1 Sɛ Ɩsʋɔ Feliŋ mʋ Yesu ju ifuli dʋɔ sɛ Sɩtanɩ n ga yɩɛ ɩ lɔ tɩba. 2 Gʋ wʋ chaŋ nʋɔ pɔgʋ wɩɛ ŋɩla wiita na yuluma wʋrʋgbɩɛ na, dusoŋ chaŋ ɩ. 3 Sɛ Sɩtanɩ kɔŋ gaa tawɩ ɩ sɛ, <<Sɛ nyaŋ n nyina Ɩsʋɔ Bu na, tawɩ bʋɛ ŋina na ŋii bɩrɩŋsɛ adiya.>>

4 Sɛ Yesu lɩsɛ ɩ nʋɔ sɛ, <<Ba sabɩɛ Ɩsʋɔ wɩɛ naŋ sɛ adiya nyiŋeŋ baa fa wʋkpa nkpa a. Ama wɩɛ kʋma ŋii ŋɩ lɩɩ Ɩsʋɔ nʋɔ naŋ na.>>✝

5 Sɛ Sɩtanɩ ti mʋ Yesu ju dɩɛ chɩrɩchɩrɩ naŋ sɛ wʋ mʋ ɩ ga sɩŋ Ɩsʋɔ tʋm danɛ adugbe. 6 Sɛ wʋ tawɩ ɩ sɛ, <<Sɛ nyaŋ n nyina Ɩsʋɔ Bu na, puli lɩɩ jɩna ga tala tibi.>> Akala takɩɛ, ba sabɩɛ Ɩsʋɔ wɩɛ naŋ sɛ,

<<<Ɩsʋɔ aja kpiri wʋ gabʋɔsɛ na baa gaa gara nyaŋ.

Baa chaŋ n tɩba ba pamɩɛ naŋ

na n nafara n baa baŋ bʋɩ.>✝>>

7 Sɛ Yesu lɩsɛ nʋɔ sɛ, <<Ba ti sabɩɛ Ɩsʋɔ wɩɛ naŋ sɛ, <N baa yɩɛ Kpaŋjuo nya Ɩsʋɔ lɔ tɩba.>✝>>

8 Ŋina wʋrʋgbɩɛ na, Sɩtanɩ ti bɔrɛ mʋ Yesu ju bʋrɔŋ janɛ garɛ dʋɔ ga kalaa ɩ dulunya Juori kpiniŋ na ga tɩba jilima. 9 Sɛ wʋ tawɩ ɩ sɛ, <<Nyaa luuŋ tʋm maŋ na, maa mʋ ŋina kpiniŋ fa nyaŋ.>>

10 Sɛ Yesu tawɩ sɛ, <<Sɩtanɩ lɩɩ ma jaŋ, ba sabɩɛ Ɩsʋɔ wɩɛ naŋ sɛ, <Tʋm Kpaŋjuo nya Ɩsʋɔ na nyaa tʋŋ wʋ nyiŋeŋ.>✝>>

11 Dɩmaŋ sɛ Sɩtanɩ yela ɩ, sɛ Ɩsʋɔ gabʋɔsɛ kɔŋ gaa kɩɛ wʋ dʋɔ.

12 Gʋ Yesu nyii gʋ ba tɔ Yohane danɛ na, wʋ bɔrɛ ju Galaliya. 13 Sɛ wʋ lɩɩ Nasarati ju ga cha Kapeniyum gaa ga tirina Galaliya lɩɩ nʋɔ sɛ ga wɩɛ Sebuluŋ na Nafitali tibi dʋɔ na. 14 Ŋina yela sɛ wɩɛ ŋii Ɩsʋɔ ɔja Yisaya tawɩ si na kɔŋ tɩba

15 sɛ, <<Sebuluŋ tibi na Nafitali tibi

ŋii ŋɩ wɩɛ ɔpʋ gbɩɛ dʋɔ gaa

ga wɩɛ Yodaŋ buo gatɩɛsa,

na Galaliya tibi dʋɔ, baa ba ba yɩɛ Yudatina dɩ chaɩ.

16 Bakpa baa ba chaɩ giteŋteŋbiri naŋ na,

na ŋmaŋi janɛ

baa ba chaɩ nyɩŋtɩɛ sɩŋ tibi dʋɔ na,

ŋmaŋi kɔŋ fa ba.>> ✝

17 Lɩɩ saŋa gana sɛ Yesu fara wʋ a tawɩ Ɩsʋɔ wɩɛ abama ŋii sɛ, <<N biliŋi lɩɩ amɩɛ dɩsʋbʋ naŋ kɔŋ Ɩsʋɔ jaŋ, akala takɩɛ Ɩsʋɔ Juori gaa tirina.>>

18 Gʋ Yesu cha wʋ dɔŋ Galaliya lɩɩ nʋɔ na, wʋ na aji chamara bala, Simoŋ wʋŋ baa yagɛ sɛ Petero na wʋ nabu Andurusi baa alɔ disawu baa chaŋ aji. 19 Sɛ Yesu tawɩ ba sɛ, <<N kɔŋ gaa kpaŋ maŋ maa kalaa amɩɛ na ɩ lɩsɛ bakpa fa Ɩsʋɔ.>> 20 Gabʋanaŋ sɛ ba yela ba asawu si sɛ ba kpaŋ ɩ.

21 Gʋ Yesu ju asanaŋ chonii na wʋ ti na Sebedi bie bala, Jamesi* na wʋ nabu Yohane wɩɛ buori naŋ ba na ba juo Sebedi baa desina ba asawu. Sɛ Yesu yagɛ ba. 22 Gabʋanaŋ sɛ ba yela buori gaa na ba juo sɛ ba kpaŋ ɩ.

23 Yesu pala Galaliya tibi dʋɔ gapɩlɛkʋma ga kalaa Ɩsʋɔ wɩɛ abama ŋii Yudatina tʋm danɩŋ naŋ, wʋ a tawɩ Ɩsʋɔ Juori gaa dʋɔ wɩɛ abama ŋii yela wʋ a chɔ baa baa kili lʋmɩɛ ngoriŋ-ngoriŋ na lʋm kpiniŋ. 24 Wʋ wʋsɛ dʋɔ wɩɛ yalagi Siriya tibi dʋɔ kpiniŋ, sɛ bakpa mʋ baa baa kili lʋmɩɛ ngoriŋ-ngoriŋ, baa baa na awʋrʋfʋɔ fɔɩ, baa feliŋ sʋbʋ chaɩ ba tɩba, dɩgbɩŋgbɩŋtina na baa ba jaɩ-jaɩ tɩba na kɔna Yesu sɛ wʋ chɔ ba. 25 Bakpa fɔɩ lɩɩ Galaliya na Dekapolisi* tibi dʋɔ, Yerusalem dɩɛ naŋ, Yudiya tibi dʋɔ na tibi gaa ga wɩɛ Yodaŋ buo gatɩɛsa kpiniŋ gaa kpaŋ ɩ.