1 Kamala Yesu akasegela Kapelinaumu akaita kuna bululu dya Yudea, mwambo mwa umto Yolidani. Na uyama mkulu wa want'hu ukamkola kaidi nae akawafunza gesa vila azoele.

2 Ivo, Mafalisayo wamwenga wakamwitila Yesu na kumgeza, wakamuuza, "Vino, malagilizo yetu yakulonda mulume kumuleka mkake?" 3 Yesu akawalongela, "Vino Musa kawalagiliza mbwani?"

4 Na ao wakamulongela, "Musa kachilagiliza mulume akudaha kumwik'ha talaka mkake na kumuleka."

5 Yesu akawalongela, "Musa kawaandikila malagilizo ayo kwa vila hamkufunzika. 6 Mbali kulawila kumwanduso wa kulumbwa kwa isi, Mulungu kalumba mulume na mke. 7 Ivo mulume naamuleke tati yake na mami yake na kwita kukala hamwe na mkake, 8 nao waidi nawawe mtufi umwe. Ivo sekewawe waidi mbali ni mtufi umwe. 9 Ivo, achiyungile Mulungu mnt'hu asekuchitenga."

10 Ivo waingile kaidi mgati muikaya, wanahina wake Yesu wakamuuza kuhusu mbuli iyo ya kulekana. 11 Yesu akawalongela, "Mwanamulume akamuleka mkake na kusola mke imwenga, amanye akumtendela ugoni mkake. 12 Ivoivo na mke akamuleka mulumake na kusoligwa na mulume imwenga akumtendela ugoni mulumake."

13 Want'hu wamgalila Yesu wana wadodo ili awaikile mikono na kuwalombela, mbali wanahina wake wakawabwakila. 14 Yesu ivo aonile vila, akapata maya, akawalongela, "Walekeni wana wadodo weze kumwangu msekuwalemesa, kwa vila Umwene wa Mulungu uwikilwa want'hu gesa wana wadodo wano. 15 Kweli huwalongeleni, mnt'hu yoyote akulema kuuhokela Umwene wa Mulungu gesa ivo wakuuhokela wana wadodo sekeaingile umo mu umwene wa Mulungu." 16 Kamala akawahokela wala wana wadodo, akawaikila mikono akawalombela.

17 Yesu akandusa kaidi nt'hambo yake, mnt'hu imwe akamkimbilila Yesu akamtowa mavindi halongozi ha Yesu, akamuuza, "Mfunza udamane, nitendeze ili niupate ugima wa siku zose?"

18 Yesu akamuuza, "Hangi ukunitanga nidamana? Habule adamane mbali Mulungu muhala. 19 Ukuyamanya Malagilizo ya Musa, ‘Leka ugoni na usekukoma na usekubawa, na usekuhuna na umuhulike tati yako na mami yako.’"

20 Nae akamulongela, "Mfunza, Malagilizo ayo yose niyakola kuandusila ubwanga wangu."

21 Yesu akamulola kwa ubwedo na akamulongela, "Kuhungukilwa na kint'hu kimwe, genda ukagule vint'hu vose ivo wilinavo, na ukawenk'he wachiwa izo hela, ivo nauwe na utajili kuulanga, kamala wize unikole." 22 Mnt'hu iyo ivo ahulike mbuli izo, akaingila chiholo, akasegela hant'hu hala kuno anausungu kwa vila kakala tajili nk'hani.

23 Kamala Yesu akalola kuno na kuno, akawalongela wanahina wake, "Ivo naiwe ndala kwa matajili kuingila muna Uumwene wa Mulungu!"

24 Wanahina wake wakakangawala kwa zila mbuli alongile. Mbali Yesu akawalongela kaidi, "Wanawangu, naiwe ndala nk'hani kuingila muna Uumwene wa Mulungu! 25 Mnyama akutangwa ngamia akudaha kufosa mditoli da sindano, mbali naiwe ndala kwa tajili kuingila muna Uumwene wa Mulungu."

26 Wanahina wake wakakangawala nk'hani, wakauzana, "Niyani elo naahonywe?" 27 Yesu akawalola nk'hani akawalongela, "Kwa want'hu haikudahika, mbali kwa Mulungu seke iwe ivo, kwa vila mbuli zose kwa Mulungu zikudahika."

28 Kamala Petulo akamulongela Yesu, "Cheye chileka vint'hu vose, chikukola weye!"

29 Yesu akawalongela, "Huwalongelani kweli, mnt'hu yoyote alekile kaya egu ndugu zake egu lumbuja zake egu mami yake egu tati yake egu wanake egu mgunda wake kwa ajili ya nie hamwenga na Mbuli Zidamane, 30 naahoke bwelele haluse, kaya na ndugu na lumbu na mama na wana na migunda na mahenyeko na chipindi chikwiza naahokele ugima ubule nk'homelezo. 31 Mbali wengi walongole nawawe wa nk'homelezo na wala wa nk'homelezo nawawe wa kulongozi."

32 Yesu na wanahina wake ivo wakalile muinzila kwita kudibululu da Yelusalemu na Yesu kakala kawalongola. Wanahina wake wakala wakukangawala na want'hu wakalile wakumkola wakala wakuogoha. Yesu akaita nao kunk'handa wala wanahina wake kumi na waidi, akandusa kuwalongela mbuli zikulonda kumulawila. 33 Akawalongela, "Tegelezeni! Chikwita kudibululu da Yelusalemu na uko nie Mwana wa Mnt'hu nanigwiligwe na wakulu wa walava nt'hambiko na wafunza malagilizo na nawanilamule nikomwe na kunilava kwa want'hu wa sio Wayahudi. 34 Nao nawanizele na kunitemela mate na nawanitoe kwa milugwa na kunikoma. Mbali siku ya katatu nanibwele muugima."

35 Kamala Yakobo na Yohana wana wa Zebedayo, wakamwitila Yesu wakamulongela, "Mfunza, kuna chint'hu chikukulomba uchitendele."

36 Yesu akawauza, "Mkulonda niwatendele chibwani?"

37 Wakamulongela, "Chikukulomba ikadahika muna chisumbi chako cha Umwene, imwe akale ubanzi wako wa kulume na imwenga ubanzi wako wa kumoso muna ukulu wako."

38 Yesu akawalongela, "Mweye hamukukimanya icho mkuchilomba! Vino, namdahe kuking'wila chikombe cha mahenyezo hulonda kuking'wila? Egu kubatizwa ubatizo hulonda kubatizigwa?"

39 Wakamulongela, "Chikudaha." Yesu akawalongela, "Chikombe huching'wila namchingwele na ubatizo hulonda kubatizigwa nambatizwe, 40 mbali kwa mbuli ya kukala ubanzi wangu wa kulume egu ubanzi wangu wa kumoso, nie sikudaha kutenda ivo mbali nyafasi izo Mulungu naawenk'he wala awasagule." 41 Wala wanahina wamwenga kumi ivo wahulike mbuli iyo wakawaonela maya Yakobo na Yohana. 42 Ivo, Yesu akawatanga hamwenga wanahina wose akawalongela, "Vino mkumanya kuwa wala wakuoneka kuwa vilongozi wa want'hu, huwalongoza want'hu kwa nguvu na wakulu ao wakuwatenda want'hu wao watwana. 43 Mbali kumwenu isekuwa ivo, mnt'hu yoyote akulonda kuwa mkulu kumwenu akulondigwa awasank'hanile mweye, 44 na mnt'hu yoyote kumwenu akalonda kuwa wa mwanduso, akulondigwa awe msank'hani wa wose. 45 Kwa vila nie Mwana wa Mnt'hu sizile kusank'hanilwa, mbali niza kusank'hanila na kuulava ugima wangu ili kuwagombola want'hu wengi."

46 Kamala, wakeingila kuna bululu dya Yeliko, Yesu na wanahina wake hamwenga na want'hu wamwenga ivo wakalile wakulawa muna dibululu ijo wakamuona chipofu, mwana wa Timayo atangigwe Batimayo, akalile mnk'handa nk'handa muinzila akulomba want'hu hela. 47 Ivo ahulike Yesu wa Nazaleti akufosa hant'hu hala, akaandusa kutanga kwa izi kulu, "Weye Yesu! Mwana wa Daudi! Unionele ubazi!"

48 Want'hu wengi wambwakila ili chipofu anyamale, mbali yeye kakala akugendelela kutanga kwa izi kulu, "Weye Mwana wa Daudi, unionele ubazi."

49 Yesu akatimalala akalonga, "Mulongeleni eze." Ivo, wakamtanga Batimayo, wakamulongela, "Usekuogoha, timalala, Yesu akukutanga."

50 Nae akausumba mwenda wake, akazump'ha, akamwitila Yesu.

51 Yesu akamuuza, "Ukulonda nikutendele mbwani?" Batimayo akamulongela, "Mfunza, hulomba nidahe kuona."

52 Yesu akamulongela, "Genda, utogozi wako ukuhonya." Ahoaho iyo chipoifu akaandusa kuona, na akamkola Yesu muinzila.