1 Gʋ Yesu na jama baa na, wʋ ju bʋrɔŋ bie garɛ dʋɔ ga cha. Sɛ wʋ kpalɛnara baa kɔŋ wʋ jaŋ, 2 Sɛ wʋ fara wʋ a kalaa ba sɛ,

3 Kusee n nyina amɩɛ baa ɩ yɩɛ ayɔŋtina Ɩsʋɔ feliŋ naŋ,

akala takɩɛ Ɩsʋɔ Juori gaa yɩɛ amɩɛ teri.

4 Kusee n nyina baa baa bɔtaa,

akala takɩɛ baa sɛ Ɩsʋɔ aja wʋ a tawɩ dʋ.

5 Kusee n nyina baa ba fʋʋ,

akala takɩɛ baa sɛ tibi gana aja yɩɛ ba teri.

6 Kusee n nyina baa chirigi wɩɛ ba gayalaga,

akala takɩɛ baa sɛ Ɩsʋɔ aja yela na chirigi a paa ba.

7 Kusee n nyina baa baa wɩɩ bakpa gɩyɔŋ,

akala takɩɛ baa sɛ Ɩsʋɔ aja wɩɩ ba gɩyɔŋ.

8 Kusee n nyina baa ba agela naŋ fʋlʋmɩɛɩ,

akala takɩɛ baa aaŋ ja baa na Ɩsʋɔ.

9 Kusee n nyina baa baa kɔna wʋsɛfɩɛ bakpa tɩtɩba,

akala takɩɛ baa sɛ baa yagɛ Ɩsʋɔ bie.

10 Kusee n nyina baa chirigi dʋɔ baa nyala ba,

akala takɩɛ baa sɛ Ɩsʋɔ Juori gaa aja yɩɛ ba teri.

11 Kusee n nyina amɩɛ baa ma dʋɔ bakpa a ti amɩɛ, baa nyala amɩɛ, sɛ baa yɩɛ akarɩɛ baa tawɩ wɩɛ asʋbʋɛ baa jaga amɩɛ dʋɔ. 12 N yela na a yɩɛ amɩɛ jʋŋ na ŋii yɩɛ amɩɛ asadi, akala takɩɛ Ɩsʋɔ aja tɔ amɩɛ kɩm gajanɛ Ɩsʋɔ adugbe. Dɩmʋŋ sɛ ba nyala Ɩsʋɔ bajana baa ba cha pala amɩɛ asanaŋ na.

13 Sɛ Yesu ju dʋɔ tawɩ sɛ, <<Amɩɛ n nyina tibi dʋɔ yasɛ, ama yasɛ tʋsʋ ŋɩ jʋŋ na, sɩnɛ sɛ ɩ yɩɛ ŋɛ na ŋii ti yɩɛ jʋŋ? Ŋɩ ti taŋ dieli fa bʋrʋ ʋ, amʋɔ ba chɩɛgɩ tʋsʋ na bakpa a chicha dʋɔ.>>

14 Amɩɛ n nyina dulunya ŋmaŋi. Dɩɛ janɛ gaa ga jagaɩ bʋrɔŋ bie dʋɔ na baa wɩsɛ ɛ. 15 Wʋrʋ baa tʋ fitila mʋ dinyiŋkpa fu ga dʋɔ ɔ, ama baa mʋ jaga fitila dɩjagatɩŋ bɛ na gaa ŋmaŋi fa wʋkʋma wʋŋ wʋ wɩɛ waa gaa dʋɔ na. 16 Dɩmʋŋ sɛ n yela na amɩɛ fitila a ŋmaŋi fa bakpa, na baa na amɩɛ ayɩɛsa abama na baa kalɩɛ amɩɛ Juo wʋŋ wʋ wɩɛ Ɩsʋɔ adugbe na.

17 Sɛ Yesu ti ju dʋɔ tawɩ sɛ, <<N baa yɩɛ amɩɛ nfɩɛrɛ sɛ ma kɔŋ na maa gaa warɩɛ Mosesi mbara yaa Ɩsʋɔ bajana baa kalaa ŋii. Ma n kɔŋ na maa gaa warɩɛ ŋɛ ɛ, ama ma kɔnɛ bɛ na ŋii kɔŋ tɩba. 18 Maa tawɩ sɛ n nyii na dieli sɛ, gʋ Ɩsʋɔ adugbe na tie saŋ ŋɩ wɩɛ n na bɩrɛ, mbara ŋii naŋ sabɩɛ ga pii garɛ gba baa lɩɩ mbara ŋii tɩba a, mʋ ga tala gʋ bʋrʋkʋma aja kɔŋ tɩba. 19 Dɩmʋŋ dʋɔ wʋkʋma wʋŋ wʋ n kpaŋ mbara ŋii tɩba ga pii dʋɔ na, sɛ wʋ a kalaa barɛ sɛ ba n yɩɛ dɩmʋŋ na, baa yagɛ ɩ wʋ pii Ɩsʋɔ Juori gaa naŋ. Ama wʋkʋma wʋŋ wʋ a di dʋɔ sɛ wʋ a kalaa mbara ŋii na, baa yagɛ ɩ wʋjanɛ Ɩsʋɔ Juori gaa naŋ. 20 Maa tawɩ amɩɛ sɛ, amɩɛ chirigi n kii Farasitina na Mosesi mbara bakalaasa na, ɩɩ dɩlɛ jʋʋ Ɩsʋɔ Juori gaa naŋ ŋ.>>

21 Sɛ Yesu ti bɔrɛ tawɩ sɛ, <<Ɩ nyii gʋ Mosesi mbara ŋii tawɩ gɩbɩnɩŋtina baa sɛ n baa tagapʋ. Wʋkʋma wʋŋ wʋ a tagapʋ na, baa di wʋ wɩɛ.>> 22 Ama maŋ bɩrɛ, maa tawɩ amɩɛ sɛ wʋkʋma wʋŋ wʋ kara biŋbira dʋ wʋ dʋɔ* na, baa fu ɩ dɩpʋɛ. Wʋkʋma wʋŋ wʋ a tii wʋ dʋɔ sɛ, <<Wʋkpa kpakpuo na, baa mʋ ɩ sɩŋ dɩɛnaŋ bɩnɩɛ naŋ bɩnɩɛ dikpeŋ asanaŋ. Ama wʋkʋma wʋŋ wʋ a tii wʋ dʋɔ sɛ nyaŋ wʋmalaŋpʋ na aja ju awʋrʋfʋɔ bʋala gaa gaa dum na naŋ.>>

23 Dɩmʋŋ dʋɔ, <<Nya mʋ gafaasa ju nyaa ga fa faa gadiesa dɩgbɩŋgbɩŋ dʋɔ na, n wɩɛ dɩmaŋ sɛ n nyiŋi gʋ nyaŋ na n dʋɔ ɩ wɩɛna wɩɛ na, 24 yela gafaasa gaa si gadiesa dɩgbɩŋgbɩŋ gaa jaŋ, na nyaa bɔrɛ ju na nyaŋ na n dʋɔ wʋŋ ɩ ga jɔ bʋga pɔɩ na nyaa bɔrɛ kɔŋ gaa fa gafaasa.>>

25 N dʋɔ mʋ nyaŋ ju wɩɛ didiitiŋ na, gʋ ɩ dɔŋ gbɩɛ naŋ ɩɩ ju na, kɩɛ na ɩ desina wɩɛ ŋii pɔɩ na ɩ tala dɩmaŋ. Sɛ nya n yɩɛ dɩmʋŋ na, wʋ a mʋ nyaŋ ga fa wɩɛ diri na wʋ a fu nyaŋ dɩpʋɛ na wʋ a mʋ nyaŋ fa gagbasɛ anyaŋnyaŋtina, na baa mʋ nyaŋ ga tɔ danɛ. 26 Maa tawɩ sɛ n nyii na dieli sɛ, baa lɩsɛ nyaŋ lɩɩ danɛ dɩtʋɔtɩŋ ŋ, ga tala gʋ nyaa tɔ kɩm gaa taŋ.

27 Sɛ Yesu ti bɔrɛ ju dʋɔ tawɩ sɛ, <<Ɩ nyii gʋ Mosesi mbara ŋii tawɩ sɛ n baa yɩɛ baalɛ wʋrʋgbɩɛ lɩɩ yaa alʋ wʋrʋgbɩɛ lɩɩ.>>✝ 28 Ama maŋ bɩrɛ, maa tawɩ amɩɛ sɛ wʋkʋma wʋŋ wʋ a kɩɛ alʋ na wʋ a yalaga ɩ na, wʋ taŋ fɩla yɩɛ alʋ wʋrʋgbɩɛ lɩɩ wʋ digela naŋ. 29 Sɛ n dɩsɛ jɩsaŋ aja yela na nyaa yɩɛ dɩsʋbʋ na, chɔla ga tʋsʋ. Ŋɩ wɩɛ dieli fa nyaŋ takɩɛ nya paŋ n wʋsɛ gatʋŋgʋrʋ kii gʋ nya mʋ n wʋsɛ kpiniŋ mʋ ju awʋrʋfʋɔ bʋala naŋ. 30 Sɛ n pam jɩsaŋ aja yela na nyaa yɩɛ dɩsʋbʋ na kara ga tʋsʋ. Ŋɩ wɩɛ dieli fa nyaŋ takɩɛ nya paŋ n wʋsɛ gatʋŋgʋrʋ kii gʋ nya mʋ n wʋsɛ kpiniŋ ju awʋrʋfʋɔ bʋala naŋ.

31 Sɛ Yesu ju dʋɔ tawɩ sɛ, <<Ɩ nyii gʋ wʋkʋma wʋŋ wʋ yela wʋ alʋ na ŋɩ tiri gʋ wʋ n sabɩɛ tanɛ fa ɩ na gaa kalaa gʋ wʋ yela ɩ sarɛ.>> 32 Ama maŋ bɩrɛ maa tawɩ amɩɛ sɛ, <<Baalɛ kʋma wʋŋ wʋ yela wʋ alʋ sɛ ŋɩ ba yɩɛ baalɛ wʋrʋgbɩɛ lɩɩ na, wʋ yela sɛ alʋ wʋŋ yɩɛ baalɛ wʋrʋgbɩɛ lɩɩ. Dɩmʋŋ gba sɛ baalɛ kʋma wʋŋ wʋ saa alʋ wʋŋ ba yela ɩ sarɛ na, wʋ yɩɛ alʋ wʋrʋgbɩɛ lɩɩ.>>

33 Sɛ Yesu ju dʋɔ tawɩ sɛ, <<Ɩ ti bɔrɛ nyii gʋ Mosesi mbara ŋii tawɩ gɩbɩnɩŋtina sɛ n baa ka ntaŋ sala. Ama n di amɩɛ ntaŋ ŋii ɩ ka fa Ɩsʋɔ na dʋɔ.>> 34 Ama maa tawɩ amɩɛ sɛ, n baa ka ntaŋ kpiniŋ-kpiniŋ. N baa ka Ɩsʋɔ adugbe, akala takɩɛ ga yɩɛ Ɩsʋɔ Juorigbeli bɛ, 35 yaa n baa ka tibi, akala takɩɛ ga yɩɛ Ɩsʋɔ nafara dɩjagatɩŋ bɛ, yaa Yerusalem dɩɛ janɛ akala takɩɛ ga yɩɛ Juo janɛ wʋŋ dɩɛ bɛ. 36 N baa ka amɩɛ nyi dʋɔ ntaŋ akala takɩɛ nyaa dɩlɛ yɩɛ nyɩnyʋɔ garɛ gba gafʋlʋm yaa ganyaŋnyaŋ ŋ. 37 N yela na amɩɛ <<ɛɛŋ a yɩɛ ɛɛŋ>> yaa amɩɛ <<Aye a yɩɛ aye.>> Bʋrʋkʋma gaa ɩ tawɩ kpi ŋina dʋɔ na ŋɩ lɩɩ Sɩtanɩ bɛ.

38 Sɛ Yesu ju dʋɔ tawɩ sɛ, <<Ɩ nyii gʋ Mosesi mbara ŋii ti tawɩ sɛ wʋrʋ salɩɛ wʋ dʋɔ dɩsɛ na, baa salɩɛ wʋ teri, sɛ wʋrʋ kuli wʋ dʋɔ keli na, baa kuli wʋ teri.>> 39 Ama maŋ bɩrɛ, maa tawɩ amɩɛ sɛ wʋrʋ yɩɛ nyaŋ dɩsʋbʋ na, n baa mʋ dɩsʋbʋ tɔ ɩ kɩm. Sɛ wʋrʋ kpa nyaŋ gabaa n jɩsaŋ lati dʋɔ na, biliŋi alatɛ fa ɩ. 40 Sɛ wʋrʋ aja sɛ wʋ a mʋ nyaŋ ju na baa ga di n wɩɛ na wʋ a lɩɛ nya tie gagba na, mʋ adugbe gagba kpi ɩ. 41 Sɛ wʋrʋ dʋ nyaŋ sɛ nya n pala mayili garɛ na, nyaŋ na ɩ n pala mayili ala. 42 Fa wʋŋ wʋ sʋlʋ nyaŋ bʋrʋ darɛ na, wʋŋ wʋ a ja sɛ nyaŋ n kɩŋ ɩ bʋrʋ darɛ na, n baa pɩɛsɛ ɩ.

43 Sɛ Yesu ti ju dʋɔ tawɩ sɛ, <<E nyii gʋ Mosesi mbara ŋii ti tawɩ sɛ ja n dʋɔ✝ na nyaa kɔla n badʋŋna.>> 44 Ama maŋ bɩrɛ, maa tawɩ amɩɛ sɛ n ja amɩɛ badʋŋna na ɩ jɔ dɩga fa baa baa nyala amɩɛ, 45 ŋina aaŋ ja yela ɩ yɩɛ amɩɛ Juo wʋŋ wʋ wɩɛ Ɩsʋɔ adugbe na bie. Wʋŋ aaŋ yela sɛ wiita a lɩɩ wʋ a fa dɩsʋbʋ yɩɛra na bakpa ba bama, sɛ wʋ a yela sɛ duoni a nɩɛ wʋ a fa bachirigisa na baa ba ba yɩɛ bachirigisa. 46 Sɛ ɩ ja baa baa ja amɩɛ nyiŋeŋ na, kɩmtʋɔ gamʋɔ sɛ ɩ yu? Lampo lɩɛra gba a yɩɛ dɩmʋŋ. 47 Sɛ ɩ yɩlɩ amɩɛ dɔŋa nyiŋeŋ na, be sɛ ɩ yɩɛ kii wʋrʋ. Baa ba ba jiŋ Ɩsʋɔ na gba a yɩɛ dɩmʋŋ. 48 Dɩmʋŋ dʋɔ n yɩɛ kʋrʋkʋrʋ takɩɛ ganaŋkʋ amɩɛ Juo wʋŋ wʋ wɩɛ Ɩsʋɔ adugbe na gba yɩɛ kʋrʋkʋrʋ na.