32 Ivo ifikile dihungile siku ya Humulo ivo imalile want’hu wakamgalila Yesu watamu wose na want’hu wala wamukilwe na vinyamkela. 33 Want’hu wengi wa bululu dila wakafikana hanze ya lwivi lwa kuingilila muikaya. 34 Yesu akawahonya want’hu wengi wakalile na matamu mbalimbali. Vilavila kaviinga vinyamkela vingi kulawa kwa want’hu na kwavila vikala vikummanya yeye niani, Yesu akavilemesa visekulonga chochote.
Yesu akuwalongela Mbuli Zidamane want’hu wa Galilaya
Luka 4:42,44
35 Siku ya kaidi yake nalugunzugunzu zua hadina lawa, Yesu akasegela na kwita hant’hu habule want’hu ili alombe. 36 Saimoni na wayage wakaita kumulonda Yesu uko eli. 37 Ivo wamuonile wakamulongela, "Want’hu wose waukulonda weye."
38 Yesu akawalongela "Chiteni kuna vibululu vimwenga va haguhi na hano nikawalongele Mbuli Zidamane na uko kwa vila niza kwa mbuli iyo."
39 Kamala Yesu akaita kila hant’hu mdi bululu da Galilaya kuno akuwalongela want’hu Mbuli Zidamane za Mulungu muna zi kaya za kufikanila Wayahudi na kuwalava want’hu vinyamkela.
Matayo 8:1,4; Luka 5:12,16