1 Gʋ tɩɛna nafo na, sei bɩnɩɛ na dɩɛ bɩnɩɛ baa kpiniŋ jɔ dɩkɔŋ sɛ baa kʋ Yesu. 2 Ba mʋ dɩgbaraŋgbaraŋ pɔgʋ ɩ sɛ ba mʋ ɩ ju ga fa Pilato, Roma bɩnɛ wʋŋ wʋ a kɩɛ Isirali tibi dʋɔ na.

3 Gʋ Yudasi wʋŋ wʋ lɩsɛ Yesu fa na, na gʋ ba fu Yesu dɩpʋɛ na, wʋ nu wʋ wʋsɛ sɛ wʋ bɔsɩna diterembi fʋlʋm bie nkuo na sala ŋii juna sei bɩnɩɛ na dɩɛ bɩnɩɛ baa. 4 Sɛ wʋ tawɩ sɛ, <<Ma yɩɛ dɩsʋbʋ takɩɛ gʋ ma lɩsɛ wʋŋ wʋ n yɩɛ dɩsʋbʋ na fa. Ama ba tawɩ ɩ sɛ ŋɩ n tiri daa a. N wɩɛ mɩnaŋ.>>

5 Dɩmʋŋ dʋɔ Yudasi lɔ aterembie ŋii dʋ Ɩsʋɔ tʋm danɛ naŋ sɛ wʋ lam ga dʋ wʋ wʋsɛ ganya.

6 Sɛ sei bɩnɩɛ baa mʋ aterembie bie ŋii tawɩ sɛ, <<Ŋii chicha daa mbara na dɩɩ mʋ ga kpi Ɩsʋɔ tʋm danɛ naŋ aterembie dʋɔ, akala takɩɛ ŋɩ yɩɛ asima aterembie bɛ.>> 7 Dɩmʋŋ dʋɔ ba yɩɛ ba nfɩɛrɛ sɛ baa mʋ aterembie ŋii ga lɩɛ dinyiŋkpa maarɛ wʋrʋ tibi na baa wuu mʋɔra. 8 Dɩmʋŋ dʋɔ sɛ baa yagɛ dɩmaŋ sɛ asima tibi gaa tala jaŋ. 9 Sɛ dɩ yela sɛ wɩɛ ŋii Ɩsʋɔ ɔja Yeremiya tawɩ si na kɔŋ tɩba sɛ, <<Ba mʋ diterembi fʋlʋm bie nkuo na sala ŋii ŋɩ yɩɛ yawʋ gaa Isiralitina mʋ jaga wʋ nyi dʋɔ. 10 Sɛ ba mʋ ŋɛ mʋ lɩɛ dinyiŋkpa maarɛ wʋrʋ tibi ganaŋkʋ Ɩsʋɔ dʋ maŋ na.>>✝

11 Sɛ ba mʋ Yesu ga sɩŋ Pilato wʋŋ wʋ yɩɛ Isirali tibi dʋɔ kɩɛrɛ na asanaŋ sɛ wʋ tasɛ ɩ sɛ, <<Nyaŋ n nyina Yudatina Juo naa?>>

Sɛ Yesu lɩsɛ ɩ nʋɔ sɛ, <<Ɛɛŋ, ŋii sɛ nya tawɩ na.>>

12 Gʋ sei bɩnɩɛ na dɩɛ bɩnɩɛ baa pʋɩ Yesu na, wʋ n lɩsɛ nʋɔ ɔ. 13 Sɛ Pilato ti bɔrɛ tasɛ ɩ sɛ, <<Nyaa nyii seriya gaa baa di baa sʋɔ nyaŋ naa?>> 14 Ama Yesu n lɩsɛ wɩɛ ŋii garɛ nʋɔ ɔ. Sɛ dɩ yɩɛ Isirali tibi dʋɔ kɩɛrɛ wʋŋ doba fɔɩ.

15 Bɩriŋnʋɔ kʋma dɩ tala Yudatina nyiŋi asadi adiya di na, ŋɩ yɩɛ Pilato ayɩɛsa sɛ wʋ n yela bakpa baa ba tɔ ba danɛ na tɩba wʋŋ jama baa a jawʋ na wʋrʋ fa ba. 16 Saŋa gana na, ba tɔ baalɛ wʋrʋ danɛ wʋŋ wʋ yu yɩrɛ sʋbʋ sɛ baa yagɛ ɩ sɛ Barabasi na. 17 Gʋ jama baa sila na, Pilato tasɛ ba sɛ, <<Wʋ Mmʋɔ sɛ ɩ ja sɛ maŋ yela fa amɩɛ, Barabasi yaa Yesu wʋŋ baa yagɛ Kirisito naa?>> 18 Akala takɩɛ Pilato jiŋ gʋ kɔlɩŋ dʋɔ sɛ ba mʋ Yesu kɔna ɩ.

19 Gʋ Pilato chaɩ wɩɛ diri gbeli dʋɔ na, wʋ alʋ kpiri gaa tawɩ ɩ sɛ, <<N baa yɩɛ baalɛ wina wʋŋ wʋ yɩɛ wʋchirigisa na bʋrʋ. Akala takɩɛ wʋ dʋɔ ma na awʋrʋfʋɔ ma dosi naŋ daŋda yuluma.>>

20 Ama Ɩsʋɔ sei bɩnɩɛ na dɩɛ bɩnɩɛ baa fuosi dʋ jama baa sɛ ba n tawɩ Pilato sɛ wʋ n yela Barabasi na baa kʋ Yesu.

21 Sɛ Pilato tasɛ ba sɛ, <<Bakpa bala baa tɩba wʋ Mmʋɔ sɛ ɩ ja sɛ maŋ yela fa amɩɛ?>>

Sɛ ba lɩsɛ ɩ nʋɔ sɛ, <<Barabasi.>>

22 Sɛ Pilato ti bɔrɛ tasɛ ba sɛ, <<Be sɛ ɩ ja sɛ maŋ yɩɛ Yesu wʋŋ baa yagɛ ɩ Kirisito naa?>>

Sɛ ba kpiniŋ ba lɩsɛ nʋɔ sɛ, <<Jɔ ɩ daŋ gasagasa dʋɔ.>>

23 Sɛ Pilato tasɛ sɛ, <<Be dɩsʋbʋ sɛ wʋ yɩɛ bɛ?>> Ama ba kuusi na doŋ sɛ, <<jɔ ɩ daŋ gasagasa dʋɔ.>>

24 Gʋ Pilato na gʋ wʋ aa ti dɩlɛ yɩɛ bʋrʋ ʋ ama wʋ na gʋ siŋii fara a kɔnɛ na, wʋ mʋ lɩŋ yalɛ wʋ pamɩɛ jama baa asanaŋ tawɩ sɛ, <<Ma ba jiŋ baalɛ wina sɩŋ dʋɔ ɔ, ŋɩ yɩɛ amɩɛ wɩɛ bɛ.>>

25 Sɛ bakpa baa kpiniŋ lɩsɛ nʋɔ sɛ, <<yela na baa ja wʋ asima lɩɩ daa na daa bie jaŋ.>>

26 Sɛ Pilato yela Barabasi fa ba. Sɛ wʋ yela sɛ ba taɩ Yesu achʋchʋɛ sɛ wʋ mʋ ɩ fa ba sɛ ba n jɔ ɩ daŋ gasagasa dʋɔ.

27 Sɛ Pilato yuora baa mʋ Yesu ju Pilato juorigbɩɛ, sɛ ba yagɛ ba dɔŋa baa kpiniŋ gaa sila logo Yesu. 28 Ba fulu wʋ gagba sɛ ba mʋ gagba sɩɛm gajalɩŋtɛ fu ɩ takɩɛ juo. 29 Sɛ ba mʋ sɔba lʋʋ juori gapa mʋ fu ɩ, sɛ ba mʋ daŋ gatugasa mʋ dʋ wʋ pam jɩsaŋ naŋ, sɛ ba luuŋ ba dʋna dʋɔ wʋ asanaŋ sɛ ba jabi ɩ tawɩ sɛ, <<Yudatina Juo, yu nkpa.>> 30 Ba tɔ mɩtalɩŋ fu ɩ sɛ ba lɩɛ daŋ gatugasa gaa lɩɩ wʋ jaŋ sɛ ba mʋ taɩ-taɩ wʋ nyinaŋ. 31 Gʋ ba jabi Yesu taŋ na, ba fulu adugbe gagba gasɩɛm gajalɩŋtɛ gaa sɛ ba mʋ wʋ tɩŋtɩŋ wʋ gagba fu ɩ. Sɛ ba mʋ ɩ lɩɩ na baa ga jɔ ɩ daŋ gasagasa dʋɔ.

32 Gʋ yuora baa mʋ Yesu baa ju na, ba jaŋina baalɛ wʋrʋ baa yagɛ ɩ sɛ Simoŋ, wʋŋ wʋ lɩɩ Kireni na. Sɛ yuora baa chaŋ ɩ dʋ ɩ sɛ ba mʋ daŋ gasagasa gaa sɩlɛ ɩ. 33 Gʋ ba ga tala diele gaa baa yagɛ sɛ Goligota na [tie akala sɛ Nyi Gafie]. 34 Dɩmaŋ sɛ ba mʋ bʋrʋ gaŋaŋtɛ bʋga na sʋlʋŋ mʋ fa ɩ sɛ wʋ n nyʋɔ. Ama gʋ wʋ da kɩɛ na, wʋ n nyʋɔ ɔ. 35 Gʋ ba jɔ Yesu daŋ gasagasa dʋɔ taŋ na, sɛ ba lɔ wʋ gagbasɛ dʋɔ mbi mʋ kpara fa dɔŋa. 36 Wʋrʋgbɩɛ na, sɛ yuora baa cha dɩmaŋ baa gie ɩ. 37 Sɛ ba sabɩɛ wɩɛ ŋii ba sɩŋ ŋɩ dʋɔ fu ɩ dɩpʋɛ na jaga wʋ nyie dʋɔ daŋ gasagasa gaa dʋɔ sɛ,

WINA N NYINA YESU, YUDATINA JUO WƲŊ.

38 Ba jɔ ŋmɩɛla baa ba chamɩna doŋ baa lɩɛ bakpa abʋrɩ na bala barɛ daŋ gasagasa dʋɔ. Wʋrʋ wɩɛ wʋ pam jɩsaŋ dʋɔ sɛ wʋrʋ dʋɔ wʋ pam naŋbii dʋɔ. 39 Bakpa baa baa laŋ dɩmaŋ na kpiniŋ a jigisi ba nyie baa tii ɩ 40 baa tawɩ sɛ, <<Kɩɛ! Nyaŋ n tawɩ sɛ nyaa salɩɛ Ɩsʋɔ tʋm danɛ na nyaa mʋ wɩɛ atoro ma ga. Sɛ nyaŋ n nyina Ɩsʋɔ Bu wʋŋ na, mɔlɔgɩ n wʋsɛ na nyaa tibi daŋ gasagasa gaa dʋɔ!>>

41 Dɩmʋŋ sɛ sei bɩnɩɛ, mbara bakalaasa na dɩɛ bɩnɩɛ baa gba jabi ɩ 42 tawɩ sɛ, <<Wʋ a mɔlɔgɩ barɛ, ama wʋ n dɩlɛ mɔlɔgɩ wʋ wʋsɛ ɛ. Wʋ sɛ wʋ yɩɛ Isiralitina Juo na, wʋ n tibi lɩɩ daŋ gasagasa gaa dʋɔ na dɩɩ lɩɛ ɩ di. 43 Wʋ lɩɛ Ɩsʋɔ di. N yela na Ɩsʋɔ a mɔlɔgɩ ɩ dɩtɩɛna sɛ wʋ a ja ɩ na. Akala takɩɛ wʋ tawɩ sɛ maŋ n nyina Ɩsʋɔ Bu wʋŋ.>> 44 Dɩmʋŋ sɛ ŋmɩɛla baa ba chamɩna doŋ baa lɩɛ bakpa abʋrɩ, sɛ ba jɔ ba daŋ gasagasa dʋɔ kpi Yesu dʋɔ na gba tii ɩ.

45 Gʋ dɩ tala wiita keŋkeŋ na, giteŋteŋbiri kɔŋ tibi dʋɔ kpiniŋ ga tala bʋyanɔ karafɩɛ atoro. 46 Karafɩɛ atoro gana naŋ na, Yesu kuusi na doŋ sɛ, <<Eli, Eli,*Sabɩɛwɩɛ kpiniŋ wɩɛna Eloyi. lama sabatani?>> Tie akala sɛ, <<Ma Ɩsʋɔ, ma Ɩsʋɔ, be n yɩɛ sɛ nya yela maŋ?>>✝

47 Gʋ baa ba sɩmɩɛɩ dɩmaŋ na barɛ nyii wɩɛ ŋii wʋ tawɩ na, ba tawɩ sɛ, <<N nyii, wʋ a yagɛ Ɩsʋɔ ɔja Eliya!>>

48 Gabʋanaŋ sɛ ba tɩba wʋrʋ se ju ga mʋ dɩchɩɛ nyʋ wayɩŋ sʋlʋŋ aŋaŋsa ŋarɛ naŋ, sɛ wʋ mʋ saga daŋ dʋɔ, sɛ wʋ jiŋna ga ju Yesu nʋɔ jaŋ sɛ wʋ n chʋchʋʋ. 49 Sɛ baa ba kakaa na tawɩ sɛ, <<N yela ɩ wʋ nyiŋeŋ dɩtɩɛna. N yela na dɩɩ kɩɛ sɛ Eliya aja wʋ a kɔŋ gaa mɔlɔgɩ ɩ.>>

50 Gʋ Yesu ti bɔrɛ kuusi na doŋ na, sɛ wʋ wuosi tam.

51 Gabʋanaŋ sɛ dukuru gaa ba mʋ gara Ɩsʋɔ tʋm danɛ naŋ na, chati tɩba bʋla lɩɩ adugbe gaa tala tie. Tibi jigisi sɛ akpa bʋɛ salɩɛ-salɩɛ tɩba. 52 Sɛ gachaŋsɛ fulu sɛ bakpa dɩchɩrɩchɩrɩ fɔɩ baa ba sɩŋ na feŋ lɩɩ sɩŋ naŋ. 53 Saŋa gaa Yesu feŋ lɩɩ sɩŋ naŋ wʋrʋgbɩɛ na, Ɩsʋɔ bakpa baa ba feŋ lɩɩ sɩŋ naŋ na ju Yerusalem dɩɛ janɛ naŋ sɛ ba lɩsɛ ba wʋsɛ kalaa bakpa fɔɩ.

54 Gʋ yuora gafie bɩnɛ wʋŋ na baa ba kpi wʋ dʋɔ baa kɩɛ Yesu dʋɔ na ganaŋkʋ tibi jigisi, na ŋii ŋɩ tibi kpiniŋ na, nyɩŋtɩɛ chaŋ ba fɔɩ sɛ ba tawɩ sɛ, <<Gasiŋteŋ, baalɛ wina yɩɛ Ɩsʋɔ Bu bɛ.>>

55 Sɛ ala fɔɩ barɛ baa ba kpaŋ Yesu lɩɩ Galaliya gaa kɩɛ wʋ dʋɔ na sɩmɩɛɩ taŋasɛ baa kɩɛ. 56 Ala baa tɩba barɛ n nyina Mariya Magadalini, Mariya wʋŋ wʋ bie n nyina Yakubu* na Yosefu na Sebedi bie baala jaŋ baa ba naa.

57 Gʋ dɩ tala bʋyanɔ na, akpaŋtatɛ wʋrʋ baa yagɛ ɩ sɛ Yosefu wʋŋ wʋ lɩɩ Arimatiya. Wʋŋ gba wʋ cha wʋ yɩɛ Yesu kpalɛnarɛ bɛ. 58 Sɛ wʋ ju Pilato jaŋ ga sʋlʋ Yesu gɩtatɛ sɛ Pilato fa gbɩɛ sɛ ba mʋ fa ɩ. 59 Sɛ Yosefu sagi Yesu gɩtatɛ sɛ wʋ mʋ dɩkalala gafɔlɛ pɔgɩ ɩ. 60 Sɛ wʋ mʋ Yesu gɩtatɛ ga wuu wʋ tɩŋtɩŋ wʋ akpanaŋ bʋɔ gafɔlɛ gaa naŋ. Sɛ wʋ gbiliti bʋɩ ga janɛ garɛ mʋ tɔ bʋɔ gaa nʋɔ sɛ wʋ lam. 61 Sɛ Mariya Magadalini na Mariya wʋ baŋbaŋ wʋŋ cha dɩmaŋ bʋɔ gaa sinabie.

62 Pɔɩ na tɩɛ a na Fɩɛsɛ wɩɩ na, Ɩsʋɔ sei bɩnɩɛ na Farasitina ju Pilato jaŋ 63 ga tawɩ ɩ sɛ, <<Kpaŋjuo, dɩ nyiŋi gʋ akarɩɛtɛ wʋŋ chaɩ nkpa naŋ na, wʋ tawɩ sɛ, <Wɩɛ atoro wʋrʋgbɩɛ na, maa feŋ lɩɩ sɩŋ naŋ.> 64 Dɩmʋŋ dʋɔ, dʋ na baa ga gie bʋɔ gaa na dieli ga tala wɩɛ atoro wɩɩ. Naa dɩmʋŋ na, wʋ kpalɛnara baa aja gaa ŋmɩɛlɛ wʋ gɩtatɛ gaa na baa tawɩ bakpa sɛ wʋ feŋ lɩɩ sɩŋ naŋ. Akarɩɛ ŋii baa di wʋrʋgbɩɛ na, aja kii ŋii ba chɩŋkpɩɛ di na.>>

65 Sɛ Pilato tawɩ ba sɛ, <<N mʋ yuora baa na baa ga gie bʋɔ gaa na ɩ mʋna gbɩɛ kʋma dʋɔ gie ga na dieli.>> 66 Dɩmʋŋ dʋɔ ba ju ga daasɛ bʋɩ janɛ gaa ba gbiliti tɔ bʋɔ gaa nʋɔ ganaŋkʋ wʋrʋ gbiliti ga na baa jiŋ. Sɛ ba lɩsɛ yuora baa si sɛ ba n gie ga.