1 Yesu jʋʋ buori naŋ tɩɛsɛ lɩɩ bɔrɛ kɔŋ wʋ tɩŋtɩŋ wʋ dɩɛ naŋ. 2 Gʋ Yesu wɩɛ dɩmaŋ na, baala barɛ sɩlɛ baalɛ wʋrʋ wʋ jaɩ-jaɩ kalaŋ dʋɔ kɔŋ Yesu jaŋ. Gʋ wʋ na ba lɩɛdi na, wʋ tawɩ wʋŋ wʋ jaɩ-jaɩ na sɛ, <<Mabu, yu digela, ma mʋ n dɩsʋbʋ chɩɛ nyaŋ.>>

3 Dɩmaŋ sɛ Mosesi mbara bakalaasa baa barɛ tawɩ ba nyiŋeŋ-nyiŋeŋ sɛ, <<Baalɛ wina a tawɩ mbusu wɩɛ!>>

4 Gʋ Yesu jiŋ ba nfɩɛrɛ na, wʋ tasɛ ba sɛ, <<Be n yɩɛ sɛ ɩ fa nfɩɛrɛ asʋbʋɛ ŋina? 5 Sɛ Yesu tasɛ sɛ ŋɛ amʋɔ n duo na tibi naŋ, sɛ ma tawɩ fa wʋŋ wʋ jaɩ-jaɩ na sɛ, <Ma mʋ n dɩsʋbʋ chɩɛ nyaŋ> yaa ma tawɩ sɛ, <Kʋlʋ na nyaa pala?> 6 Ama ganaŋkʋ aja yela na ɩ jiŋ gʋ Wʋkpa Bu wʋŋ wɩɛna yikuo tibi dʋɔ sɛ wʋ a dɩlɛ mʋ dɩsʋbʋ chɩɛ. Sɛ wʋ tawɩ wʋŋ wʋ jaɩ-jaɩ na sɛ, Kʋlʋ, mʋ n kalaŋ na nyaa ju dɩɛ.>> 7 Sɛ baalɛ wʋŋ kʋlʋ sɛ wʋ ju dɩɛ. 8 Gʋ jama baa na ŋina na dɩ yɩɛ ba doba fɔɩ, sɛ ba kalɩɛ Ɩsʋɔ gʋ wʋ mʋ yikuo gana duluŋ fa bakpa.

9 Gʋ Yesu lɩɩ dɩmaŋ wʋ a ju na, wʋ na lampo lɩɛrɛ wʋrʋ baa yagɛ ɩ sɛ Matiyo wʋ chaɩ lampo danɛ naŋ. Sɛ Yesu tawɩ ɩ sɛ, <<Kpaŋ maŋ,>> sɛ wʋ kʋlʋ kpaŋ ɩ.

10 Dɩ kɔŋ takɩɛ Yesu na wʋ kpalɛnara wɩɛ Matiyo waa dʋɔ baa di. Lampo lɩɛra na dɩsʋbʋ yɩɛra fɔɩ gaa kpi ba dʋɔ baa di. 11 Gʋ Farasitina na ŋina na, ba tasɛ wʋ kpalɛnara baa sɛ, <<Be n yɩɛ sɛ amɩɛ wʋkalaasa na lampo lɩɛra na dɩsʋbʋ yɩɛra a di?>>

12 Gʋ Yesu nyii ŋina na, wʋ lɩsɛ ba nʋɔ sɛ, <<Alaŋfiyatina n tiri lʋm chʋɔrɛ ɛ, ama lʋmɩɛtina. 13 Ama n ju ga kɩɛ Sabɩɛwɩɛ ŋii naŋ na dieli na ɩ nyii tie wɩɛ ŋii Ɩsʋɔ tawɩ sɛ, <Maa ja gɩyɔŋ wɩɩ bɛ naa gadiesa a.>Akala takɩɛ ma n kɔŋ na maa gaa yagɛ bachirigisa a, ama dɩsʋbʋ yɩɛra.>>

14 Wɩɩ darɛ Yohane kpalɛnara kɔŋ Yesu jaŋ gaa tasɛ ɩ sɛ, <<Be n yɩɛ sɛ daa na Farasitina a chaŋ nʋɔ pɔgʋ sɛ n kpalɛnara bɩrɛ baa chaŋ nʋɔ pɔgʋ?>>

15 Sɛ Yesu lɩsɛ ba nʋɔ sɛ, <<Alʋfɔlɛ baalɛ wʋŋ mʋɔrɛ a bɔtaa yela wʋ wɩɛ ba jaŋ? Ama saŋa gʋrʋ aja kɔŋ baa mʋ alʋfɔlɛ baalɛ wʋŋ lɩɩ ba jaŋ, saŋa gana sɛ baa chaŋ nʋɔ pɔgʋ.>>

16 Sɛ Yesu ti bɔrɛ tawɩ sɛ, <<Wʋrʋ baa mʋ dukuru fɔlɛ wʋ a tarɛ gabɩnɛ naŋ ŋ. Sɛ wʋ yɩɛ dɩmʋŋ na, gafɔlɛ gaa aja kparagi gabɩnɛ gaa na bʋɔ gaa a yɩɛ gajanɛ. 17 Dɩmʋŋ sɛ wʋrʋ baa chɩɛgɩ wayɩŋ sʋlʋŋ fɔlɛ wʋ a dʋ kpalɛ gabɩnɛ naŋ ŋ. Sɛ wʋ yɩɛ dɩmʋŋ na, kpalɛ gabɩnɛ gaa aja sagɛ na gaa salɩɛ na sʋlʋŋ ŋii a chɩɛgɩ tʋsʋ. Dɩmʋŋ dʋɔ baa chɩɛgɩ sʋlʋŋ fɔlɛ baa dʋ kpalɛ gafɔlɛ naŋ bɛ na ŋɩ kpiniŋ n ba warɩɛ.>>

18 Gʋ Yesu saŋ wʋ a tawɩ ŋina na, kɩɛ Yudatina tʋm danɛ naŋ bɩnɛ wʋrʋ kɔŋ gaa luuŋ wʋ asanaŋ tawɩ sɛ, <<Mabu alʋ jaŋ sɩŋ dɩtɩɛna gana. Dɩmʋŋ dʋɔ kɔŋ na nyaa gaa mʋ n pam jaga wʋ dʋɔ na wʋ a feŋ.>> 19 Dɩmʋŋ dʋɔ Yesu kʋlʋ kpaŋ ɩ sɛ wʋ kpalɛnara baa kpam.

20 Gʋ baa ju na, alʋ wʋrʋ wʋŋ asima jɔ ɩ bɩŋsɛ gifi ala na lɩɩ Yesu wʋrʋgbɩɛ mʋ wʋ pam ga tapʋ wʋ adugbe gagba nʋɔ, 21 Akala takɩɛ alʋ wʋŋ tawɩ wʋ nyinaŋ sɛ, <<Ma tapʋ wʋ adugbe gagba na, maa yu lʋm chʋɔ.>>

22 Sɛ Yesu biliŋi kɩɛ ɩ tawɩ ɩ sɛ, <<Alʋ, yu digela, n lɩɛdi chɔ nyaŋ.>>Gabʋanaŋ sɛ wʋ yu lʋm chʋɔ.

23 Gʋ Yesu jʋʋ Yudatina tʋm danɛ naŋ bɩnɛ wʋŋ waa dʋɔ na, wʋ na galiebi fʋlʋda lie gaa naŋ na jama baa barɛ dʋɔ a wii na doŋ, 24 sɛ wʋ tawɩ ba sɛ, <<N lɩɩ jɩna. Galibie wʋŋ n sɩŋ ŋ, ama wʋ duo bɛ.>> Ama ba mʋɩ ɩ. 25 Gʋ ba yela sɛ bakpa baa lɩɩ asʋŋ wʋrʋgbɩɛ na, Yesu jʋʋ danɛ naŋ sɛ wʋ chaŋ galibie wʋ pam naŋ sɛ wʋ kʋlʋ. 26 Sɛ wɩɛ ŋina yalagi ju tibi gaa dʋɔ gapɩlɛkʋma.

27 Gʋ Yesu lɩɩ dɩmaŋ wʋ a ju na, sɛ bataŋpʋna bala barɛ kpaŋ ɩ baa kuusi sɛ, <<Dawidi ganana bie, wɩɩ daa gɩyɔŋ!>>

28 Gʋ Yesu kɔŋ waa dʋɔ na, bataŋpʋna bala baa kɔŋ wʋ jaŋ, sɛ wʋ tasɛ ba sɛ, <<Ɩ lɩɛ di sɛ maa dɩlɛ fulu amɩɛ asa?>> Sɛ ba lɩsɛ nʋɔ sɛ, <<Ɛɛŋ, kpaŋjuo.>>

29 Sɛ Yesu mʋ wʋ pam jaga ba asa dʋɔ tawɩ sɛ, <<Ganaŋkʋ amɩɛ lɩɛdi kɩɛna na, ŋɩ n yɩɛ dɩmʋŋ fa amɩɛ.>> 30 Gabʋanaŋ sɛ ba asa fulu, sɛ Yesu jɔ ba nyienaŋ na doŋ sɛ, <<N kɩɛ na dieli na n baa tawɩ wʋrʋ.>> 31 Ama gʋ ba lɩɩ dɩmaŋ na, ba jɔ Yesu wɩɛ ŋii dʋɔ dawuta sɛ ŋɩ yalagi tibi gaa gapɩlɛkʋma.

32 Gʋ baala bala baa Yesu fulu ba asa na lɩɩ dɩmaŋ baa ju na, kɩɛ bakpa barɛ mʋ baalɛ wʋrʋ wʋŋ feliŋ sʋbʋ wɩɛ wʋ tɩba sɛ wʋ yɩɛ namu na kɔna Yesu. 33 Sɛ Yesu geŋ feliŋ sʋbʋ wʋŋ lɩɩ baalɛ namu wʋŋ tɩba sɛ wʋ dɩlɛ tawɩ sɛ dɩ yɩɛ jama baa doba sɛ ba tawɩ sɛ, <<Dɩ n naa ta ŋina duluŋ Isirali tibi dʋɔ ɔ.>>

34 Ama Farasitina baa tawɩ sɛ, <<Sɩtanɩ wʋŋ wʋ yɩɛ feliŋ sʋbʋ bɩnɛ na yikuo sɛ wʋ chamɩna wʋ a geŋ feliŋ asʋbʋɛ.>>

35 Yesu pala dɩɛsɛ na dɩɛsɛ bisi naŋ wʋ a kalaa Yudatina tʋm danɩŋ naŋ. Wʋ tawɩ Ɩsʋɔ Juori gaa dʋɔ wɩɛ abama ŋii yela wʋ a chɔ lʋm na lʋmɩɛ. 36 Gʋ Yesu na jama baa na, ba wɩɛ yɩɛ ɩ gɩyɔŋ, akala takɩɛ ganyala fɔɩ wɩɛ ba dʋɔ sɛ ba ba jiŋ ŋii ba n yɩɛ ɛ. Ba kɩɛna bɛ takɩɛ feŋ baa ba tana kparɛ na. 37 Sɛ Yesu tawɩ wʋ kpalɛnara baa sɛ, <<Mala karɩŋ bɔlɩɛɩ ama karada n bɔla a. 38 Dɩmʋŋ dʋɔ n sʋlʋ kpaŋjuo fʋɔtɛ wʋŋ na wʋ a kpiri tʋmɩra barɛ gaa kpi karada baa dʋɔ fʋɔ gaa naŋ.>>