Mateus 4

Sɩtanɩ yɩɛ Yesu lɔ tɩba

1 Sɛ Ɩsʋɔ Feliŋ mʋ Yesu ju ifuli dʋɔ sɛ Sɩtanɩ n ga yɩɛ ɩ lɔ tɩba. 2 Gʋ wʋ chaŋ nʋɔ pɔgʋ wɩɛ ŋɩla wiita na yuluma wʋrʋgbɩɛ na, dusoŋ chaŋ ɩ. 3 Sɛ Sɩtanɩ kɔŋ gaa tawɩ ɩ sɛ, <<Sɛ nyaŋ n nyina Ɩsʋɔ Bu na, tawɩ bʋɛ ŋina na ŋii bɩrɩŋsɛ adiya.>>

4 Sɛ Yesu lɩsɛ ɩ nʋɔ sɛ, <<Ba sabɩɛ Ɩsʋɔ wɩɛ naŋ sɛ adiya nyiŋeŋ baa fa wʋkpa nkpa a. Ama wɩɛ kʋma ŋii ŋɩ lɩɩ Ɩsʋɔ nʋɔ naŋ na.>>✝4:4 Ditiro 8:3.

5 Sɛ Sɩtanɩ ti mʋ Yesu ju dɩɛ chɩrɩchɩrɩ naŋ sɛ wʋ mʋ ɩ ga sɩŋ Ɩsʋɔ tʋm danɛ adugbe. 6 Sɛ wʋ tawɩ ɩ sɛ, <<Sɛ nyaŋ n nyina Ɩsʋɔ Bu na, puli lɩɩ jɩna ga tala tibi.>> Akala takɩɛ, ba sabɩɛ Ɩsʋɔ wɩɛ naŋ sɛ,

<<<Ɩsʋɔ aja kpiri wʋ gabʋɔsɛ na baa gaa gara nyaŋ.

Baa chaŋ n tɩba ba pamɩɛ naŋ

na n nafara n baa baŋ bʋɩ.>✝4:6 Num 91:11-12.>>

7 Sɛ Yesu lɩsɛ nʋɔ sɛ, <<Ba ti sabɩɛ Ɩsʋɔ wɩɛ naŋ sɛ, <N baa yɩɛ Kpaŋjuo nya Ɩsʋɔ lɔ tɩba.>✝4:7 Ditiro 6:16.>>

8 Ŋina wʋrʋgbɩɛ na, Sɩtanɩ ti bɔrɛ mʋ Yesu ju bʋrɔŋ janɛ garɛ dʋɔ ga kalaa ɩ dulunya Juori kpiniŋ na ga tɩba jilima. 9 Sɛ wʋ tawɩ ɩ sɛ, <<Nyaa luuŋ tʋm maŋ na, maa mʋ ŋina kpiniŋ fa nyaŋ.>>

10 Sɛ Yesu tawɩ sɛ, <<Sɩtanɩ lɩɩ ma jaŋ, ba sabɩɛ Ɩsʋɔ wɩɛ naŋ sɛ, <Tʋm Kpaŋjuo nya Ɩsʋɔ na nyaa tʋŋ wʋ nyiŋeŋ.>✝4:10 Ditiro 6:13.>>

11 Dɩmaŋ sɛ Sɩtanɩ yela ɩ, sɛ Ɩsʋɔ gabʋɔsɛ kɔŋ gaa kɩɛ wʋ dʋɔ.