1 Siku dimwe Mafalisayo wamwenga na wafunza Malagilizo walawile Yelusalemu wakaiduganya halongozi ha Yesu. 2 Ndo wakawaona wanahina wamwenga wa Yesu wakudya ndiya bila ya kunawa goya mikono gesa vila yakulonda Malagilizo ya Wahenga.

3 Kwa vila Mafalisayo na Wayahudi wose hawakudya ndiya bila kunawa goya mikono, wakutenda ivo kwa kukola malagilizo ya wahenga wao. 4 Wakala hawakudaha kudya chochote kulawa mdigulilo hadi wakisunt'he ndo waanduse kudya. Vilavila kukala na vihendo vimwenga wavihokele kulawa umwaka gesa vila kusunt'ha goya bakuli na vikombe na viya va shaba.

5 Ivo Mafalisayo na wafunza Malagilizo wakamuuza Yesu, "Vino hangi wanahina wako hawakukola mbuli chizihokele kulawa kwa wahenga wakudya ndiya bila kunawa goya mikono?" 6 Yesu akawalongela, "Mweye watapitapi, Isaya Mlotezi wa Mulungu kalotela goya kuhusu mweye hala aandikile.

Want'hu wano wakunifugamalila mmilomo yawe,

mbali muna imyoyo yawe wahatali na nie,

7 Ao wakunifugamalila tu

mbali wakufunza mbuli za malagilizo ya want'hu tu,

Gesa vila Malagilizo ayo ni ya Mulungu!"

8 "Mweye mkuleka kuyatoza malagilizo ya Mulungu, mbali mkuyatoza malagilizo ya want'hu." 9 Yesu akagendelela kulonga, "Mweye mkuyalema Malagilizo ya Mulungu ili mdahe kuyatoza malagilizo ya wahenga." 10 Musa kawalagiliza, "Mtegeleze tati yako na mami yako na vilavila mnt'hu yoyote akulonda kumdukana tati yake egu mamiyake akulondigwa akomigwe." 11 Mbali mweye mkufunza, "Gesa mnt'hu akawa na chint'hu cha kumtaza tati yake egu mami yake mbali akalonga kint'hu icho ni kolibani. Manaake kint'hu icho kiikigwa kwa ajili ya Mulungu, 12 ivo, haikufaya kaidi mnt'hu kumtaza tati yake egu mami yake. 13 Kwa kutenda ivo mkuzilema Mbuli za Mulungu kwa kufunzana mbuli muzihokele kulawa kwa wahenga wenu. Na mkutenda mbuli nyingi gesa izo."

14 Kamala Yesu akawatanga kaidi want'hu akawalongela, "Mweye mose nitegelezeni na mmanye. 15 Habule chint'hu chochote cha kunze ya mtufi wa mnt'hu chikudaha kumtenda mnt'hu asekutogolwa kumfugamalila Mulungu. Mbali chila chikulawa mgati mwa mnt'hu ndo chikumtenda asekutogoleligwa kumfugamalila Mulungu." 16 Mwenye kuhulika naahulike!*

17 Yesu ivo aulekile uyama wa want'hu na kuingila muikaya, wanahina wake wakamulomba awalongele maana ya fumbo dila. 18 Yesu akawalongela, "Vino hata mweye hammanyile? Hammanyile gesa habule kint'hu chochote kulawa kunze ya mnt'hu, chikamwingila hachikudaha kumtenda asekutogoleligwa kumfugamalila Mulungu? 19 Hachikudaha kumtenda mnt'hu asekutogoleligwa kumfugamalila Mulungu kwavila hachikumwingila muna umoyo mbali chikuingila mmunda kamala chikulawa kunze ya mtufi. Kwa kulonga vino, Yesu katenda ndiya zose kuwa zikufaya."

20 Yesu akagendelela kulonga, "Kila chikumlawa mnt'hu ndo kikumtenda asekutogoleligwa kumfugamila Mulungu. 21 Kwa vila kulawa mgati mumoyo wa mnt'hu kukulawa magesa yehile na uhank'hu na ubavi na kukoma na 22 ugoni na kumelela mate utajili na ubananzi na uhuni na mamelelo mate yehile na miyongo na madusi na uhenye na kudunt'huka. 23 Ubananzi uno wose ukulawa mgati mwa mnt'hu, uno ndo ukumtenda mnt'hu asekutogoleligwa kumfugamalila Mulungu."

24 Yesu akalawa na kwita kuna dibululu dya Tilo. Uko akeingila muikaya imwe na halondile mnt'hu yoyote amanye gesa ahala. Mbali akapotwa kuifisa. 25 Kukala na mama imwe na mndele wake akalile na vinyamkela, ivo ahulike Yesu ahant'hu hala, akamwitila na akatoa mavindi halongozi hake, 26 akamulomba Yesu amlave mndele wake kinyamkela. Mama iyo hakalile Muyahudi, mbali kakala mkaya wa bululu dya Silofonike mui isi ya Silia. 27 Ndo Yesu akamulongela, "Goza tenk'hu wana wegute, kwa vila havidamane kusola ndiya ya wana na kusumbila mbwa."

28 Ila mama akamulongela Yesu, "Ena, Mndewa icho ukulonga ni kweli, mbali hata mbwa hasi ya haimeza akudya ndiya ilagazwe na wana." 29 Yesu akamulongela, "Kwa vila kulonga goya, bwela ukaya kumwako, kinyamkela kimulawa mndele wako!"

30 Ivo, ila mama akabwela ukaya na akamfika mwanake kagona mdikomwa na kinyamkela kikala kimulawa kale.

31 Kamala Yesu akalawa kudibululu da Tilo, akafosa mgati mwa dibululu dya Sidoni hadi ziwa Galilaya na kwingila kuna isi ya Dekapoli.* 32 Want'hu wamwenga wakamgalila Yesu akalie chinziwi na bubu, wakamulomba nk'hani amuikile mikono na amuhonye. 33 Yesu akamsola ila mnt'hu na kwita nae kunk'handa kutali na want'hu. Uko Yesu akagela vidole vake mmagutwi ya ila mnt'hu. Akatema mate na kuudosa lulimi wa ila mnt'hu. 34 Yesu akalola kuchanya kuulanga, akalava muhe kwa nguvu akamulongela, "Efata" manake, "Gubuka."

35 Ahoaho magutwi yake yakagubuka na lulimi ukalegela akadaha kulonga goya. 36 Kamala Yesu akawalongela, wasekumulongela mnt'hu yoyote mbuli iyo. Mbali hamwenga na kuwalemesa wao ndo wakala wakugendelela kulonga mbuli izo. 37 Want'hu wakakangawala nk'hani, wakalonga, "Mbuli zose azitendile zidamana, kawatenda vinziwi wahulike na mabubu wakulonga!"