋ dusoŋ chamɩna maŋ na, ɩ fa maŋ adiya sɛ ma di, nyʋɔlɛ chamɩna maŋ na, ɩ fa maŋ lɩŋ sɛ ma nyʋɔ, ma yɩɛ mʋɔrɛ na sɛ ɩ lɩɛ maŋ amɩɛ waasɛ dʋɔ. 36 Gʋ maa ja abʋrɩ afuusa na, ɩ fa maŋ, ma kili na, ɩ kɩɛ ma dʋɔ, ma wɩɛ danɛ dɩtʋɔtɩŋ na sɛ ɩ gaa kɩɛ maŋ.>>

37 Dɩmaŋ sɛ bachirigisa aja lɩsɛ ɩ nʋɔ sɛ, <<Kpaŋjuo, be wɩɩ sɛ dɩ na nyaŋ gʋ dusoŋ a kʋ nyaŋ sɛ dɩ fa nyaŋ adiya yaa nyʋɔlɛ a kʋ nyaŋ sɛ dɩ fa nyaŋ lɩŋ sɛ n nyʋɔ? 38 Be wɩɩ sɛ dɩ na nyaŋ gʋ nya yɩɛ mʋɔrɛ sɛ dɩ lɩɛ nyaŋ daa waasɛ dʋɔ yaa nyaa ja abʋrɩ afuusa sɛ dɩ fa nyaŋ? 39 Be wɩɩ sɛ dɩ na nyaŋ gʋ nyaa kili yaa nya wɩɛ danɛ dɩtʋɔtɩŋ sɛ dɩ gaa kɩɛ nyaŋ?>>

40 Dɩmaŋ sɛ Juo wʋŋ aja lɩsɛ nʋɔ sɛ, <<Maa tawɩ sɛ n nyii na dieli sɛ bʋrʋkʋma gaa ɩ yɩɛ fa ma dɔŋa ba pii-pii bana tɩba wʋrʋ na, ɩ yɩɛ fa maŋ.

41 <<Sɛ wʋ a tawɩ baa ba wɩɛ wʋ naŋbii dʋɔ na sɛ n lɩɩ ma jaŋ, amɩɛ baa Ɩsʋɔ tawɩ amɩɛ nʋɔsɛ. N pala ga jʋʋ awʋrʋfʋɔ bʋala gaa gaa dum na naŋ gaa Ɩsʋɔ desina si Sɩtanɩ na wʋ gabʋɔsɛ na. 42 Akala takɩɛ gʋ dusoŋ a kʋ maŋ na, ɩŋ fa maŋ adiya na maa di i, nyʋɔlɛ a kʋ maŋ na, ɩŋ fa maŋ lɩŋ na maa nyʋɔ ɔ. 43 Ma yɩɛ mʋɔrɛ na, ɩŋ lɩɛ maŋ amɩɛ waasɛ dʋɔ ɔ, maa ja abʋrɩ afuusa na, ɩŋ fa maŋ ŋ, maa kili sɛ ma wɩɛ danɛ dɩtʋɔtɩŋ na, ɩŋ kɩɛ maŋ ŋ.>>

44 Dɩmaŋ sɛ baa gba baa lɩsɛ nʋɔ sɛ, <<Kpaŋjuo, be wɩɩ sɛ dɩ na nyaŋ gʋ dusoŋ a kʋ nyaŋ yaa nyʋɔlɛ a kʋ nyaŋ yaa nya yɩɛ mʋɔrɛ yaa nyaa ja abʋrɩ afuusa yaa nyaa kili yaa nya wɩɛ danɛ dɩtʋɔtɩŋ sɛ dɩ n kɩɛ n dʋɔ?>>

45 Dɩmaŋ sɛ juo wʋŋ aja lɩsɛ ba nʋɔ sɛ, <<Maa tawɩ sɛ n nyii na dieli sɛ bʋrʋkʋma gaa ɩŋ yɩɛ fa ma nabie ba pii-pii bana tɩba wʋrʋ na, ɩŋ yɩɛ fa maŋ ŋ.>>

46 Dɩmaŋ sɛ <<wʋ a mʋ ba ju dɩlɛ fɔŋɩwʋ gakpaa naŋ ama bachirigisa baa bɩrɛ, wʋ a mʋ ba ju nkpa ŋii ŋɩ taŋ gɩtɛ na naŋ.>>